Ibalangibog an Mensahe kan Kahadean
1 “Kaipuhan na ipahayag ko . . . an maogmang bareta kan kahadean nin Dios, huli ta dahelan kaini na ako isinugo.” (Luc. 4:43) Sa mga tataramon na iyan, sinabi ni Jesus kun ano an tema kan saiyang ministeryo—an Kahadean nin Dios. An mensahe na ibinabalangibog niato ngonyan nakasentro man sa Kahadean, siring kan ihinula sa Mateo 24:14: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” Anong mga katotoohan manongod sa Kahadean nin Dios an kaipuhan na madangog nin mga tawo?
2 An Kahadean nin Dios namamahala na ngonyan hale sa kalangitan asin sasalidahan sa dai na mahahaloy an gabos na pamamahala nin tawo. Pinalayas na sa langit an Diablo, asin an presenteng maraot na sistema nin mga bagay naglaog na sa huring mga aldaw kaiyan. (Kap. 12:10, 12) Biyong lalaglagon an maraot na daan na sistema ni Satanas, alagad dai matatanyog an Kahadean nin Dios. Iyan magdadanay sagkod lamang.—Dan. 2:44; Heb. 12:28.
3 Papanigoan kan Kahadean an kapakipakinabang na mga kamawotan kan gabos na makinuyog na tawo. Matao iyan nin kaginhawahan gikan sa pagdusa na bunga nin guerra, krimen, pan-aapi, asin kadukhaan. (Sal. 46:8, 9; 72:12-14) Magkakaigwa nin abundang kakanon para sa gabos. (Sal. 72:16; Isa. 25:6) An mga helang asin diperensia dai na magigirumdoman. (Isa. 33:24; 35:5, 6) Mantang an katawohan nagigin sangkap, an daga magigin paraiso, asin an mga tawo iribang mag-eerok na may pagkaoroyon.—Isa. 11:6-9.
4 Ipinaheheling niato na boot niatong magin mga sakop kan Kahadean nin Dios sa paagi nin pamumuhay niato ngonyan. An mensahe kan Kahadean maninigo na makaimpluwensia sa bilog niatong pamumuhay, kaiba an satong mga pasohan asin prioridad. Halimbawa, minsan ngani may obligasyon kitang sustentohan an satong pamilya, dai niato totogotan an materyal na mga kahaditan na madaog an intereses kan Kahadean. (Mat. 13:22; 1 Tim. 5:8) Imbes, dapat niatong himateon an konseho ni Jesus: “Kun siring, padagos na hanapon nguna an kahadean asin an saiyang katanosan, asin ini gabos na ibang bagay [materyal na mga pangangaipo sa buhay] idadagdag na sana sa saindo.”—Mat. 6:33.
5 Importante na an mga tawo magdangog asin maghiro oyon sa mensahe kan Kahadean mantang may panahon pa. Tabangan logod niato sinda na gibohon iyan paagi sa ‘paggamit nin pangongombensir may labot sa kahadean nin Dios.’—Gibo 19:8.