Ano an Makatatabang sa Sato na Manindogan na Marigon sa Pagtubod?
1 Poon kaidtong ponan niatong makiasosyar sa organisasyon ni Jehova, an satong espirituwal na pag-oswag nagin sarong gikanan nin kagayagayahan para sa sato! Pero, tangani na magdanay na ‘nakagamot, nakatindog, asin naparigon sa pagtubod,’ kaipuhan an padagos na espirituwal na pag-oswag. (Col. 2:6, 7) Minsan ngani an kadaklan uminoswag sa espirituwal, an nagkapira iinanod huli sa dai ‘pakapanindogan na marigon sa pagtubod.’ (1 Cor. 16:13) Mapeprebentaran niato ini na mangyari sa sato. Paano?
2 Dayaday na Espirituwal na Aktibidad: Mag-establisar nin marahay na espirituwal na kaugalean sa laog kan organisasyon ni Jehova. Digdi abundang inaasikaso an satong espirituwal na mga pangangaipo. An mga pagtiripon kan kongregasyon, asamblea, asin kombension pinahihiro kita para sa orog pang espirituwal na pag-oswag asin karigonan, basta kita dayaday na nag-aatender tangani na mag-ani kan mga pakinabang. (Heb. 10:24, 25) An regular na kaugalean na pagbasa sa Biblia, kan mga magasin na Torrengbantayan asin Awake!, asin kan mga libro na nagtatratar kan matagas na kakanon sa Tataramon nin Dios pangyayarihon na rumarom asin kumosog an satong espirituwal na mga gamot. (Heb. 5:14) An pagbugtak nin personal na espirituwal na mga pasohan asin mahigos na paghihingoang maabot iyan magtatao man nin nagdadanay na mga pakinabang.—Fil. 3:16.
3 Tabang Hale sa mga Maygurang: Maghingoang pahiwason an pakikiasosyar sa mga maygurang sa espirituwal na nasa kongregasyon. Midbidon an kamagurangan, huling sinda sa pangenot an makapakokosog sa sato. (1 Tes. 2:11, 12) Akoon an ano man na hatol o mga suhestion na tibaad itao ninda. (Efe. 4:11-16) Interesado man an ministeryal na mga lingkod sa pagtabang sa iba na maparigon sa pagtubod, kaya asahan nindo an mga tugang na ini para sa pamparigon sa boot.
4 Kaipuhan daw nindo nin tabang sa ministeryo? Makipag-olay sa kamagurangan, asin humagad nin tabang. Tibaad puede kamong iiba sa programang An mga Payunir Nagtatabang sa Iba. Kamo daw bago pa sanang mabautismohan? An pag-adal sa librong Our Ministry asin pag-aplikar kan laog kaiyan maanimar sa pag-oswag pasiring sa espirituwal na pagkamaygurang. Kamo daw sarong magurang? Padagos na pakosogon an espirituwalidad kan saindong mga aki.—Efe. 6:4.
5 Paagi sa pagigin nakagamot asin naparigon sa pagtubod, kita igwa nin dayupot na relasyon ki Jehova asin maogmang pakikiasosyar sa satong mga tugang. Pinangyayari kita kaini na mapaglabanan an mga pananalakay ni Satanas, asin pinakokosog an satong paglaom sa daing katapusan na ngapit.—1 Ped. 5:9, 10.