Kun Paano Magdadanay na Maugma sa Panahon nin Paggurang

1-2. Ano an pagmansay ni Jehova sa maimbod na mga may edad na? (Salmo 92:​12-14; hilingon man an ritrato.)

SA MANLAIN-LAIN na parte kan kinaban, iba-iba an reaksiyon nin mga tawo sa paggurang. Halimbawa, imahinara ini: Nagigirumduman mo daw kan inot mong marisa na may uban ka na? Tibaad gusto mong gabuton tulos iyan bago pa mahiling kan iba. Pero narealisar mo na maski gabuton mo iyan, dai mo mapupugulan an pagdakul kaiyan. Ipinapahiling kan halimbawang ini na hinihinguwang marhay kan dakul na pugulan an paggurang.

² Alagad, an satong Ama sa langit may ibang pagmansay sa saiyang naggugurang nang mga lingkod. (Tal. 16:31) Iinagid niya sinda sa marambong na mga kahoy. (Basahon an Salmo 92:​12-14.) Taano ta angay an pagkumparar na iyan? An mga kahoy na may marambong na dahon asin dakulon na burak sa parati dakul na dekada nang nabubuhay. Halimbawa, may sarong klase nin magayunon na kahoy na inaapod na Japanese flowering cherry asin nabubuhay iyan nin dakul na taon. An pinakamagagayon kaiyan labing sangribong taon nang nabubuhay. Arog kan gurang nang mga kahoy na ini, magagayon man an may edad nang maimbod na mga lingkod, lalo na sa paghiling ni Jehova. Bako siya sa mga uban naghihiling, kundi sa panglaog na pagkatawo. Asin pinapahalagahan Niya an magagayon na kuwalidad kan mga may edad na—an saindang pakatagal asin kaimbudan—pati man an saindang dakul na taon na maimbod na paglilingkod sa Saiya.

3. Magtao nin halimbawa kun paano ginamit ni Jehova an mga may edad na para isagibo an katuyuhan niya.

³ Dai nababawasan an halaga kan mga lingkod ni Jehova sa paghiling niya dawa nagkakaedad na sinda.a Sa katunayan, parating ginagamit ni Jehova an mga may edad na para isagibo an saiyang katuyuhan. Halimbawa, gurang na kaidto si Sara kan sabihon ni Jehova na magigin siyang ina nin sarong makapangyarihan na nasyon asin na magigin saro siya sa mga apuon kan Mesiyas. (Gen. 17:​15-19) Gurang na kaidto si Moises kan isugo siya ni Jehova para giyahan an mga Israelita paluwas sa Ehipto. (Exo. 7:​6, 7) Asin gurang na kaidto si apostol Juan kan pasabngan siya ni Jehova na magsurat nin limang libro sa Bibliya.

4. Uyon sa Talinhaga 15:​15, ano an makakatabang sa mga may edad na para matagalan an mga kadipisilan na napapaatubang sa sainda? (Hilingon man an ritrato.)

⁴ Huli sa paggurang, dakul na kadipisilan an napapaatubang sa mga may edad na. Mapangirit na sinabi nin sarong sister, “An paggurang bako para sa mga maluya an buot.” Pero makakatabang sa mga may edad na an pagigin maugma o magaya-gayab para matagalan an mga kadipisilan na dara kan paggurang. (Basahon an Talinhaga 15:15.) Sa artikulong ini, pag-uulayan ta an praktikal na mga bagay na puwedeng gibuhon kan mga may edad na para magdanay na maugma. Aaramon ta man kun ano an puwedeng gibuhon kan iba para tabangan an mga may edad na sa saindang kongregasyon. Pag-ulayan ta nguna kun taano ta puwedeng magin dipisil na magdanay na maugma mantang nagkakaedad na kita.

