Hapot

◼ Anong pamantayan sa gubing asin pag-alinyar an maninigo niatong sunodon kun nagdadalaw sa mga erokan na Bethel asin pasilidad kan sanga?

Kun kita nagdadalaw sa Bethel, baga man tangani na mamasyar sa pasilidad o dalawon an mga miembro kan pamilyang Bethel, “an satong gubing, pag-alinyar asin gawe-gawe maninigong magin pareho sa linalaoman sa sato kun nag-aatender sa mga pagtiripon para sa pagsamba sa Kingdom Hall.” (om-E 131) Minsan siring, naobserbaran na kun nagdadalaw sa mga sangang opisina, an nagkapirang tugang na lalaki asin babae may tendensiang magin sobra kaimpormal sa saindang gubing. Iyan bakong angay kun nagdadalaw sa mga pasilidad na ini. An satong itsura maninigo na magin arogan, aregladong marhay, asin mabini, na nagpapabanaag kan pagkadisente asin dignidad na angay sa mga lingkod ni Jehova Dios.​​—1 Tim. 2:​9, 10.

Ini nangorognang importante kun nagdadalaw sa mga erokan na Bethel asin pasilidad kan sanga huli ta nakukua ninda an atension nin dakol na nagmamasid na bakong Saksi. An siring na mga nagmamasid tibaad magkaigwa nin mga opinyon manongod sa banwaan nin Dios asin sa saiyang organisasyon basado sa kun ano an naoobserbaran ninda. Marahay na kaolayon an mga inaadalan sa Biblia asin iba pa na tibaad madalaw na pagirumdomon sinda kan importansia nin pagtaong atension sa angay na gubing asin pag-alinyar. Aapresyaron kan pamilyang Bethel an paggibo nindo kaini.

Bilang Kristianong mga ministro, dapat kitang magin maingat na an satong itsura dai nagtatao nin ano man na dahelan nin pagkasingkog. (2 Cor. 6:​3, 4) Imbes, paagi sa satong marahay na ugale, logod na pirme niatong ‘samnohan an katokdoan kan satong Paraligtas, an Dios, sa gabos na bagay.’​​—Tito 2:10.