Paano Kita Makakatabang?
1 Parateng ihinahapot kan mga Saksi ni Jehova an “Paano kita makakatabang?” kun nakakadangog sinda nin sarong kalamidad na nangyari sa sarong parte kan kinaban. Siring kan ipinapaheling kan pagkasaysay sa Gibo 11:27-30, an mga Kristiano kan enot na siglo nagtao nin ayuda sa mga tugang na nag-eerok sa Judea huli sa nangyaring tiggutom.
2 Sa modernong mga panahon, itinogot kan satong organisasyonal na mga carta an paggamit nin kuarta tanganing magtao nin humanitaryong tabang sa mga nagdudusa huli sa natural o gibo nin tawo na mga kalamidad asin sa iba pang panahon nin pangangaipo.
3 Halimbawa, kan nakaaging duwang taon dakol na tugang an nagtao nin pinansial na tabang sa mga apektado kan kalamidad nin tsunami sa Timog Asia, saka kan bagyong Katrina sa timog na Estados Unidos. Pinapasalamatan na marhay an odok sa pusong paghirong ini na ginibo paagi sa pagpadara nin mga donasyon na kuarta sa pondong pan-ayuda kan organisasyon. Minsan siring, kun an mga donasyon espesipikong designado para sa sarong partikular na kalamidad, sarong legal na kahagadan sa nagkapirang nasyon na gamiton an siring na mga pondo solamente para sa katuyohan na espesipikong sinabi kan nagdonar asin sa laog nin sarong talaan na panahon, baga man an mga pangangaipo kan satong mga tugang inaasikaso na sa lokal o dai pa.
4 Iyan an dahelan na irinerekomendar na an mga donasyon para sa humanitaryong tabang asin pag-ayuda itao sa pambilog na kinaban na gibohon. An pondong ini ginagamit para sa mga pagtao nin ayuda saka sa pagpanigo kan espirituwal na mga pangangaipo kan Kristianong kasararoan nin magturugang. Kun, huli sa sarong dahelan, minamawot nin sarong tawo na magtao nin ayudang donasyon na suway sa mga kontribusyon sa pambilog na kinaban na gibohon, iyan aakoon pa man giraray asin gagamiton saen man may pangangaipo para sa pag-ayuda. Minsan siring, mas marahay kun an siring na mga donasyon itinatao na mayo nin mga restriksion sa kun saen asin paano gagamiton an mga pondo.
5 An pagdirekta niato kan mga donasyon sa pangenot sa pambilog na kinaban na gibohon nagpapangyari na mas dakol na pondo an magagamit may koneksion sa gabos na kabtang kan gibohon na pang-Kahadean imbes na itagama sana para sa mga pangangaipo sa pag-ayuda sa ngapit. Ini kaoyon kan tunay na kahulogan kan Efeso 4:16, mantang kita nagtatarabangan tanganing itao kun ano an kaipuhan sa “pagtalubo kan hawak para sa pagkosog mismo kaiyan sa pagkamoot.”