Pag-aatubang kan Maogmang Bareta—Paagi sa Mapusong Pagpatotoo sa Komersial na Teritoryo
1 Kaipuhan an kapusoan sa pag-aatubang kan maogmang bareta. Espesyalmenteng totoo ini sa komersial na teritoryo. An nagkapirang parahayag nagduduwaduwa na maghulit sa komersial na teritoryo. Alagad tibaad ini huli sa kakulangan nin eksperyensia. O tibaad igwa nin pangangaipo na ‘magmapuso.’—1 Tes. 2:2.
2 Sarong paraataman nin sirkito an nagreport na sa siyam na aga nin paghuhulit sa komersial na teritoryo, igwa nin total na 177 libro an ikinawaras. Orog pa kutana an ikinawaras, alagad naubos na an suplay. Kamo man tibaad magkaigwa nin kapangganahan kun magmaigot kamo na makikabtang sa paghuhulit sa komersial na teritoryo.
PAGDANAYON AN POSITIBONG KAISIPAN
3 An pagigin mapanggana parateng depende sa satong kaisipan. An nagkapirang parahayag tibaad nakamamate na masakit na gayo an magpatotoo sa mga tindera. Sarong parahayag an nagsabi: “Linalaoman kong magigin negatibo an reaksion. Alagad, sa sakong pagngalas, an mismong kabaliktaran an reaksion sa mensahe kan Kahadean. Tunay sindang magalang asin makikatood asin haros perming nag-aako nin mga magasin.” Iyo, idtong mga naghuhulit sa komersial na teritoryo nakanonompong na ini mabungang gibohon na nagdadara nin mga bendisyon.
4 An kamagurangan, espesyalmente an paraataman sa paglilingkod, an maninigong mangenot. Tibaad magin kapakipakinabang na mag-andam nin espesyal na mga mapa kan teritoryo nin komersial na mga lugar. Sa ibang lugar, an komersial na mga lugar puwedeng hulitan kairiba kan residensial na teritoryo. Siertohon na dai malaktawan an mga tindahan, opisina, pabrika, asin iba pa. Tibaad maheling na angay kan kamagurangan na pumili nin kuwalipikadong mga parahayag na maghulit sa komersial na teritoryo.
5 Idtong mga nakikikabtang sa gibohon na ini maninigong maggubing nin malinig asin magmaigot na magin halipot asin direkta sa punto kun nakikipag-olay sa mga negosyante. An mga presentasyon na dai malihis sa sarong minuto o labi an pinakaangay. An pagpipili nin mga aldaw asin panahon na bakong gayong sibot mahalaga sa pagkaigwa nin mas marahay na mga resulta. Nanompongan nin nagkapira na angay an amay kun Sabadong aga, mantang an iba minasongkong amay kun simpleng mga aldaw kan semana na bako pang gayong matawo an mga tindahan.
KUN ANO AN PUWEDE NIATONG SABIHON
6 Kun naghuhulit sa komersial na teritoryo, puwede niatong itampok an mga magasin, an presenteng alok, o mga tract. Kun nag-aalok nin mga magasin puwede niatong sabihon: “Mantang parateng masakit manompongan an mga negosyante sa harong, pinagmaigotan niamong makaolay kamo ngonyan. Sa pinakabagong isyu kan An Torrengbantayan, igwa nin artikulo na may titulo [sabihon an titulo] na naglalaman nin impormasyon na personal na nakaaapektar sa saindo. Namamatean niamo na maggagayagaya kamo sa pagbasa kan artikulong ini siring man an iba. Inaalok niamo an An Torrengbantayan kairiba an Magmata! para sa kontribusyon na ₱5.00 sana.”
7 Sa bulan na ini nag-aalok kita nin mga suskripsion sa Awake!, asin manonompongan kan dakol na negosyante na makatatabang asin edukasyonal na magsuskribe. Puwede nindong sabihon: “Bilang sarong negosyante kaipuhan na aram nindo an presenteng mga pangyayari sa bilog na kinaban, asin an Awake! puwedeng makatabang saindo na gibohon ini. Bilang halimbawa, sa isyu kan Oktubre 8, mangnohon kun ano an sinasabi kaini manongod sa mga resulta kan guerra. Nagpapaheling ini na an Dios sana an igwa nin solusyon sa problema nin katoninongan asin seguridad asin madatong ini sa dai na mahahaloy. Lambang bulan duwang isyu kan Awake! an ipinupublikar na may manlaenlaen na artikulo asin puwede kamong magsuskribe para sa sarong taon sa kontribusyon na ₱60.00 sana.”
8 Igwa nin mahalagang pangangaipo para sa pagkapulido sa satong gibohon na pagpatotoo tanganing magligtas nin mga buhay. (Gibo 20:24) Mantang parateng masakit na manompongan an mga negosyante sa harong, maninigo kitang makipag-olay sa sainda sa saindang lugar nin negosyo. Minsan siring na an gibohon na ini tibaad magin mapan-angat, puwede kitang magin mapanggana kun kita ‘magmapuso sa pagtaram kan maogmang bareta nin Dios.’