Dapat Niatong Igalang an Autoridad ni Jehova
Sa ano nindo ikokonektar an suanoy na ngaran na Core, Datan, asin Abiram? Rebelyon! Tumang sa ano? Sa itinalaga nin Dios na autoridad. An mga detalye kan saindang makaturotristeng iginawe nakarekord sa Bilang kapitulo 16, asin an sumaryo kaiyan yaon sa artikulong “Maimbod na Magpasakop sa Itinalaga nin Dios na Autoridad” sa Torrengbantayan na Agosto 1, 2002. Manonompongan nindo na kapakipakinabang na basahon ini dangan dalanon an nakakapapensar na paglaladawan kaiyan sa video na Respect Jehovah’s Authority. Maheheling nindo an pagkakakontrahan kan maimbod na mga aki ni Core asin kan saindang rebeldeng ama, na suminarongat sa Soberano kan uniberso. (Bil. 26:9-11) An totoong nangyari sa buhay na dramang ini maninigong mag-inspirar sa sato gabos na pataluboon nin mas lubos pa an satong kaimbodan ki Jehova.
Mantang dinadalan nindo an video, hanapon an ebidensia na si Core asin an saiyang mga kapwa rebelde dai nakapasar sa pagbalo sa kaimbodan sa anom na importanteng bagay: (1) Paano ninda dai iginalang an itinalaga nin Dios na autoridad? (2) Paano ninda tinogotan na maapektaran sinda kan kapalangkawan, ambisyon, asin pag-imon? (3) Paano sinda nagkonsentrar sa mga pagkukulang kan mga ninombrahan ni Jehova? (4) Nagkaigwa sinda nin anong mapagreklamong aktitud? (5) Taano ta nadeskontento sinda sa saindang mga pribilehio nin paglilingkod? (6) Paano ninda ipinaorog an kaimbodan sa mga katood asin kapamilya kisa kaimbodan sa Dios?
Estudyare nindo kun paano an mga leksion na nanodan sa dramang ini sa Biblia aplikado sa satong personal na pagmansay manongod sa itinalaga nin Dios na autoridad ngonyan: (1) Ano an maninigo niatong magin reaksion sa mga desisyon nin kamagurangan sa kongregasyon, asin taano? (2) Paano niato mapaglalabanan an ano man na salang motibo na boot niato? (3) Ano an maninigo niatong magin reaksion sa mga pagkabakong sangkap kan mga ninombrahan na mangenot? (4) Ano an maninigo niatong gibohon kun pumoon na tumalubo sa satong puso an mapagreklamong espiritu? (5) Ano an maninigo niatong magin saboot manongod sa ano man na mga pribilehio na itinao sa sato? (6) Siisay an dai noarin man maninigong ipaorog kisa satong kaimbodan sa Dios, asin noarin ini puedeng magin depisil na pagbalo para sa sato?