Pataluboon an Abilidad sa Pangangatanosan sa Iba

1. Anong pagkasaysay sa Biblia an sisiyasaton niato, asin taano?

¹ An diskurso ni apostol Pablo sa sarong sinagoga sa Antioquia sa Pisidia, na nakarekord sa Gibo 13:16-41, nagtatao nin marahayon na halimbawa kun paano mangangatanosan sa iba. Kinonsiderar ni Pablo an pinaghalean asin kaisipan kan mga naghihinanyog sa saiya patin ibinagay oyon dian an pag-atubang nia kan maogmang bareta. Mantang sinisiyasat niato an pagkasaysay na ini, estudyaran niato kun paano man niato iyan magigibo sa satong ministeryo.

2. Ano an manonodan niato sa paagi kan pagpoon ni Pablo sa diskurso nia?

² Humanap nin Puntong Pinagkakaoyonan: Minsan ngani nakasentro an mensahe ni Pablo sa importanteng marhay na papel ni Jesus sa pag-otob kan katuyohan nin Dios, dai pinonan ni Pablo an diskurso nia paagi sa pagsabi kan puntong iyan. Imbes, sia nagtaram manongod sa sarong bagay na pinagkakaoyonan ninda kan mga nagdadangog sa saiya na kadaklan Judio—⁠an kasaysayan kan mga Judio. (Gibo 13:16-22) Sa siring man na paagi, kita magigin mas epektibo sa paghuhulit sa iba kun mahanap kita nin puntong pareho niato pinagkakaoyonan. Ini tibaad mangaipo na enganyaron niato sindang magtaram paagi sa mataktikang mga hapot asin maghinanyog kita nin maingat tanganing marisa niato kun ano talaga an importante para sa sainda.

3. Ano an nagpagin depisil para sa mga naghihinanyog ki Pablo na tumubod na si Jesus an ipinanugang Mesiyas?

³ Sa pagtokar kan kasaysayan kan mga Judio, ipinagirumdom ni Pablo sa mga naghihinanyog sa saiya an panuga nin Dios na magpaluwas nin sarong Paraligtas hale sa linahe ni David. Minsan siring, dakol na Judio an naghahalat nin sarong eroe sa militar na mapatalingkas sa sainda sa pagdominar kan Roma asin ilalangkaw an Judiong nasyon sa gabos na iba pang nasyon. Daing duda na aram ninda na si Jesus isinikwal kan Judiong mga namomoon sa relihion sa Jerusalem, ipinadakop sa Romanong mga autoridad, asin ginadan. Paano daw sinda makokombensir ni Pablo na an Sarong ini an ipinanugang Mesiyas?

4. Paano ekspertong nangatanosan si Pablo sa mga Judiong nagdadangog sa saiya?

⁴ Ibagay an Saindong Pamamaagi: Huling aram an kaisipan kan mga naghihinanyog sa saiya, ginamit ni Pablo an Kasuratan tangani na mangatanosan sa sainda basado sa mga bagay na tinubod na ninda. Halimbawa, iinintrodusir nia si Jesus bilang an aki ni David asin an saro na ipinamidbid ni Juan na Bautisador, na minamansay nin dakol bilang sarong propeta nin Dios. (Gibo 13:23-25) Sinabi ni Pablo na sa pagsikwal ki Jesus asin pagkondenar sa saiya na magadan, “inotob [kan mga namomoon sa relihion] an mga bagay na sinabi kan mga Propeta.” (Gibo 13:26-28) Dugang pa, ipinaliwanag nia na may mga nakaheling na si Jesus binuhay na hale sa mga gadan, asin dinara ni Pablo an atension sa pamilyar na mga teksto sa Kasuratan na naotob na sa pagbuhay liwat ki Jesus.—⁠Gibo 13:29-37.

5. (a) Paano ibinagay ni Pablo an saiyang pamamaagi kan nakikipag-olay sa mga Griegong nagdadangog sa saiya? (b) Paano niato maaarog an halimbawa ni Pablo kun naghuhulit sa lokal na teritoryo?

⁵ Sa ibong na kampi, kan kinakaolay an mga Griegong nagdadangog sa saiya sa Areopago sa Atenas, naggamit si Pablo nin laen na pamamaagi. (Gibo 17:22-31) Pero, iinatubang nia an iyo man sanang pundamental na mensahe, asin sa duwang pangyayaring iyan nagbunga an saiyang mga paghihingoa nin mararahay na resulta. (Gibo 13:42, 43; 17:34) Siring man ngonyan, kita magigin mas epektibo sa satong ministeryo kun mahanap kita nin puntong pareho niato pinagkakaoyonan kan mga naghihinanyog sa sato patin kun ibabagay niato an satong pamamaagi oyon sa saindang pinaghalean asin kaisipan.