Maugmang Akuon Sinda!

1. Anong okasyon an nagtatao sa sato nin marahayon na oportunidad na makapagpatotoo, asin taano?

¹ Mayong okasyon an nagtatao sa sato nin mas marahay na oportunidad na makapagpatotoo kisa sa taunan na selebrasyon kan Memoryal. Isip-isipa ini: Ngunyan na taon, labing 10 milyones an linalauman na maatender sa Memoryal asin madangog kan dapit sa duwang kadurudakulaing kapahayagan nin pagkamuot, na ipinahiling paagi sa pantubos. (Juan 3:16; 15:13) Manunudan ninda an dapit sa mga bendisyon na puwede nindang makamtan huli sa balaog ni Jehova. (Isa. 65:21-23) Minsan siring, bako sana an ispiker an makakapagpatotoo sa okasyon na ini. An gabos na nag-atender may oportunidad na epektibong makapagpatotoo paagi sa maugmang pag-ako sa mga bisita.—Roma 15:7.

2. Paano ta maugmang aakuon an mga bisita?

² Imbes na tumukaw na sana asin tuninong na maghalat sa pagpuon kan programa, taano ta dai kamo magpamidbid sa mga bisita? Tibaad ninenerbiyos sinda asin bakong pamilyar dapit sa okasyon. An satong mamumuton na ngirit asin makikatuod na pagtino talagang makakatabang sa sainda na magin pamugtak an buot. Para maaraman kun may nag-atender na natawan nin imbitasyon, puwede nindong haputon siya kun ini an inot niyang pag-atender sa saro sa satong mga pagtiripon o kun may kamidbid siya sa kongregasyon. Tibaad puwede nindo siyang agdahon na tumaid sa saindo asin pasublion kan saindong Bibliya saka songbook. Kun nasa Kingdom Hall, puwede siyang ilibot nin madali sana. Pagkatapos kan pahayag, magin andam na simbagon an mga hapot niya. Kun kaipuhan kan kongregasyon nindo na maghali tulos huling may iba pang magamit, puwede nindong sabihon: “Gusto kong maaraman kun ano an masasabi nindo sa programa. Puwede ko daw kamong kontakon?” Dangan gumibo nin areglo na makakapatalubo sa interes niya. An mga elder an lalo nang dapat magin alisto na parigunon an inaktibong mga parahayag na nag-atender.

3. Taano ta mahalagang hinguwahon niyato na maugmang akuon an mga bisita sa Memoryal?

³ Para sa dakul na bisita, ini an inot nindang pagkakataon na mahiling an kagayagayahan, katuninungan, asin pagkasararo kan espirituwal na paraisong nakakamtan ta bilang banwaan ni Jehova. (Sal. 29:11; Isa. 11:6-9; 65:13, 14) Ano an magigin impresyon kan mga bisita? Iyan nakadependeng marhay sa satong paghihinguwa na maugmang akuon sinda.