An Nakalalabi sa Halaga na Kadonongan nin Dios
1 May mga naghohona na maninigo na mas direktang ikonsentrar kan Mga Saksi ni Jehova an saindang mga paghihingoa sa pagtabang na mainaan an mga problema na inaatubang nin katawohan ngonyan. An siring na mga tawo dai naheheling an nakalalabing halaga kan satong pagtotokdo sa Biblia. Arog iyan kan isinurat ni apostol Pablo: “An tataramon dapit sa hariging pasakitan karungawan sa mga mapapara, alagad sa sato na mga iliniligtas iyan kapangyarihan nin Dios.” (1 Cor. 1:18) Tunay nanggad, aram niato na an Kristianong ministeryo iyo an pinakaimportanteng gibohon sa daga ngonyan.
2 Sarong Marahay na Buhay Ngonyan: An mga paghihingoa nin tawo na resolberan an mga problema nin katawohan nagkaigwa nin limitadong marhay na mga resulta. An paggibo nin mga ley dai nakapaontok sa pagdakol nin krimen. An mga tratado sa katoninongan asin mga soldados para sa pagpapadanay nin katoninongan dai nakapapondo sa guerra. An mga programa sa sosyedad nasudya na haleon an kadukhaan. (Sal. 146:3, 4; Jer. 8:9) Al kontraryo, an mensahe kan Kahadean nakaliwat sa buhay nin minilyon paagi sa pagtabang sa sainda na magsolog nin bagong personalidad na inaako nin Dios. (Roma 12:2; Col. 3:9, 10) Sa paggibo kaiyan, nagkakamit sinda ngonyan mismo nin mas marahay na kualidad nin buhay.—1 Tim. 4:8.
3 Sarong Marahay na Ngapit: Apuera sa pagtabang sa sato na mapangganahan an presenteng mga problema sa buhay, pinangyayari kita kan kadonongan nin Dios na magplano nin epektibo para sa ngapit. (Sal. 119:105) Ilinilikay kita kaiyan sa daing pakinabang na paghihingoa na repormaron an presenteng sistema nin mga bagay. (Ecl. 1:15; Roma 8:20) Kanigoan an pasasalamat niato na dai niato sinasayang an satong buhay sa pag-aabot nin mga pasohan na imahinasyon sana! Imbes, isinesentro niato an satong mga paghihingoa sa seguradong panuga ni Jehova na “bagong kalangitan asin sarong bagong daga” na dian magdadanay an katanosan. Kun umabot na an aldaw nin paghokom ni Jehova, magigin malinaw na marhay na an mga nagsarig sa kadonongan nin Dios ginibo an tamang pagpili.—2 Ped. 3:10-13; Sal. 37:34.
4 Dawa ngani an kadonongan nin Dios tibaad garo baga bakong praktikal para sa mga bangkag na marhay sa “kadonongan kan sistemang ini nin mga bagay,” an totoo iyan sana an praktikal na dalan na dapat na sunodon. (1 Cor. 1:21; 2:6-8) Huli kaini, padagos niatong ibinabalangibog sa bilog na daga an mensahe na naggigikan sa Dios, na “iyo sana an madonong.”—Roma 16:27.