Hapot
◼ Ano an mga bentaha kun maatender sa kongregasyon na may kapot kan teritoryong iniistaran niato?
Paagi sa areglo kan kongregasyon, kita nag-aako nin pagparigon sa boot ‘na nagdadagka sa sato sa pagkamoot asin sa marahay na mga gibo.’ (Heb. 10:24, 25) Paagi sa kongregasyon nanonodan niato an katotoohan asin nasasangkapan kita na otobon an asignasyon sa sato na gumibo nin mga disipulo. (Mat. 28:19, 20) Napakokosog man kita na fiel na tagalan an mga pagbalo asin igwa kita nin mamomoton na mga paraataman na matabang sa sato na makaya an nagdadakol na pangigipit asin kahaditan. Malinaw nanggad, an kongregasyon mahalagang marhay sa satong espirituwal na kaligtasan. Minsan siring, igwa daw nin mga bentaha sa pag-atender sa kongregasyon na may kapot kan teritoryong iniistaran niato?
Nagkakalaenlaen an mga kamugtakan nin indibiduwal, asin an mga bagay na arog nin sekular na trabaho, daing pagtubod na agom, asin transportasyon puedeng makaapektar sa pinal na desisyon nin saro mapadapit digdi. Pero igwa nin depinidong mga bentaha, sa espirituwal sagkod sa ibang bagay, kun an saro nakikiasosyar sa kongregasyon na may kapot kan teritoryong iniistaran nia. Mahihimo kan kamagurangan na makakomunikar nin mas madali an gabos na parahayag kun may mangyaring mga emerhensia. An nakaaging Mga Hapot nagtampok nin dakol na iba pang bentaha.—Hunyo 1991, Mayo 1976, asin Marso 1967 sa Ingles.
Sa pankagabsan, mas kombenyente na umatender sa mga pagtiripon sa harani, na nagtotogot sa sato na umabot nin amay nanggad tangani na makaolay an iba, maasikaso an kaipuhan na mga bagay, asin makikabtang sa pambukas na awit asin pamibi. Kun igwa nin bagohan na mga interesado na nag-iistar sa satong pagtaraed, sa parate kita nasa mas marahay na kamugtakan na makaolay sinda, mamayo nin mga pag-adal sa Biblia sa sainda, asin giyahan sinda sa mga pagtiripon na pinakakombenyente sa sainda.
Kompiado kami na may pagngayongayong eestudyaran kan mga payo nin pamilya an bagay na ini, na tinitimbang an gabos na bagay na kalabot sa pagdeterminar kun ano an pinakamarahay para sa espirituwal asin pisikal na ikararahay kan saindang pamilya.—1 Tim. 5:8.