An Husay na Gubing Nagpapaheling nin Reberensia sa Dios
1. Paano niato ikapahahayag an pag-apresyar sa satong nagdadangadang na pandistritong kombension?
1 Dai na mahahaloy, magkakapribilehio kita na magin mga bisita ni Jehova sa “Pamurawayon an Dios” na Pandistritong Kombension sa 2003-2004. Kanigoan an pasasalamat niato ki Jehova na inimbitaran kita sa siring na nagsosopay na espirituwal na kapiestahan! Ikapaheheling niato an satong reberensia sa saiya asin an satong pag-apresyar sa saiyang espirituwal na mga probisyon paagi sa satong gubing asin pag-alinyar sa satong sadiri.—Sal. 116:12, 17.
2. Taano ta importante na kita magin malinig asin maayos an pag-alinyar?
2 Malinig Asin Areglado: An itsura niato maninigong magpabanaag kan mga pamantayan kan satong Dios, na malinig asin areglado. (1 Cor. 14:33; 2 Cor. 7:1) An satong hawak, buhok, asin mga kuko maninigong magin malinig, asin maninigong maayos an pag-alinyar niato. Lakop ngonyan an pabayang pag-alinyar. Minsan siring, bakong dahelan para sa sarong Kristiano na magin desareglado an itsura huli sana ta an sarong artista sa pelikula o eroe sa isport desareglado man an itsura. Kun masunod kita sa mga uso, tibaad madepisilan an mga tawo na maheling an pagkakalaen kan mga naglilingkod sa tunay na Dios asin kan mga dai naglilingkod sa saiya.—Mal. 3:18.
3. Paano niato masesegurado na an satong itsura magigin kaoyon kan konseho na yaon sa 1 Timoteo 2:9, 10?
3 Gubing na Angay sa Kristianong mga Ministro: Kan si apostol Pablo magsurat sa Kristianong paraataman na si Timoteo, inenkaminar nia an “mga babae [na] magsamno sa saindang sadiri nin husay na gubing, na may kabinian asin toltol na isip, . . . sa paagi na angay sa mga babae na naghihingakong sinda may reberensia sa Dios, arin na baga, paagi sa marahay na mga gibo.” (1 Tim. 2:9, 10) Nagkakaipo nin maingat na paghorophorop tangani na masegurado na husay an satong gubing. An gubing maninigong magin maayos, malinig, asin mabini—bakong sobra sa dekorasyon, o nakakapukaw.—1 Ped. 3:3.
4, 5. Anong mga patanid an maninigong himateon nin Kristianong mga lalaki asin babae?
4 Nagpatanid man si Pablo tumang sa sobrang “mga estilo nin mga pagsalapid nin buhok asin bulawan o perlas o mamahalon na gayong gubing.” (1 Tim. 2:9) An pagigin timbang sa paggamit nin alahas, kosmetik, asin iba pang mga samno madonong na dalan na dapat kuyogon nin mga Kristiana.—Tal. 11:2.
5 An konseho ni Pablo na itinao sa mga Kristiana aplikado man bilang prinsipyo sa Kristianong mga lalaki. Maninigong likayan kan mga tugang na lalaki an mga estilo na nagpapabanaag kan kaisipan kan kinaban. (1 Juan 2:16) Halimbawa, sa nagkapirang nasyon, popular an haluagon na gubing, alagad an mga estilong ini dai nagtatao nin angay na itsura para sa sarong ministro nin Dios.
6. Taano ta maninigo kitang magpadanay nin halangkaw na pamantayan sa satong gubing asin pag-alinyar kun nagbibiahe pasiring asin hale sa kombension, mientras na nasa kombension, asin pagkatapos kan mga sesyon kada aldaw?
6 Durante nin mga Paglilibang: Mantang nag-aatender sa programa, an kadaklan na tugang na lalaki asin babae nagtatao nin ekselenteng halimbawa kun dapit sa gubing asin pag-alinyar. Minsan siring, ipinaririsa nin mga report na an nagkapira nagigin pabaya kun nagbibiahe pasiring asin hale sa kombension o kun naglilibang pagkatapos kan mga sesyon. An totoo, an satong personal na itsura—baga man durante kan programa o sa ibang mga panahon—nakaiimpluwensia sa kun paano minamansay kan iba an banwaan nin Dios. Mantang pirme niatong isinusulot an mga badge card kan kombension, maninigo kitang pirmeng maggubing sa paagi na angay sa Kristianong mga ministro. Ini parateng nagpapahiro sa iba na omawon kita asin nagbubukas kan dalan na makapagpatotoo.—1 Cor. 10:31-33.
7. Ano an magigin epekto sa iba kan satong husay na gubing asin pag-alinyar?
7 Kun paanong an maboot na huyom napapakarhay an itsura kan satong lalauogon, an husay man na gubing asin pag-alinyar nagtataong dignidad sa mensahe na dara niato asin sa organisasyon na irinerepresentar niato. An nagkapira na magmamasid sa sato durante kan “Pamurawayon an Dios” na Pandistritong mga Kombension ngonyan na taon tibaad mapahiro na maghapot kun taano ta kita napapalaen asin sa kahurihurihi sinda magsabi: “Maiba kami sa saindo, huli ta nabaretaan [asin namasdan] niamo na an Dios yaon dian sa saindo.” (Zac. 8:23) Ipaheling logod kan lambang saro sa sato an reberensia niato ki Jehova paagi sa satong gubing asin pag-alinyar.
[Kahon sa pahina 5]
Ipaheling an May Dignidad na Itsura
▪ Kun nagbibiahe
▪ Sa kombension
▪ Durante nin mga paglilibang