AN PUWEDENG MAGIN EPEKTO KAN PAGGURANG SA SAIMONG KAUGMAHAN

5. Ano an tibaad makapadisganar sa nagkapirang may edad na?

⁵ Ano an tibaad makapadisganar sa saimo? Tibaad namumundo ka huling su mga kaya mong gibuhon kaidto dai mo na kayang gibuhon ngunyan. Tibaad hinihidaw mo an panahon kaidtong hoben-hoben ka pa asin marahay pa an salud. (Ecl. 7:10) Halimbawa, sinabi kan sister na si Ruby: “Masakiton an pagsulot nin bado ta parating makukulog an hawak ko saka dai na ako gayong makahiro. Maski ngani an pagtaas lang nin bitis para magmedyas masakit. Namamagol an mga kamot ko saka grabe an arthritis, kaya dipisil dawa an simpleng mga gibuhon.” Si Harold man, na naglingkod kaidto sa Bethel, nagsabi: “Bako na ako an dating ako, kaya kun minsan nasusuya ako. Maliksihon saka makusog ako kan hoben pa ako. Mahiligon akong mag-baseball. Sinasabi ngani kaidto kan iba, ‘Itao nindo ki Harold an bola ta nungka siyang nagsasalto.’ Pero ngunyan, dai ko na lamang ngani garo kaya maski an pagdaklag lang nin bola.”

6. (a) Ano an iba pang dahilan kaya tibaad pangluyahan nin buot an nagkapirang may edad na? (b) Ano an makakatabang sa mga may edad na para makapagdesisyon kun baga dai na sinda dapat magmaneho? (Hilingon sa isyung ini an artikulong “Dapat Na Daw Akong Magpundo sa Pagmaneho?”)

⁶ Tibaad pangluyahan ka nin buot huling, bakong arog kan dati, may mga bagay nang dai mo na kayang gibuhon nin ika lang. Totoo ini lalo na kun kaipuhan mo na nin maataman saimo o kun kaipuhan mo nang mag-istar kaiba kan saro sa mga aki mo. O tibaad madisganar kang marhay dahil nagparaluya na an saimong salud o paghiling sagkod sa puntong dai ka na puwedeng solong maghali sa harong o magmaneho. Nakakamundo man talaga! Pero magayon na tandaan na an halaga niyato ki Jehova saka sa iba dai nakadepende sa kun baga kaya tang asikasuhon an sadiri ta, mamuhay nin solo, o magmaneho. Asin makakasigurado kita na nasasabutan ni Jehova an satong mga namamatian. An mahalaga sa saiya iyo an satong panglaog na pagkatawo—an satong puso na pano nin pagkamuot asin pasasalamat sa saiya saka sa mga kapwa ta parasamba.​—1 Sam. 16:7.

7. Ano an makakatabang sa mga namumundo huli sa posibilidad na tibaad dai na ninda maabutan an katapusan kan sistemang ini?

⁷ Tibaad namumundo ka huli sa posibilidad na tibaad dai mo na maabutan an katapusan kan sistemang ini. Kun namamatian mo iyan, ano an makakatabang? Hinguwahon na girumdumon na mapasensiyang naghahalat si Jehova para tapuson an maraot na kinaban na ini. (Isa. 30:18) May katuyuhan an pagigin mapasensiya niya. Paagi kaiyan, minilyon na tawo an nagkakaigwa kan panahon asin kan oportunidad tanganing mamidbid siya asin maglingkod sa saiya. (2 Ped. 3:9) Kaya pag namumundo ka, hinguwahon na isip-isipon kun gurano kadakul na tawo an makikinabang sa pagigin mapasensiya ni Jehova bago mag-abot an katapusan. Malay mo, an iba sa sainda mga kapamilya mo.

