Espirituwal na Kakanon sa Tamang Panahon
1. Paano naootob ngonyan an Ezequiel 36:29?
1 “Aapodon ko an trigo asin papadakolon ko iyan, asin dai ko kamo tatawan nin gutom,” an sabi kan Soberanong Kagurangnan na si Jehova. (Ezeq. 36:29) An makahulang mga tataramon na iyan aplikado sa banwaan nin Dios ngonyan. Sa piguratibong pagtaram, pinapangyari ni Jehova na tumubo nin abunda an nagtatao nin buhay na trigo para sa saiyang banwaan. An napapanahon na espirituwal na kakanon na itinatao paagi sa satong mga pandistritong kombension malinaw na nag-iilustrar kan bagay na ini.
2. Paano ginamit ni Jehova an mga pandistritong kombension sa pagtao nin espirituwal na kakanon sa tamang panahon?
2 Sa kombension na ginibo sa Columbus, Ohio, kan 1931, dinirehiran ni Jehova an saiyang mga parasamba na akoon an sarong bagong ngaran—Mga Saksi ni Jehova. (Isa. 43:10-12) Kan 1935 ipinamidbid nin tama an dakulang kadaklan kan Kapahayagan 7:9-17. Kan 1942, itinao ni Tugang na Knorr an diskursong “Katoninongan—Makakapagpadagos daw Iyan?” An pahayag na iyan nag-engganyar sa panglobong paghuhulit asin nagresulta sa pagkaorganisar kan Paadalan sa Biblia kan Watchtower sa Gilead. Minsan ngani espesyalmenteng dai malilingawan an nagkapirang kombension, an kada saro nagin siring sa abundang lamesa nin masustansiang espirituwal na kakanon na itinao sa tamang panahon.—Sal. 23:5; Mat. 24:45.
3. Ano an dapat niatong gibohon tanganing makinabang sa espirituwal na bangkete sa satong pandistritong kombension?
3 Nagkakakan daw Kamo Tanganing Mabasog? Posible kitang magkaigwa nin dakol na kakanon alagad ta kulang pa man giraray sa sustansia kun dai kita maghihingoang kumakan. (Tal. 26:15) Totoo man iyan sa espirituwal na kahulogan. Sa pirang kombension, naobserbaran na dakol an nagpaparalakawlakaw na dai man kaipuhan o nakikipag-estoryahan sa iba durante kan programa. Minsan ngani sarong mahalagang aspekto kan kombension an nakakaparigon na asosasyon, an panahon para digdi bago asin pagkatapos kan kada sesyon. (Ecl. 3:1, 7) Kun mayo kita sa satong tukawan na nagtatao nin maingat na atension, tibaad may malipasan kitang mahalagang marhay na punto. Kun minsan tibaad kaipuhan na mag-orolay an mga paraataman sa mga departamento kan kombension asin an mga tugang na may asignasyon manongod sa mga bagay-bagay kan kombension mientras na may sesyon. Kun dai man kaipuhan, maninigo sindang magtao nin halimbawa paagi sa saindang pagigin mapaghimate sa programa. Dai niato maninigong malipasan an ano man na itinataong espirituwal na kakanon.—1 Cor. 10:12; Fil. 2:12.
4. Paano niato ikakapaheling na kita nagpapasalamat sa abundang espirituwal na kakanon na itinatao ni Jehova?
4 Kanigoan an kagayagayahan niato sa abundang espirituwal na mga katotoohan na itinatao ni Jehova, na laen na marhay sa mayong sustansiang falsong mga doktrina nin Kakristianohan! (Isa. 65:13, 14) An sarong paagi na ‘ikakapaheling niato na kita nagpapasalamat’ iyo an pagmansay sa kombension bilang oportunidad na tokdoan ni Jehova. (Col. 3:15) Magkonsentrar sa mensahe bakong sa tugang na nagpapahayag, asin mansayon an mensahe na hale sa satong “Kaharohalangkaweng Paratokdo.” (Isa. 30:20, 21; 54:13) Magtao nin wilingwili na atension. Kumua nin haralipot na nota kan pangenot na mga punto. Repasohon kada banggi an mga tampok na kabtang kan programa. Iaplikar an nanodan nindo.
5. Anong mga dahelan sa paggayagaya an itinatao sa sato kan mga pandistritong kombension?
5 An gabos na kombension bago an Armagedon, baga man iyan ginibo sa kampo nin mga dulag, sa nasyon na nababanga huli sa guerra, o sa mas dakula asin mas matoninong na kamugtakan, iyan kapangganahan tumang ki Satanas! Bilang nagkakasararong kasararoan nin magturugang, mahal niato an mga oportunidad niato na magburunyog sa mga pandistritong kombension. (Ezeq. 36:38) Nananarig kita na sa giraray mamomoton na itatao sa sato ni Jehova an “kakanon sa tamang panahon.”—Luc. 12:42.
[Kahon sa pahina 4]
Magpaheling nin Apresasyon sa Lamesa ni Jehova
◼ Magtao nin maingat na atension
◼ Kumua nin nota kan pangenot na mga punto
◼ Repasohon kada banggi an mga tampok na kabtang kan programa
◼ Iaplikar an nanodan nindo