Magpaheling nin Mamomoton na Interes sa “mga Aking Lalaki na Daing Ama”
1 Si Jehova “ama nin mga aking lalaki na daing ama.” (Sal. 68:5) An saiyang pagmakolog para sa saindang ikararahay nababanaag sa pagboot na ini na itinao nia sa suanoy na nasyon nin Israel: “Dai nindo pagpasakitan nin makuri an siisay man na babaeng balo o aking lalaki na daing ama. Kun sia pasasakitan nindo nin makuri, dangan kun magkurahaw sia sa sako, totoong dadangogon ko an saiyang kinurahaw.” (Ex. 22:22, 23) Kaiba man sa Ley nin Dios an probisyon na tabangan an mga siring sa saindang materyal na mga pangangaipo. (Deut. 24:19-21) Sa Kristianong areglo, sinasadol an tunay na mga parasamba na ‘atamanon an mga ilo asin babaeng balo sa saindang kasakitan.’ (Sant. 1:27) Paano niato maaarog an mamomoton na interes ni Jehova sa mga nagdadakula sa mga pamilyang nagsosolo an magurang o baranga huli sa relihion?
2 Pagsasanay sa Espirituwal: Kun kamo nagsosolong magurang o may agom na daing pagtubod, an pamamayo nin regular na pag-adal sa Biblia sa saindong mga aki tibaad mag-atubang nin angat. Alagad kaipuhan an regular asin makahulogan na pag-adal sa Biblia tangani na sinda tumalubo na timbang, maygurang na mga nasa edad na. (Tal. 22:6) Mahalaga man na marhay an aroaldaw na pakikipag-olay sa sainda manongod sa espirituwal na mga bagay. (Deut. 6:6-9) Kun beses, tibaad manluya an boot nindo, alagad dai kamo sumuko. Dumolok ki Jehova para sa kosog asin giya mantang ‘padagos na pinadadakula nindo an saindong mga aki sa disiplina asin pagtatanos nin isip ni Jehova.’—Efe. 6:4.
3 Kun kaipuhan nindo nin tabang sa pagsaabaga kan saindong mga paninimbagan na sono sa Kasuratan, ipaaram an saindong mga pangangaipo sa kamagurangan. Makapagtatao sinda nin praktikal na mga suhestion o makakatabang sa saindo sa pag-establisar nin marahay na kaugalean sa espirituwal para sa saindong pamilya.
4 Kun Paano Makakatabang an Iba: Kan enot na siglo, si Timoteo nagin maigot na lingkod ni Jehova apisar na nagdakula sa sarong pamilya na baranga huli sa relihion. An maigot na mga paghihingoa kan saiyang ina asin lola na itokdo sa saiya an banal na kasuratan kan sia hoben pa daing duda na nagkaigwa nin importanteng kabtang digdi. (Gibo 16:1, 2; 2 Tim. 1:5; 3:15) Minsan siring, sia nakinabang man sa pakikiasosyar sa iba pang Kristiano, kabale si apostol Pablo, na inapod si Timoteo na saiyang “namomotan asin fiel na aki dian sa Kagurangnan.”—1 Cor. 4:17.
5 Siring man ngonyan, kapakipakinabang nanggad kun an maygurang sa espirituwal na mga tugang na lalaki asin babae nagpapaheling nin mamomoton na interes sa mga aking lalaki asin babae na daing ama na nasa kongregasyon! Midbid daw nindo sa ngaran an balang saro? Kinakaolay daw nindo sinda sa Kristianong mga pagtiripon asin sa ibang mga okasyon? Imbitaran sinda na umiba sa saindo sa ministeryo sa langtad. Tibaad puede nindo sindang iiba kun minsan, kaiba an saindang nagsosolo o may pagtubod na magurang, sa saindong pampamilyang pag-adal o sa mga areglo para sa kapakipakinabang na pag-aling-aling. Kun an mga aki na ini minamansay kamo bilang saindang katood, mas posibleng arogon ninda an saindong halimbawa asin akoon an saindong pagparigon sa boot.—Fil. 2:4.
6 Si Jehova interesadong gayo sa mga aking lalaki asin babae na daing ama, asin binebendisyonan nia an satong mamomoton na mga paghihingoa na tabangan sinda na isapuso an katotoohan. An dakol na nagdakula sa mga pamilya na nagsosolo an magurang o nababanga huli sa relihion nag-aako nin siring na pagparigon sa boot asin naglilingkod na ngonyan nin fiel bilang mga payunir, ministeryal na lingkod, magurang sa kongregasyon, nagbibiaheng paraataman, misyonero, o miembro kan pamilyang Bethel. Kita logod gabos humanap nin mga paagi na ‘humiwas’ sa satong kapadangatan sa mga daing ama, bilang pag-arog sa satong langitnon na Ama.—2 Cor. 6:11-13.