May Ikakatao na Mapuersang Patotoo
1. Apuera sa pahayag, sa ano pa puedeng mapahanga an mga magigin bisita sa Memorial? Ipaliwanag.
1 Noarin? Sa banggi kan Memorial. Dakulang paghihingoa an ginigibo sa pag-imbitar sa mga tawo na umatender kaiba niato. An mga bisita mapapahanga bako sana sa madadangog ninda. Pagkaatender sa Memorial, sarong babae an espesipikong nagkomento dapit sa naheling nia—an pagigin makikatood kan gabos asin an magayon saka malinig na edipisyong itinogdok patin minamantenir nin mga boluntaryo. Kun siring, apuera sa ispiker, kita gabos may kabtang sa pagpatotoo sa pinakaimportanteng okasyon na ini kan taon.—Efe. 4:16.
2. Paano makakapagpatotoo sa mga bisita an lambang saro sa sato?
2 Maogmang Akoon an mga Bisita: Makakapagpatotoo an satong makikatood na huyom saka maogmang pagkumusta sa mga bisita. (Juan 13:35) Dawa kun dai nindo makakaolay an gabos, kamo puede pa man giraray na maogmang magpamidbid sa mga tawo na harani sa kinamumugtakan nindo. (Heb. 13:1, 2) Magin mapagrisa sa mga bisitang garo baga mayo nin siisay man na kamidbid. Posibleng nakaresibi sinda nin imbitasyon durante kan pagdistribwir kaiyan. Puede nindong ihapot, “Ngonyan lang kamo nakadigdi?” Agdahon sinda na tumaed sa saindo, asin sabihon na andam kamong sumimbag sa ano man na hapot ninda. Kun kaipuhan kan saindong kongregasyon na maghale tolos huling may ibang kongregasyon na magamit kan pasilidad, puede nindong sabihon: “Gusto kong maaraman kun ano an masasabi nindo sa programa. Puede ko daw kamong kontakon?”
3. Paano niato aakoon an mga inaktibo?
3 Akoon an mga Inaktibo: Mayong duda na may inaktibong mga parahayag na maatender, kaiba an nagkapira na nag-aatender sana sa taonan na Memorial. Akoon sinda, asin ipaaram sa sainda na talagang naoogma kamong maheling sinda. (Roma 15:7) Dangan, an mga magurang sa kongregasyon puedeng magdalaw tolos sa saindang harong tanganing dagkahon sinda na padagos na makiasosyar sa kongregasyon. Ipinapamibi niato na logod dakol sa mga maatender an mapapahiro na pamurawayon an Dios bako sanang huli sa madadangog ninda kundi huli man sa maheheling ninda na resulta ‘kan satong marahay na mga gibo na naheheling mismo ninda.’—1 Ped. 2:12.