8. Paano puwedeng makaapekto sa mga may edad na an mga kadipisilan na dara nin paggurang?

⁸ Ano man an satong edad, pag bakong marahay an pagmati ta, mas dakula an posibilidad na makataram o makagibo kita nin mga bagay na pagbabasulan ta. (Ecl. 7:7; Sant. 3:2) Halimbawa, kan nagsasakit an maimbod na si Job, nagin “pabigla-bigla” asin “daing ingat” an saiyang mga tataramon. (Job 6:​1-3, nota sa ibaba) Saro pa, huli sa hilang o tinutumar na bulong, tibaad an sarong may edad na makataram o makagibo nin mga bagay na dai niya man normal na sinasabi o ginigibo. Siyempre, mayo nin siisay man sa sato an tuyong gagamiton an satong edad o hilang bilang sarahutan para magin bakong mabuot o magin mapaghanap. Asin pag narealisar niyatong nakataram kita nin bakong mabuot, dapat na dai kita mag-alangan na maghagad nin dispensa.​—Mat. 5:​23, 24.

KUN PAANO MAGDADANAY NA MAUGMA

9. Taano ta dapat mong akuon an tabang kan iba? (Hilingon man an mga ritrato.)

⁹ Akuon an tabang kan iba. (Gal. 6:2) Sa primero, tibaad masakitan kang gibuhon iyan. Sinabi kan sister na si Gretl: “Kun minsan nasasakitan akong akuon an tabang kan iba ta pagmati ko magigin pagabat ako. Kinaipuhan ko nin panahon tanganing mabago an sakong pag-iisip asin mapakumbabang akuon na kaipuhan ko nin tabang.” Pag inaako mo an tabang kan iba, natatawan mo sinda kan oportunidad na mamatian an kaugmahan sa pagtao. (Gibo 20:35) Siguradong mauugma ka na mahiling na namumutan asin nagmamalasakit sinda sa saimo.

10. Taano ta dai mo dapat lingawan na ipahiling an saimong pasasalamat? (Hilingon man an mga ritrato.)

¹⁰ Ipahiling an pasasalamat. (Col. 3:15; 1 Tes. 5:18) Pag may ginigibong marahay na mga bagay sa sato an iba, nakakamati kita nin pasasalamat pero tibaad nalilingawan tang ipahiling iyan. Alagad, kun mabuot kitang mangirit dangan mapasalamat, maipapamati ta sa satong mga amigo na pinapahalagahan asin inaapresyar niyato an tabang ninda. Si Leah, na nag-aataman sa mga may edad na sa Bethel, nagsabi: “An saro sa mga sister na inaataman ko tinatawan ako nin mensahe nin pasasalamat sa saradit na papel. Haralipot man lang iyan, pero nakaka-touch talaga. Gustuhon kong binabasa an mga iyan, saka nakakaugmang maaraman na naaapresyar niya palan an pag-asikaso ko sa saiya.”

11. Paano mo matatabangan an iba? (Hilingon man an mga ritrato.)

¹¹ Hinguwahon na tabangan an iba. Pag mas ginagamit mo an saimong panahon asin kusog sa pagtabang sa iba, mas dai ka gayong maparapokus sa saimong mga problema. Sarong kasabihan sa Aprika an iinaagid an mga may edad na sa sarong librarya na pano nin mga libro na nagtutukdo nin mahalagang mga leksiyon. Pero an mga librong nasa estante lang dai man makakapagtukdo nin mga leksiyon o makakapag-istorya. Kaya bilang “buhay na librarya,” taano ta dai ihiras sa mga mas hoben an saimong kaaraman asin eksperyensiya? Haputon sinda, asin magdangog na marhay. Sabihon sa sainda kun taano ta an pamumuhay kauyon kan mga pamantayan ni Jehova pirming iyo an pinakamarahay asin na makakatao iyan sa sainda nin kaugmahan. Siguradong makakamati ka nin kaugmahan pag rinaranga asin pinapakusog mo an mas hoben mong mga amigo.​—Sal. 71:18.

