Sarong Paadalan na Nagtatabang sa Sato na Gumibo nin Praktikal na Pag-aplikar
1 Mantang ineestudyaran niato an mga nakalista sa Iskedyul sa Teokratikong Paadalan sa Pagmiministro Para sa 2006, pinagmamaigotan niatong makinabang sa sono sa Kasuratan na mga katokdoan paagi sa pag-aplikar kaiyan sa satong sagradong paglilingkod asin buhay sa aroaldaw. Desidido kitang gibohon an mga bagay na nanonodan niato.—Juan 13:17; Fil. 4:9.
2 Pagkomento: An iskedyul para sa ngonyan na taon nagtatagama nin saro pang minuto sa partisipasyon kan mga nagdadangog sa tampok na mga kabtang kan Biblia. Nangangahulogan ini na an tugang na lalaki na naasignaran na iatubang an tampok na mga kabtang maninigong nakakaaram na kaipuhan na taposon an kabtang nia sa laog nin limang minuto imbes na anom na minuto. An mga magkokomento sa saindang tukawan maninigo man na bantayan an saindang oras. Paagi sa maingat na pagplano antes pa, an saro na magkokomento puedeng makapahayag nin nakakatabang na impormasyon sa laog nin 30 segundo o mas halipot pa. Poko mas o menos sampulong indibiduwal an maninigong makatao nin makahulogan na komento durante kan limang minutong itinagama para sa partisipasyon kan mga nagdadangog.
3 Nagtotokdong mga Pahayag: An tampok na mga kabtang kan Biblia asin an pahayag na nagtotokdo maninigong nakakonsentrar sa kahalagahan kan materyales mantang iyan aplikado sa satong ministeryo asin sa iba pang aspekto kan satong buhay sa aroaldaw. An ispiker maninigo na bako sanang pukawon sa mga naghihinanyog sa saiya an kamawotan na gumibo nin aksion. Maninigo niang isabi nin eksakto kun ano an kaipuhan na aksion, ipaheling kun paano iyan magigibo, asin darahon an atension sa mga pakinabang nin paggibo nin siring na aksion. Puede siang magsabi nin, “Ini an itinataong giya kan tekstong ini para sa sato,” o “Puede niatong magamit an mga bersikulong ini sa ministeryo sa siring kaining paagi.” An kamagurangan asin ministeryal na mga lingkod na nakakarealisar kan lokal na mga kamugtakan maninigong magmaigot na magin espesipiko sagkod sa mapupuede sa paggibo nin praktikal na pag-aplikar kan materyales.
4 An pagsambit nin mga halimbawa sa Biblia partikularmenteng magigin epektibo sa paggibo nin praktikal na pag-aplikar. Pakatapos na sambiton an sarong halimbawa sa Kasuratan, puedeng magsabi an ispiker nin, “Tibaad mamugtak man kamo sa arog kaining situwasyon.” Maninigo niang seguradohon na an ano man na pag-aplikar kan halimbawa sa Biblia kaoyon kan konteksto, kan Biblia sa kabilogan, asin kan ipinublikar kan “maimbod asin mapagmansay na oripon.”—Mat. 24:45.
5 An kadonongan iyo an abilidad na gamiton nin mapanggana an kaaraman asin pakasabot. “An kadonongan iyo an pangenot na bagay.” (Tal. 4:7) Mantang padagos kitang nagkukua nin praktikal na kadonongan paagi sa satong mga pag-adal sa Teokratikong Paadalan sa Pagmiministro, logod na pakarhayon man niato an teknika nin pagpaabot kaiyan sa iba.