Hapot

● Taano ta maninigo niatong tawan nin espesyal na atension an satong gubing asin itsura kun minasongko sa mga sangang opisina kan Sosyedad?

An satong gubing asin itsura maninigong magpaheling sa gabos na panahon kan dignidad na angay sa mga lingkod ni Jehova. Ini nangorognang totoo kun minasongko sa Bethel. An Organized to Accomplish Our Ministry nagkokomento sa pangangaipo nin pisikal na kalinigan asin mabining gubing kun nasa langtad asin pagtiripon. Dangan, sa pahina 131, parapo 2, iyan nagsasabi: “Iyan aplikado man kun minasongko sa Bethel sa Brooklyn o sa arin pa man na sangang opisina kan Sosyedad. Girumdoma, an ngaran na Bethel nangangahulogan ‘Harong nin Dios,’ kaya an satong gubing, itsura asin gawe maninigo na kapareho kan linalaoman sa sato kun minaatender sa mga pagtiripon para sa pagsamba sa Kingdom Hall.”

Si Pablo nagsabi na kita “sarong pasale sa kinaban.” (1 Cor. 4:9) Kaya an satong gubing asin itsura maninigong magkaigwa nin positibong impluwensia sa iba kun dapit sa tunay na pagsamba. Minsan siring, narisa na an ibang tugang, kun minasongko sa Bethel, may tendensiang magin sobra kakaswal an gubing. An siring na gubing bakong angay kun minasongko sa mga sanga. Sa bagay na ini, boot niatong mapagdanay an halangkaw na mga pamantayan na nagpapalaen kan banwaan nin Dios sa kinaban paagi sa paggibo kan gabos na bagay sa ikamumuraway nin Dios. (Roma 12:2; 1 Cor. 10:31) Marahay man na kaolayon an satong mga inaadalan sa Biblia asin an iba pa na tibaad primero pa sanang masongko sa Bethel tanganing ipagirumdom sainda na tawan nin atension an tamang gubing asin itsura.

Kaya kun minasongko sa mga pasilidad kan Sosyedad, ihapot sa sadiri, ‘Mabini daw an sakong gubing asin itsura? (Miq. 6:8) Iyan daw nagtatao nin marahay na dangog sa Dios na sakong sinasamba? May masisingkog daw sa sakong itsura?’ Logod permi niatong ‘masamnohan an katokdoan kan satong Paraligtas, an Dios, sa gabos na bagay’ paagi sa satong gubing asin itsura.​—Tito 2:10.