Hapot

◼ Anong klase nin gubing an angay kun nagdadalaw sa mga pasilidad na ginagamit sa paglilingkod ki Jehova?

Sa bilog na kinaban, an mga Kingdom Hall, Assembly Hall, Erokan na Bethel, asin pasilidad kan sangang opisina espesyal na mga lugar na idinusay sa paglilingkod ki Jehova. An mga iyan simple sana, malinig, asin aregladong marhay, na nagpapaheling nin dignidad. Dakula nanggad an kalaenan kaiyan sa parateng naheheling sa sistema nin mga bagay ni Satanas. An mga nagdadalaw sa mga lugar na ginagamit sa paglilingkod ki Jehova maninigo man na midbidon na sadiri ni Jehova asin naggigibo kan saiyang kabotan.

Bilang mga Kristiano, ‘irinerekomendar niato an satong sadiri bilang mga ministro nin Dios’ sa gabos na paagi, pati na sa angay asin aregladong marhay na paggubing saka sa satong pagpakarhay sa sadiri. (2 Cor. 6:3, 4) Inaasahan man na papagdadanayon niato an angay na gawe-gawe. Sa gabos na panahon, an satong paggubing asin pagpakarhay sa sadiri maninigong magpaheling kan pagigin disente asin kan dignidad na angay sa mga lingkod ni Jehova Dios. Ini nangorognang totoo kun nagdadalaw sa mga pasilidad kan opisina prinsipal sa Nueva York saka sa mga sangang opisina sa bilog na kinaban.

Sa pagpaliwanag kan kahalagahan nin angay na paggubing asin pagpakarhay sa sadiri, an Organisado sa Paggibo kan Kabotan ni Jehova nagkomento manongod sa pangangaipo na magin malinig sa pisikal, maggubing nin mabini, asin pakarhayon an sadiri kun kita nakikikabtang sa ministeryo sa langtad saka nag-aatender sa Kristianong mga pagtiripon. Dangan, sa pahina 138, parapo 3, sinabi kaiyan: “Girumdomon, an ngaran na Bethel nangangahulogan ‘Harong nin Dios.’ Kun siring, an satong gubing, pag-alinyar, asin gawe-gawe maninigo na kapareho kan inaasahan sa sato kun kita nag-aatender sa mga pagtiripon para sa pagsamba sa Kingdom Hall.” Kun nagdadalaw sa Bethel, an halangkaw na pamantayan na ini maninigong sunodon kan mga parahayag kan Kahadean na nakaistar harani sa Bethel saka kan mga hale sa mas hararayong lugar. Sa paaging ini, ipinapaheling kan nagdadalaw an angay na pag-apresyar asin paggalang.—Sal. 29:2.

An satong gubing maninigong magpamidbid sa sato bilang mga tawong ‘nagsasabing may reberensia sa Dios.’ (1 Tim. 2:10) An angay na paggubing asin pagpakarhay sa sadiri igwa nin positibong epekto sa pagmansay nin iba sa tunay na pagsamba ki Jehova. Minsan siring, naobserbaran na kun nagdadalaw sa mga pasilidad na ginagamit sa paglilingkod ki Jehova, may pirang tugang na nagigin sobra kaimpormal asin pabaya sa saindang paggubing, o nagbabado na naheheling na an mga parte kan hawak na dapat na natatahoban. An siring na gubing bakong angay sa mga Kristiano sa ano man na panahon. Sa bagay na ini, arog kan sa gabos na iba pang aspekto kan satong buhay bilang mga Kristiano, minamawot niatong papagdanayon an halangkaw na mga pamantayan na nagpapamidbid kan kalaenan kan banwaan nin Dios asin kan kinaban, na ginigibo an gabos na bagay sa ikakamuraway nin Dios.—Roma 12:2; 1 Cor. 10:31.

Kaya kun nagdadalaw sa opisina prinsipal asin sangang opisina sa Estado nin Nueva York o sa iba pang pasilidad kan sangang opisina, baga man iyan plinanong pagdalaw o mantang nagbabakasyon sa mga lugar na pangturista, hapoton an saimong sadiri: ‘Ipinapaheling daw kan sakong paggubing asin pagpakarhay sa sadiri an kabinian, an kalinigan, asin an dignidad kan lugar na dadalawon ko? Nagtatao daw iyan nin marahay na impresyon manongod sa Dios na sinasamba ko? Madidisturbo o mapupurisaw daw an iba huli sa sakong itsura?’ Paagi sa satong paggubing asin pagpakarhay sa sadiri, logod na pirme niatong ‘samnohan an katokdoan kan satong Paraligtas, an Dios, sa gabos na bagay’!—Tito 2:10.