Isolog Nindo an Kapakumbabaan
1 An sarong solteritong pastor nagtiwala ki Jehova asin nadaog an sarong makosog na parapakilaban. (1 Sam. 17:45-47) An sarong tawong mayaman mapasensiang tinagalan an kalamidad. (Job 1:20-22; 2:9, 10) An Aki nin Dios itinao sa saiyang Ama an gabos na kredito sa pagtotokdo nia. (Juan 7:15-18; 8:28) Sa kada saro sa mga halimbawang ini, an kapakumbabaan nagkaigwa nin importanteng marhay na kabtang. Siring man ngonyan, mahalagang marhay an kapakumbabaan sa mga situwasyon na inaatubang niato.—Col. 3:12.
2 Kun Naghuhulit: Bilang Kristianong mga ministro, mapakumbaba niatong ihinihiras an maogmang bareta sa gabos na klase nin tawo, na dai sinda hinuhusgaran na tolos huli sa saindang rasa, kultura, o pinaghalean. (1 Cor. 9:22, 23) Kun an nagkapira daing modo o may pagkaaroganteng hinahaboan an mensahe kan Kahadean, dai kita nagbabalos sa kaagid na paagi kundi padagos na naghahanap kan mga maninigo. (Mat. 10:11, 14) Imbes na pagmaigotan na pahangaon an iba huli sa satong kaaraman o edukasyon, dinadara niato an atension sa Tataramon nin Dios, na rinerekonoser na iyan mas nakabebensir kisa ano man na puedeng sabihon niato. (1 Cor. 2:1-5; Heb. 4:12) Bilang pag-arog ki Jesus, itinatao niato an gabos na kaomawan ki Jehova.—Mar. 10:17, 18.
3 Sa Kongregasyon: An mga Kristiano dapat man na ‘hagkosan an saindang sadiri nin kababaan nin pag-isip sa lambang saro.’ (1 Ped. 5:5) Kun ibinibilang niato an iba na nakalalabi sa sato, mahanap kita nin mga paagi na mapaglingkodan an satong mga tugang imbes na sinda an laoman na maglingkod sa sato. (Juan 13:12-17; Fil. 2:3, 4) Dai kita makakamate na kita dai kabilang sa mga gibohon na arog kan paglinig sa Kingdom Hall.
4 Makakatabang sa sato an kapakumbabaan na ‘magpatiriostiosan sa pagkamoot’ asin sa siring pinalalakop an katoninongan asin pagkasararo sa kongregasyon. (Efe. 4:1-3) Nakakatabang iyan sa sato na magpasakop sa mga ninombrahan na mangenot. (Heb. 13:17) Minomotibar kita kaiyan na umako nin ano man na hatol o disiplina na tibaad itao sa sato. (Sal. 141:5) Asin pinahihiro kita nin kapakumbabaan na magsarig ki Jehova kun inaasikaso niato an ano man na mga pribilehio na puedeng akoon niato sa kongregasyon. (1 Ped. 4:11) Siring ki David, rinerekonoser niato na an kapangganahan depende bakong sa abilidad nin tawo kundi sa bendisyon nin Dios.—1 Sam. 17:37.
5 Sa Atubangan kan Satong Dios: Orog sa gabos, kaipuhan niatong ‘magpakumbaba kan satong sadiri sa irarom kan poderosong kamot nin Dios.’ (1 Ped. 5:6) Kun dapat na atubangon niato an masakit na mga sirkonstansia, puede niatong himuyawoton an pakaginhawa na itatao kan Kahadean. Alagad mapakumbaba kitang nagpapasensia, na naghahalat na ootobon ni Jehova an saiyang mga panuga sa saiyang itinalaan na panahon. (Sant. 5:7-11) Kapareho ni Job na nagdanay na may integridad, an pangenot para sa sato iyo na “padagos logod na pag-omawon an ngaran ni Jehova.”—Job 1:21.
6 Si propeta Daniel ‘nagpakumbaba kan saiyang sadiri sa atubangan kan saiyang Dios’ asin pinahelingan nin pabor ni Jehova saka tinawan nin dakol na marahayon na pribilehio. (Dan. 10:11, 12) Logod na kita man magsolog sa satong sadiri nin kapakumbabaan, sa pakaaram na “an bunga nin kapakumbabaan asin pagkatakot ki Jehova kayamanan asin kamurawayan patin buhay.”—Tal. 22:4.