“Magtao nin Lugar Dian”
1 Sarong beses, kan nakikipag-olay sa mga disipulo nia manongod sa pag-agom, sinambit ni Jesus an pagigin daing agom bilang ‘sarong balaog.’ Dangan sia nagsabi: “An makatatao nin lugar dian magtao nin lugar dian.” (Mat. 19:10-12) Pakalihis nin nagkapirang taon, si apostol Pablo nagsurat manongod sa mga bentaha nin pagigin daing agom asin inenkaminar nia an iba na arogon an saiyang halimbawa sa pagdadanay na daing agom. (1 Cor. 7:7, 38) Dakol ngonyan an ‘nagtao nin lugar’ sa pagigin daing agom asin nakakamtan ninda an mga bentaha kaiyan. Ano an nagkapira kaini?
2 Paglilingkod na “Mayo nin Disturbo”: Nasabotan kaidto ni Pablo na an pagigin daing agom nagtao sa saiya nin oportunidad na paglingkodan si Jehova na “mayo nin disturbo.” Siring man ngonyan, an sarong daing agom na tugang na lalaki makapag-aaplay para sa Paadalan sa Ministeryal na Pagsasanay, asin an daing agom sa pankagabsan mas libreng lumaog sa pagpapayunir, mag-adal nin ibang lenguahe, bumalyo kun saen mas dakula an pangangaipo, maglingkod sa Bethel, o magin andam na gamiton sa iba pang espesyal na pribilehio nin paglilingkod. Tibaad mas dakol an oras asin oportunidad nia na gumibo nin hararom na personal na pag-adal asin paghorophorop saka makipag-olay ki Jehova sa odok sa pusong pamimibi. An daing agom sa parate dakol an oras asin kosog sa pagtabang sa iba. An gabos na siring na aktibidad para sa “personal na pakinabang” nin saro.—1 Cor. 7:32-35; Gibo 20:35.
3 An siring na mayo nin disturbong paglilingkod sa Dios nagtatao nin nagsosopay na mga balos. Pakalihis nin 27 taon sa Kenya, an sarong tugang na babae na daing agom nagsurat: “Kadakol nin katood asin kadakol man nin trabaho! Nagtitinarabangan [asin] nagdidinalawan kami. . . . Nagamit ko an ekstrang katalingkasan asin pagigin libreng magduman saen man na lugar huli sa pagigin daing agom tanganing magin masibot sa ministeryo, asin ini nagtao sako nin dakulang kaogmahan.” Sabi pa nia: “Sa nag-aging mga taon ruminarom an sakong relasyon ki Jehova.”
4 Pagtao nin Lugar Dian: Sinabi ni Jesus na an motibo sa pagkultibar sa balaog na pagigin daing agom maninigo na “huli sa kahadean kan kalangitan.” (Mat. 19:12) Siring nin ano man na balaog, an pagigin daing agom dapat na gamiton nin tama tanganing makapagtao nin kagayagayahan asin mga pakinabang. Paagi sa pag-aprobetsar sa mga oportunidad na itinatao nin pagigin daing agom asin paagi sa pagsarig ki Jehova para sa kadonongan asin kosog, nasabotan nin dakol na daing agom an kahalagahan nin pagtao nin lugar sa balaog na iyan.