12. Uyon sa Isaias 46:​4, ano an panuga ni Jehova para sa mga may edad na? (Hilingon man an mga ritrato.)

¹² Mamibi ki Jehova para sa kusog. Dawa ngani tibaad nakakamati ka nin pangluluya sa pisikal o pangluluya nin buot, tandaan na si Jehova “dai . . . nuarin man napapagal o nangluluya.” (Isa. 40:28) Paano ginagamit ni Jehova an saiyang daing limiteng kusog? An sarong paagi iyo an pagpakusog sa maimbod na mga may edad na. (Isa. 40:​29-31) Sa katunayan, nanunuga si Jehova na tatabangan niya sinda. (Basahon an Isaias 46:4.) Asin pirmi niyang inuutob an saiyang mga panuga. (Jos. 23:14; Isa. 55:​10, 11) Pag namibi ka tapos namati mo mismo an pagkamuot saka suporta sa saimo ni Jehova, talagang makakamati ka nin labi-labing kaugmahan.

13. Uyon sa 2 Corinto 4:​16-18, ano an dapat tang isaisip? (Hilingon man an mga ritrato.)

¹³ Tandaan na temporaryo sana an saimong kamugtakan. Pag isinasaisip niyato na temporaryo sana an sarong masakit na kamugtakan, mas madali niyatong matatagalan iyan. Inaasigurar sa sato kan Bibliya na temporaryo sana an paggurang saka an mga problema sa salud. (Job 33:25; Isa. 33:24) Kaya makakamati ka nin kaugmahan huling aram mong an pinakamarahay na mga aldaw kan saimong buhay papaabot pa lang, bakong nakalihis na. (Basahon an 2 Corinto 4:​16-18.) Pero ano an puwedeng gibuhon kan iba para makatabang?

KUN PAANO MAKAKATABANG AN IBA

14. Taano ta mahalaga na bisitahon asin apudan niyato an mga may edad na?

¹⁴ Regular na bisitahon asin apudan an may edad nang mga tugang. (Heb. 13:16) An mga may edad na puwedeng makamating nagsosolo sinda. Si Brother Camille na dai na kayang maghali sa harong nagsabi: “Puon aga sagkod banggi, yaon lang ako pirmi sa laog kan harong. Kaya makalangkagon talaga. Kun minsan, pagmati ko garo ako gurang na leon na nasa hawla. Nahahadit akong marhay saka nasusuya.” Pag binibisita niyato an mga may edad na, naaasigurar ta sa sainda na pinapahalagahan saka namumutan ta sinda. Posibleng marhay na nangyari na sa sato na nagplano kitang apudan o bisitahon an sarong kakongregasyon niyatong may edad na pero dai ta iyan nagibo. Gabos kita dakulon nin ginigibo sa aroaldaw. Kaya, ano an makakatabang sa sato na “masiyerto . . . kun ano an mas importanteng mga bagay,” kaiba na an pagbisita sa mga may edad na? (Fil. 1:10) Tibaad makatabang na marhay kun magibo ka nin note sa saimong kalendaryo tanganing magirumduman mong i-text o apudan an mga may edad na sa saindong kongregasyon. Puwede ka man mag-iskedyul na bisitahon sinda; likayan an kaisipan na gibuhon sana iyan kun nuarin mo maisipan o magirumduman.

