Pag-atender nin Regular sa mga Pagtiripon—Sarong Prioridad
1 Prioridad nin Kristianong mga pamilya an pag-atender nin regular sa mga pagtiripon kan kongregasyon. Alagad an mga pangangaipo sa buhay ngonyan puedeng magtao nin problema. An mga obligasyon daw sa pamilya, sekular na trabaho, o mga leksion sa eskuelahan nagpopoon nang agawon an panahon na itinagama para sa pagsamba ki Jehova? An pagmansay sa mga bagay sa punto de vista ni Jehova makakatabang sa sato na papagdanayon an satong mga prioridad.—1 Sam. 24:6; 26:11.
2 An sarong Israelitang lalaki tuyong dai kinonsiderar an punto de vista ni Jehova paagi sa pagtipon nin mga kahoy sa Sabbath. Tibaad nagrason sia na sia an nagsusustento sa saiyang pamilya o na iyan sadit sanang bagay. Minsan siring, paagi sa ipinaabot na paghokom, ipinaheling ni Jehova na seryosong bagay an paggibo nin kinabanon na mga aktibidad durante kan mga panahon na itinagama para sa pagsamba.—Bil. 15:32-36.
3 Pag-atubang sa Problema: Para sa dakol masakit na papagdanayon na dai nakakaolang an sekular na trabaho sa pag-atender sa mga pagtiripon. An iba inatubang an problemang ini paagi sa pakikipag-olay sa saindang among, pakikirelyibo sa mga katrabaho, paghanap nin mas angay na trabaho, o pagpasimple kan saindang estilo nin pamumuhay. Segurado na nakakapaogmang marhay sa Dios an siring na mga pagsakripisyo sa kapakanan kan tunay na pagsamba.—Heb. 13:16.
4 An mga leksion sa eskuelahan puede man na magtao nin problema. “Ginigibo ko an nagkapira sa sakong leksion sa eskuelahan bago an mga pagtiripon asin an natada pagkapuli ko,” an sabi nin sarong hoben. Kun dai matatapos an gabos na asignadong leksion sa eskuelahan sa mga banggi nin pagtiripon, may mga magurang na ipinapaliwanag sa mga paratokdo na prioridad para sa saindang pamilya an pag-atender sa Kristianong mga pagtiripon.
5 An kooperasyon asin maingat na pagpaplano bilang pamilya importanteng marhay sa pagtapos kan mga gibohon sa harong bilang preparasyon sa pag-atender sa mga pagtiripon na nasa oras. (Tal. 20:18) Dawa an saradit na aki puedeng tokdoan na magbulos asin mag-andam sa pagduman sa mga pagtiripon sa espesipikong oras. Paagi sa halimbawa ninda, ikakatadom nin mga magurang sa saindang mga aki an importansia nin mga pagtiripon.—Tal. 20:7.
6 Mantang nag-oorog an pangigipit kan presenteng sistema nin mga bagay, mahalagang marhay na kita umatender nin regular sa mga pagtiripon kan kongregasyon. Logod na padagos niatong mansayon an mga bagay sa punto de vista ni Jehova asin magin prioridad an pag-atender nin regular sa mga pagtiripon.—Heb. 10:24, 25.