Sarong Video na Matao nin Kaliwanagan Asin Mamotibar sa Saindo!
Abril 1951 kaidto. Rinibong Saksi ni Jehova sa dating Unyon Sobyet—bilog na mga pamilya—an tiniripon, isinakay sa mga boxcar, asin idinistiero sa Siberia. Taano ta desidido sindang paraon kan poderosong gobyernong Sobyet? Paano an satong mga tugang nakatagal asin nagin mapanggana pa ngani sa ibong nin dakol na dekadang daing herak na paglamag? Makukua nindo an mga simbag sa video na Faithful Under Trials—Jehovah’s Witnesses in the Soviet Union. Dalanon iyan, asin togotan an nagtataong liwanag na mensahe kaiyan na makamotibar saindo na papagdanayon an pagigin fiel nindo ki Jehova, ano man an mangyari!
Masisimbag daw nindo an mga hapot na ini? (1) Kasuarin an mga Saksi ni Jehova enot na nakakua nin opisyal na pagrekonoser sa Rusya? (2) Bago asin pakatapos kan Guerra Mundial II, paano an Unyon Sobyet nagkaigwa nin rinibo pang pamilyang Saksi? (3) Paano an mga tinutubod ninda direktang kontra sa pilosopiya ni Lenin? (4) Ano an “Operation North,” asin ano an linalaoman ni Stalin na gibohon paagi kaiyan? (5) Ano an nagin kahulogan kan pagdistiero para sa mga Saksi, asin ano an ipinagigibo sa sainda tanganing makalikay sa pagkadistiero? (6) Sa halawig na biahe sa tren pa-Siberia, paano nagparinigonan nin boot an satong mga tugang na lalaki asin babae saka paano napangalas sa sainda an mga nambihag sa sainda? (7) Anong mga kasakitan an tinagalan kan mga Saksi sa Siberia? (8) Anong espirituwal na probisyon an pinahalagahan na marhay kan banwaan ni Jehova, asin taano? (9) Taano ta andam an satong mga tugang na isapeligro an saindang buhay sa kapakanan kan mga babasahon ninda, asin paano sinda nagin mapanggana sa ibong kan daing ontok na paghihingoa kan mga autoridad na olangon an pag-ako ninda kaiyan? (10) Paano padagos na sinalakay ni Khrushchev an banwaan nin Dios? (11) Paano pinagmaigotan kan mga autoridad na raoton an pagtubod kan mga aking Saksi? (12) Ano an malinaw na nasasabotan kan mga tugang niato manongod sa dahelan kun taano ta sinda pinaglalamag? (2002 Yearbook, pahina 203-4) (13) Paano nagkaigwa nin maraot na resulta sa mga paralamag an todo-todong pagsalakay sa organisasyon nin Dios? (2002 Yearbook, pahina 220-1) (14) Anong mga bagay an nagkatotoo na kaidto pangatorogan sana para sa mga Saksi sa dating Unyon Sobyet? (15) Ano an nakatabang sa satong mga tugang na matagalan an mga pagbalo sa sainda, asin paano an huring eksena sa video naglaladawan kan pagigin totoo kan Jeremias 1:19? (16) Isaysay an saro sa tunay na buhay na eksperyensia nin pagigin fiel sa irarom nin pagbalo na nangorognang nakamotibar sa saindo.