15. Anong mga bagay an puwedeng gibuhon na magkaibanan kan mga mas hoben saka kan mga may edad na?

¹⁵ Kun ika saro na mas hoben, tibaad nahahadit ka kun ano daw an puwede nindong pag-ulayan kan sarong may edad na o kun anong mga aktibidad an puwede nindong gibuhon na magkaibanan. Pero dai mo man kaipuhan na pakaisipon iyan na marhay. An kaipuhan mo lang gibuhon magin marahay na amigo. (Tal. 17:17) Makipag-ulay sa mga may edad na bago asin pagkatapos kan mga pagtiripon kan kongregasyon. Tibaad puwede mo sindang haputon kan saindang paboritong teksto o paistoryahon nin sarong mapangirit na eksperyensiya kan sinda aki pa. Puwede mo man sindang imbitaran na mag-iba sa saimo sa paghiling nin sarong programa sa JW Broadcasting^®. Puwede mo man matabangan sa praktikal na mga paagi an mga may edad na. Halimbawa, puwede mo sindang tabangan na mapagdanay na up-to-date an saindang mga gadyet o ma-download an mga bagong pag-aadalan na publikasyon. An sister na si Carol nagsabi: “Alukon mo sinda na ibanan ka sa mga bagay na gustong-gusto mong ginigibo. Dawa gurang na ako, gusto ko pa man giraray na ma-enjoy an buhay. Gusto kong nagsa-shopping, nagkakakan sa luwas, saka naghihiling sa magagayon na linalang ni Jehova.” Ini man an sabi kan sister na si Maira: “Nobenta anyos na an saro sa mga amiga ko. Singkuwenta y siyeteng taon an kamatuahan niya sako. Pero sa parati dai ko man iyan naririsa dahil pag magkaibanan kami sige mi sanang ngirit tapos ibanan kaming naghihiling nin pelikula. Saka pag may mga problema kami, hinahapot mi an kada saro kun ano an puwedeng gibuhon.”

16. Taano ta puwedeng makatabang na marhay kun iibanan niyato an mga may edad na sa pagduman ninda sa doktor?

¹⁶ Ibanan sinda sa pagduman sa doktor. Apuwera sa paghatod sa mga may edad na pasiring sa ospital, puwede mo man sindang tabangan paagi sa pagsigurado na natatratar sinda nin maayos kan mga nars o doktor asin na natatawan sinda kan kinakaipuhan nindang tabang. (Isa. 1:17) Puwede mo pang matabangan an mga may edad na paagi sa paglista kan sinasabi kan doktor. An may edad nang sister na si Ruth nagsabi: “Sa parati, pag solo lang akong nagpapa-check up, dai ako pigseseryoso kan doktor. Halimbawa, tibaad sabihon kan mga doktor, ‘Mayo ka man talagang hilang; nasa isip mo lang ’yan.’ Pero pag may kaibanan ako, ibang-iba an pagtratar sako kan doktor. Nagpapasalamat ako sa mga brother saka sa mga sister na nagtatao nin panahon para ibanan ako.”

17. Sa anong mga aspekto kan ministeryo puwede kang makikabtang kaiba an mga may edad na?

¹⁷ Makikabtang sa ministeryo kaiba ninda. May mga may edad nang dai na kaya kan hawak na magharong-harong. Pero puwede mo daw imbitaran an sarong may edad nang sister na ibanan ka sa pagpapatotoo paagi sa cart? Tibaad puwede ka pa nganing magdara nin tukawan tanganing makatukaw siya harani sa cart. O puwede mo daw imbitaran an sarong may edad nang brother na ibanan ka sa sarong Bible study mo? Tibaad puwedeng sa harong niya ngani gibuhon an pag-adal. Puwede man na iareglo kan mga elder na gibuhon sa harong kan mga may edad na an mga pagtiripon bago maglingkod sa langtad tanganing mas pasil sa sainda na makaatender diyan. Sulit an ano man na ginigibo niyato tanganing tawan nin onra an mga may edad na.​—Tal. 3:27; Roma 12:10.

18. Ano an pag-uulayan ta sa masunod na artikulong pag-aadalan?

¹⁸ Ipinagirumdom sa sato kan artikulong ini na namumutan asin pinapahalagahan ni Jehova an mga may edad na. Asin gabos kita sa kongregasyon arog man kaiyan an namamatian para sa sainda! An paggurang dipisil, pero sa tabang ni Jehova, kaya mong mapagdanay an saimong kaugmahan. (Sal. 37:25) Nakakapakusog nanggad maaraman na an pinakamarahay na mga aldaw kan saimong buhay papaabot pa lang, bakong nakalihis na! Paano man an nagkapira sa sato na may inaataman na may edad nang kapamilya, aki, o amigong may hilang? Paano nindo mapapagdanay an saindong kaugmahan? Pag-uulayan ta an simbag sa hapot na iyan sa masunod na artikulong pag-aadalan.