Kun Paano Maghuhulit sa Komersial na Teritoryo
1. Ano an nagkapirang bentaha nin paghuhulit sa komersial na teritoryo?
1 Gusto daw nindong maghulit sa teritoryo na an mga tawo sa pankagabsan maogmang inaako an mga bisita asin sa parate igwa nin mga tawo? Puede nindong gibohon iyan sa mismong teritoryo kan kongregasyon nindo. Paano? Paagi sa pagdalaw sa mga tindahan na yaon dian. An mga parahayag na naghuhulit sa mga tindahan sa parate nagkakamit nin mararahay na resulta.
2. Paano puedeng organisaron an paghuhulit sa komersial na lugar?
2 May mga kongregasyon na igwa nin komersial na mga teritoryo na kabtang kan saindang asignadong teritoryo. An tugang na nag-aasikaso kan teritoryo puedeng gumibo nin espesyal na mga kard nin mapa kan surusuan na marhay na komersial na mga lugar na ini. An ano man na residensial na territory map cards na may kaibang mga tindahan maninigo na malinaw na mag-indikar na an mga tindahan dai huhulitan bilang kabtang kan residensial na teritoryo. Sa ibang teritoryo, puedeng sabay na hulitan an mga tindahan asin residensial na mga harong. Kun kamo dai pa noarin man nakapaghulit sa komersial na lugar, ponan nindo paagi sa pagprobar sa nagkapirang mas saradit na tindahan.
3. Ano an makakatabang sa sato na magin epektibo kun naghuhulit sa mga tindahan?
3 Gumamit nin Simpleng Pagdolok: Kun naghuhulit sa mga tindahan, mahalaga na kamo maggubing na siring man sana kun kamo nasa pagtiripon sa Kingdom Hall. Tama man na pumili nin oras na bakong sibot an tindahan. Kun posible, lumaog kamo kun mayo nin mga parokyano na naghahalat na asikasohon. Sabihon na gusto nindong makaolay an manedyer o an namamahala. Magin madali sana asin direkta sa punto. Ano an puede nindong sabihon?
4-6. Ano an puede niatong sabihon kun naghuhulit sa sarong tindero o manedyer?
4 Kun nakikipag-olay sa sarong tindero o manedyer, puede nindong sabihon an arog kaini: “An mga negosyante sibot na marhay an iskedyul kaya bihira mi na sindang manompongan sa harong, kaya dinadalaw mi kamo sa pinagtatrabawohan nindo. Ipinapaliwanag kan samong mga magasin an manongod sa presenteng mga pangyayari sa bilog na kinaban.” Dangan itampok an sarong halipot na punto hale sa sarong magasin.
5 O puede nindong probaran an simpleng pagdolok na ini: “Dakol an gustong makaaram pa nin orog manongod sa Biblia alagad kakadikit an panahon ninda. Ipinapaliwanag kan pulyetong ini an daing bayad na programa nin pag-adal na makakatabang sa saindo na manompongan an simbag sa saindong mga hapot sa Biblia.” Dangan itokdo an pahina 4-5 kan pulyetong Ano Gusto Nindong Makaaram Pa nin Orog Manongod sa Biblia?
6 Kun garo baga sibot an namamahala, tibaad puede na sana kamong mag-alok nin sarong pulyeto asin magsabi: “Mahapit giraray ako kun bako na kamong sibot na marhay. Gusto kong maaraman kun ano an saboot nindo sa pulyetong ini.”
7. Paano niato makukultibar an interes na nanonompongan niato sa komersial na teritoryo?
7 Pagkultibar kan Ipinaheling na Interes: Puede pa ngani kamong magkondukta nin pag-adal sa Biblia sa komersial na teritoryo. An sarong espesyal payunir regular na naghahatod nin mga magasin sa sarong negosyante. Kan an lalaki magpahayag nin apresasyon sa saiyang binabasa, ipinaheling kan payunir an areglo sa pag-adal kan Biblia, na ginagamit an brosyur na Kahagadan. Naestablisar an sarong pag-adal duman mismo sa lugar nin trabaho kan lalaki. Bilang konsiderasyon sa mga kamugtakan, linimitaran sana iyan kan payunir sa laog nin 10 o 15 minutos kada pagduman. Kaagid kaiyan, logod na padagos man niatong hanapon an mga maninigo paagi sa paghuhulit sa komersial na teritoryo.