Internasyonal na Pagtogdok nin Kingdom Hall sa Nagkapirang Nasyon sa Europa
1 Kan nakaagi pa sanang mga dekada ipinagbawal an gibohon kan Mga Saksi ni Jehova sa dakol na nasyon sa Europa, kaiba an Europa Oriental. Sa kadaklan na kamugtakan, grabe nanggad an mga restriksion. Depisil na magkaigwa nin hayag na mga pagtiripon, asin haros imposible an pagtiripon sa Kingdom Hall. Minsan siring, kan nakaagi pa sanang mga taon, “si Jehova nakaginibo nin dakulang bagay huli sa saiyang ginibo sa sato. Kita nagin magayagaya.”—Sal. 126:3.
2 Poon kan 1983, an mapan-aping pamomogol sa mga Saksi ni Jehova nagpoon nang humaluag. Pag-abot kan 1989, tinawan kan Polandia asin Hungaria an Mga Saksi ni Jehova nin legal na pagrekonoser. Kan 1991, tinawan an Mga Saksi ni Jehova nin legal na rehistro sa Rusya. Poon kaidto, nag-oswag an gibohon sa Rusya asin sa dating mga republika kan Unyon Sobyet. Sa pag-oltanan kan Marso 1996 asin Oktubre 1998, inaprobaran kan Namamahalang Grupo an 359 kahagadan na utang para sa Kingdom Hall hale sa mga sangang opisina na nagdidirehir sa 11 nasyon sa Europa.
3 Mantang hineheling nindo an mga retrato sa suplementong ini, horophoropon an dakula asin marahayon na mga bagay na ginibo ni Jehova sa kapakanan kan saiyang banwaan. (Sal. 136:4) Maoogma kamong maaraman na ginagamit sa marahayon na paagi an mga donasyon kan pambilog na kinaban na kasararoan nin magturugang, na ipinababanaag an sinabi ni Jesus, na nasusurat sa Juan 13:35: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.”
4 Kabilang sa mga nasyon sa Europa na nakikinabang sa areglong pagtabang sa pagtogdok nin mga Kingdom Hall sa mga nasyon na limitado an rekurso iyo an Romania, kun saen 36 na Kingdom Hall an ikinatogdok na poon Hulyo 2000. Paagi sa paggamit nin modelong plano para sa haros gabos na Kingdom Hall ninda, an Ucrania nagtogdok nin 61 kan taon 2001 asin 76 pa kan 2002. Sa tabang nin mga kuarta na idinonar sa Pondo sa Kingdom Hall, ginatos na Kingdom Hall an ikinatogdok na sa Bulgaria, Croatia, Macedonia, Moldova, Rusya, asin Yugoslavia.
5 Dai nagin pasil an pagtogdok nin mga Kingdom Hall sa nagkapirang nasyon, asin dakol na paghihingoa an dapat na gibohon bago maponan an aktuwal na pagtogdok. Parate na nakauubos nin panahon an proseso. Dangan, an gastos man sa pagtogdok nin Kingdom Hall sa parteng iyan nin Europa mas dakula nanggad kisa sa dakol na parte nin Aprika o Amerika del Sur. Minsan siring, huli sa dakulang pag-oswag sa kabilangan nin mga nagsasamba ki Jehova, ginatos na Kingdom Hall an kaipuhan pa sa mga nasyon sa Europa na limitado an rekurso!
6 Makangangalas nanggad na maheling an siring karikas na pag-oswag sa pagtogdok kan mga Kingdom Hall na ini! Nakapagtao nin ekselenteng patotoo sa pagtaraed kun saen iyan itinogdok, siring sa ipinaheheling nin dakol na eksperyensia. Sa nagkapirang lugar, naghanga an lokal na mga autoridad sa gikan sa boot na espiritu na ipinaheling sa pagsunod sa mga regulasyon sa pagtogdok.
7 Si Isaias tamang naghula manongod sa pag-oswag kan tunay na pagsamba sa panahon na ini. Paagi sa propetang iyan naghula an Dios: “Ako mismo, si Jehova, maparikas kaiyan sa kapanahonan kaiyan.” (Isa. 60:22) Tunay nanggad, an nakaaging dekada nagin panahon ni Jehova sa pagpaoswag sa Europa Oriental. Logod na padagos na ibubo ni Jehova an saiyang mayaman na bendisyon sa satong mga paghihingoa na maparikas an pagtogdok nin mga Kingdom Hall sa dakol na nasyon mantang kita nagtatao nin dugang pang suporta sa Pondo sa Kingdom Hall! Ini maresulta sa dakol pang Kingdom Hall na nakadadagdag sa mga nasyon na limitado an rekurso. Iyan makontribwir sa pag-oswag nin dalisay na pagsamba sa dakol na parte nin Europa asin sa mas dakulang patotoo na itinatao sagkod sa “kaporoporohi kan daga.”—Gibo 13:47.
[Mga Ritrato sa pahina 3]
Kingdom Hall Moscow, Rusya
[Mga Ritrato sa pahina 4-6]
Bagong mga Kingdom Hall sa Europa Oriental
Strumica, Macedonia
Daruvar, Croatia
Bitola, Macedonia
Sokal, Distrito nin Lviv, Ucrania
Plovdiv, Bulgaria
Krasnooktyabrskiy, Maykop Area, Russia
Bački Petrovac, Yugoslavia
Plovdiv, Bulgaria
Tlumach, Distrito nin Ivano-Frankivsk, Ucrania
Rava-Ruska, Distrito nin Lviv, Ucrania
Stara Pazova, Yugoslavia
Zenica, Bosnia asin Herzegovina
Sokal, Distrito nin Lviv, Ucrania
Zhydachiv, Distrito nin Lviv, Ucrania