Ipahayag an Kamurawayan ni Jehova
1 Ipinahayag kan salmista: “Awit kamo ki Jehova, kamo gabos na yaon sa daga. . . . Ipahayag nindo sa mga nasyon an saiyang kamurawayan, sa gabos na banwaan an saiyang makangangalas na mga gibo.” Mantang pinepensar niato kun ano an ginibo, ginigibo, asin gigibohon pa ni Jehova para sa sato, minomotibar kita kan satong puso na ipahayag an saiyang kamurawayan!—Sal. 96:1, 3.
2 Sa Satong Ministeryo: Pribilehiado an Mga Saksi ni Jehova na magdara kan ngaran nin Dios asin omawon iyan nin hayagan sa bilog na daga. (Mal. 1:11) Kanigoan na kalaenan sa klero nin Kakristianohan, na may kapangahasan na hinale an ngaran nin Dios sa saindang mga traduksion kan Biblia! Apretado an gibohon na pagpamidbid kan ngaran nin Dios, huling kaipuhan nin mga tawo na mag-apod sa ngaran na iyan na may pagtubod tanganing maligtas sa nagdadangadang na dakulang kahorasaan. (Roma 10:13-15) Dugang pa, an katoninongan na lakop sa uniberso, kaiba an katoninongan sa tahaw kan mga nag-eerok sa daga, nakadepende sa pagpakangbanal kan ngaran nin Dios. Tunay nanggad, an gabos na gibo nin Dios konektado sa ngaran nia.
3 “Si Jehova dakula asin maninigo nanggad na omawon.” Alagad tanganing an mga tawo ‘mag-atribwir ki Jehova kan kamurawayan na nanonongod sa saiyang ngaran,’ dapat nindang maaraman an katotoohan manongod sa saiya. (Sal. 96:4, 8) Minsan siring, may mga nagnenegar na nag-eeksister an Dios. (Sal. 14:1) An iba mapagpakaraot na nagsasabing sia daing kapangyarihan, o nagsasabi sinda na sia bakong interesado sa mga gibo-gibo nin katawohan. Napapamuraway niato si Jehova mantang tinatabangan niato an mga sadiosan an puso na magkamit nin tamang kaaraman manongod sa satong Kaglalang, sa saiyang mga katuyohan, asin sa saiyang kawiliwiling personalidad.
4 Paagi sa Satong Gawe-Gawe: An pamumuhay na kaoyon kan matanos na mga pamantayan ni Jehova nagtataong onra sa saiya. Naririsa an marahay niatong gawe-gawe. (1 Ped. 2:12) Halimbawa, an satong malinig asin maayos na personal na itsura puedeng makapukaw nin paborableng mga komento hale sa iba, na nagtatao sa sato nin oportunidad na ipakipag-olay an manongod sa mga pakinabang sa pamumuhay na sono sa mga prinsipyo na yaon sa Tataramon nin Dios. (1 Tim. 2:9, 10) Kita naoogmang marhay nanggad kun ‘naheheling kan iba an satong marahay na mga gibo asin nagpapamuraway sa satong Ama na nasa kalangitan’!—Mat. 5:16.
5 Paagi sa tataramon asin gibo, irukyaw niato aroaldaw an satong kahangahangang Dios, na paagi kaiyan kita naghihimate sa magayagayang pangapodan: “Mag-awit kamo ki Jehova, pag-omawon nindo an saiyang ngaran. Sa aroaldaw ibalangibog nindo an maogmang bareta kan saiyang pagliligtas.”—Sal. 96:2.