Paano Niato Matatabangan an mga Maatender sa Memorial?

1. Anong mapuersang patotoo an itatao sa Marso 22, 2008?

¹ Sa Marso 22, 2008, minilyon na tawo sa bilog na kinaban an maako nin mapuersang patotoo. An mga maatender sa Memorial makakadangog manongod sa dakulang pagkamoot ni Jehova sa pagtao nin pantubos para sa katawohan. (Juan 3:16) Makakanood sinda manongod sa Kahadean asin kun paano iyan gagamiton ni Jehova tanganing otobon an saiyang kabotan para sa bilog na daga. (Mat. 6:9, 10) Maheheling mismo ninda an pagkamoot asin pagkasararo kan banwaan nin Dios saka maeeksperyensiahan ninda an satong mamomoton na pag-istimar.—Sal. 133:1.

2. Paano niato matatabangan an mga inaadalan sa Biblia na maatender?

² Mga Inaadalan sa Biblia: An nagkapira sa mga maatender iyo an mga nagpoon pa sanang makipag-adal sa sato sa Biblia. Ipamidbid sinda sa mga tugang. Ipaliwanag an semanal na mga pagtiripon, asin ilibot sinda nin madali sana sa Kingdom Hall. Durante kan pahayag, dadagkahon kan ispiker an siring na mga tawo na padagos na umoswag sa espirituwal. Puede nindong gamiton an saiyang pahayag bilang basehan tanganing dagkahon an mga inaadalan nindo sa Biblia.

3. Ano an puedeng gibohon tanganing dagkahon an inaktibong mga parahayag na maatender?

³ Mga Inaktibo: An nagkapira sa mga maatender inaktibong mga parahayag. Magsadiring boot na maogmang taratarahon sinda. Likayan na maghapot nin personal na mga bagay o magsabi nin mga bagay na tibaad makapasupog sa sainda. Sa halipot na panahon pakalihis kan Memorial, maninigong dalawon kan kamagurangan an siisay man na inaktibo na nag-atender, tawan nin komendasyon an mga ini huli sa paghihingoa na umatender, asin mamomoton na imbitaran an mga ini sa sunod na pagtiripon kan kongregasyon.

4. Paano puedeng makatabang sa mga bisita an lambang saro sa sato?

⁴ Mga Bisita: An nagkapira sa mga maatender tibaad mga kamidbid o kapamilya na personal niatong inimbitaran. An iba tibaad nakaresibi nin imbitasyon durante kan espesyal na kampanya. Kun makaheling ka nin mga indibiduwal na dai mo midbid, magsadiring boot na magpamidbid asin maogmang akoon sinda. Tibaad dai pa sinda nakaatender sa saro sa satong mga pagtiripon kaidto. Sa pag-oolay nindo tibaad maaraman mo kun paano sinda kokontakon. Paagi sa personal na pagdalaw o pag-apod nin halipot sa telepono pirang aldaw pakalihis kan Memorial, puede mo sindang dagkahon na makanood nin orog pa asin alokon nin pag-adal sa Biblia.

5. Ano an puede niatong sabihon tanganing makapoon nin pag-adal sa Biblia?

⁵ An impormasyon sa pahayag sa Memorial puedeng gamiton na basehan para sa pag-introdusir kan librong Itinotokdo kan Biblia sa pagdalaw liwat. Halimbawa, babasahon kan ispiker sa Memorial an Isaias 65:21-23. Sa pagdalaw liwat, puede nindong sambiton an pahayag asin sabihon, “Togotan nindo akong ipaheling sa saindo an iba pang bendisyon na pinapagin posible kan pantubos.” Dangan pag-olayan an pahina 4-5 kan librong Itinotokdo kan Biblia. O puede nindong sabihon, “Iniisip-isip nin dakol kun noarin niato maeeksperyensiahan an kaotoban kan hula ni Isaias.” Dangan pag-olayan an parapo 1-3 sa kapitulo 9. An saro pang puedeng gibohon iyo na sambiton sana an mga sinabi kan ispiker sa Memorial, iintrodusir an librong Itinotokdo kan Biblia, asin idemonstrar an pag-adal.

6. Ano an mga oportunidad niato mantang kinukuyog niato an pagboot ni Jesus na girumdomon an saiyang kagadanan?

⁶ Logod na an lambang saro sa sato magin listo sa mga oportunidad na tabangan an mga inaadalan sa Biblia, inaktibong mga parahayag, asin mga bisita na maatender. (Luc. 22:19) Siertong bebendisyonan ni Jehova an ano man na dagdag na aktibidad sa satong paglilingkod na pang-Kahadean.