Pagkultibar nin Kadayupotan ki Jehova
1. Ano an narealisar nin sarong tugang na babae manongod sa saiyang espirituwal na rutina?
1 “Ako nasa katotoohan sa laog nin nakaaging 20 taon o labi pa paagi sa basta sana pag-atender sa mga pagtiripon asin pakikikabtang sa ministeryo sa langtad,” an pag-admitir nin sarong tugang na Kristiana. Minsan siring, an sabi pa nia: “Nakapagkonklusyon ako na minsan ngani importante an mga bagay na ini, dai ako kayang susteniran kan mga iyan sana kun magin depisil na an mga kamugtakan. . . . Narealisar ko ngonyan na kaipuhan kong pakarhayon giraray an sakong kaisipan asin ponan an sarong makahulogan na programa nin pag-adal tanganing mamidbid ko talaga si Jehova asin mamotan sia saka maapresyar an itinao sa sato kan saiyang Aki.”
2. Taano ta importanteng kultibaron an kadayupotan ki Jehova?
2 An pagpatalubo nin dayupot na personal na relasyon ki Jehova nagkakaipo nin paghihingoa. Iyan nagkakaipo nin labi pa sa pagsunod sana sa sarong rutina nin Kristianong aktibidad. Kun dai kita regular na nakikikomunikar ki Jehova, pag-abot nin panahon sia puedeng magin siring sa dating dayupot na katood niato na dai na niato nakakaolay. (Kap. 2:4) Siyasaton niato kun paano makakatabang sa sato an personal na pag-adal sa Biblia asin pamibi na kultibaron an kadayupotan ki Jehova.—Sal. 25:14.
3. Anong pamamaagi sa personal na pag-adal an matabang sa sato na rumani sa Dios?
3 Mahalagang Marhay an Pamibi Asin Paghorophorop: Kalabot sa personal na pag-adal na nakakabasog sa puso bako sanang an pagkurit kan pangenot na mga punto sa pinag-aadalan asin paghanap kan sitadong mga teksto. Nangangahulogan iyan na hohorophoropon niato kun ano an ihinahayag kan impormasyon manongod sa mga dalan, pamantayan, asin personalidad ni Jehova. (Ex. 33:13) An pagsabot sa espirituwal na mga bagay nakaaapektar sa satong emosyon asin nakapahihiro sa sato na isip-isipon an manongod sa satong sadiring buhay. (Sal. 119:35, 111) Maninigong gibohon an personal na pag-adal sa katuyohan na rumani ki Jehova. (Sant. 4:8) An seryosong pag-adal nagkakaipo nin panahon saka tamang kamugtakan, asin an regular na pag-adal nagkakaipo nin disiplina. (Dan. 6:10) Dawa kun sibot-sibot an buhay nindo, nagtatagama daw kamo nin oras kada aldaw na maghorophorop sa makangangalas na mga kualidad ni Jehova?—Sal. 119:147, 148; 143:5.
4. Paano nakakatabang sa sato an pamibi may koneksion sa personal na pag-adal na kultibaron an kadayupotan ki Jehova?
4 An odok sa pusong pamibi sarong mahalagang marhay na kabtang nin makahulogan na personal na pag-adal. Kaipuhan niato an banal na espiritu nin Dios tangani na mapukaw an satong puso asin mapahiro kita kan mga katotoohan sa Biblia na ‘magtao sa Dios nin sagradong paglilingkod na may diosnon na takot asin may pagkangirhat na paggalang.’ (Heb. 12:28) Kun siring, maninigo na ponan niato an kada panahon nin pag-adal sa pag-arang ki Jehova para sa saiyang espiritu. (Mat. 5:3) Mantang pinepensar niato an Kasuratan asin ginagamit an mga pantabang sa pag-adal na itinao kan organisasyon ni Jehova, binubuksan niato an satong puso ki Jehova. (Sal. 62:8) An pag-adal sa paaging ini sarong akto nin pagsamba na paagi kaiyan ipinahahayag niato an satong debosyon ki Jehova asin pinakokosog niato an satong pagkamuya sa saiya.—Jud. 20, 21.
5. Taano ta importante na kita maghorophorop sa Tataramon nin Dios kada aldaw?
5 Arog kan gabos na relasyon, an satong relasyon ki Jehova dapat na padagos na pataluboon tanganing padagos man iyan na magtalubo sa bilog niatong buhay. Kun siring, logod na tuboson niato an panahon kada aldaw tangani na rumani sa Dios, sa pakaaram na sia man marani sa sato.—Sal. 1:2, 3; Efe. 5:15, 16.