Kun Taano ta Namomotan Niato an Satong Bilog na Kasararoan nin Magturugang
Sa mayong pagkamoot na kinaban ngonyan, paano niato mapagdadanay na makosog an satong pagkamoot sa satong espirituwal na mga tugang? (1 Ped. 2:17) Paano niato ikapaheheling sa iba na an satong tunay, panglobong kasararoan nin magturugang talagang nag-eeksister? (Mat. 23:8) Paagi sa video na Our Whole Association of Brothers. Ipinaheheling kaiyan an mga dahelan kun taano ta kita nagkakaminorootmootan. Helingon kun masisimbag nindo an mga hapot na ini:
(1) Anong tolong aktibidad an pinakikikabtangan niato kapareho kan satong pambilog na kinaban na kasararoan nin magturugang? (2) Paano ipinaheheling kan satong mga tugang an saindang determinasyon na maghulit (a) sa kaawagan kan Alaska, (b) sa mahiwason na mga duongan kan Europa, asin (c) sa mahibog na mga kadlagan kan Peru? (3) Ano an nangorognang epektibong kasangkapan sa paghuhulit? (4) Taano ta nungka na maninigo niatong mamatean na an paghuhulit ordinaryo sanang gibohon? (5) Magtao nin mga halimbawa kun paano rinanga asin sinuportaran kan mga Saksi ni Jehova an lambang saro sa mga panahon nin kasakitan—mga linog, bagyo, asin guerra sibil. (Helingon an mga komento ni Takao na nasa pahina 23 sa Agosto 22, 1995 Awake! asin ni Kotoyo na nasa pahina 20 sa Oktubre 22, 1996 na Awake!) (6) Sa anong praktikal na mga paagi ikapaheheling niato gabos an lakop na tandang nagpapamidbid sa satong Kristianong kasararoan nin magturugang? (Juan 13:35) (7) Gurano na maninigo niatong pahalagahan na marhay an satong mga pagtiripon kan kongregasyon? (8) Paano nakaaapektar an pagkaigwa nin sarong Kingdom Hall na pinagtitiriponan sa mga mayo kaiyan kan nakaagi? (9) Paano nakaligtas sa espirituwal na paagi an satong mga tugang sa Europa Oriental asin Rusya kan sinda nasa irarom nin pagprohibir? (10) Dawa ngonyan, anong pambihirang paghihingoa an ginigibo nin dakol na Saksi tangani na makaatender sa mga kombension, asin taano? Paano kaini nataros an puso nindo? (11) Taano ta determinado kamo na iribang sumamba na nagkakasararo, tabangan an iba sa mga panahon nin pangangaipo, asin fiel na maghulit noarin man asin ano man an makakaya nindo? (12) Taano ta marahay na magkaigwa nin personal na kopya kan video na ini asin ipaheling iyan sa pinakadakol na interesado na mapupuede?