‘Humiwas Kamo’
1. Ano an paninimbagan kan lambang saro sa sato?
1 Sa Kristianong kasararoan nin magturugang, an lambang saro sa sato igwa nin paninimbagan na magkontribwir sa init kan kongregasyon. (1 Ped. 1:22; 2:17) Nagkakaigwa nin siring na init kun kita ‘minahiwas’ sa satong mamomoton na kapadangatan sa lambang saro. (2 Cor. 6:12, 13) Taano ta mahalaga na mamidbid tang marhay an satong mga tugang na lalaki asin babae?
2. Taano ta mahalaga na pataluboon an pakikikatood sa mga kapagtubod?
2 An mga Pagkakatood Orog na Nagkokosog: Mantang orog niatong namimidbid an mga kapagtubod, mas lubos niatong pinapahalagahan an saindang pagtubod, pakatagal, asin iba pang marahayon na kualidad. Garo baga bako nang gayong mahalaga an mga pagkukulang ninda sa sato, asin nagtatalubo an pagkakatood. Huling midbid na marhay an lambang saro, mas andam kitang magparinigonan asin magparangaranga. (1 Tes. 5:11) Kita puedeng magin “tabang na nagpapakosog” sa lambang saro tangani na malabanan an nakakaraot na mga impluwensia kan kinaban ni Satanas. (Col. 4:11) Huli sa masakit na huring mga aldaw na ini, nagpapasalamat nanggad kita na magkaigwa nin marahay na mga katood sa banwaan ni Jehova!—Tal. 18:24.
3. Paano kita puedeng magin tabang na nagpapakosog sa iba?
3 An dayupot na mga katood puedeng magin espesyal na gikanan nin kosog asin karangahan kun kita napapaatubang sa grabeng mga pagbalo. (Tal. 17:17) Nagigirumdoman nin sarong Kristiana na nakikipaglaban sa pagmate nin kadaihan nin kamanungdanan: “May mga katood na nagtataram sa sako nin positibong mga bagay manongod sa sako tanganing tabangan ako na daogon an sakong negatibong mga kaisipan.” An siring na mga katood bendisyon hale ki Jehova.—Tal. 27:9.
4. Paano niato orog na mamimidbid an iba sa kongregasyon?
4 Magpaheling nin Interes sa Iba: Paano kita puedeng humiwas sa satong mamomoton na kapadangatan sa mga kapagtubod? Dugang pa sa pagtaratara sa iba sa Kristianong mga pagtiripon, hingoahon na makipag-olay sa sainda sa makahulogan na paagi. Magpaheling nin personal na interes na dai man nagpaparahapot manongod sa pribadong buhay ninda. (Fil. 2:4; 1 Ped. 4:15) An saro pang paagi na makakapaheling nin interes sa iba iyo an pag-imbitar sa sainda sa sarong pagkakan. (Luc. 14:12-14) O puede nindong iareglo na umiba sa sainda sa ministeryo sa langtad. (Luc. 10:1) Mantang naghahanap kita nin mga paagi na orog na mamidbid an satong mga tugang, pinapakosog niato an pagkasararo sa kongregasyon.—Col. 3:14.
5. Ano an sarong paagi na mapahiwas an satong mga pakikikatood?
5 May tendensia daw kitang pumili nin dayupot na mga kaibaiba niato solamente sa mga kaedad niato o sa mga kapareho niato an intereses? Dai niato maninigong togotan an siring na mga dahelan na limitaran an mga pagkakatood na kinukultibar niato sa laog nin kongregasyon. Si David asin Jonatan siring man si Rut asin Noemi nakapatalubo nin makosog na pagkakatood sa ibong nin mga pagkakalaen sa edad asin pinaghalean. (Rut 4:15; 1 Sam. 18:1) Puede daw nindong pahiwason an saindong mga pakikikatood? An paggibo kaiyan puedeng magbunga nin dai linalaoman na mga bendisyon.
6. Ano an nagkapirang pakinabang sa pagpahiwas kan satong mamomoton na kapadangatan sa satong mga tugang?
6 Paagi sa pagpahiwas kan satong mamomoton na kapadangatan sa iba, nagpapakinosogkosogan kita asin pinapalakop niato an katoninongan sa kongregasyon. Apuera kaiyan, binebendisyonan kita ni Jehova mismo huli sa pagkamoot na ipinapaheling niato sa satong mga tugang. (Sal. 41:1, 2; Heb. 6:10) Taano ta dai nindo gibohon na pasohan nindo na orog na mamidbid an pinakadakol na mapupuede?