Magpaheling nin Personal na Interes—Paagi sa Pagigin Marahay an Boot
1 Minsan ngani si Jehova an Unibersal na Soberano, sia maboot, makonsiderasyon, asin magalang sa saiyang pagtratar sa bakong sangkap na mga tawo. (Gen. 13:14; 19:18-21, 29) Mapapakarhay niato an satong pag-atubang kan maogmang bareta paagi sa pag-arog sa satong marahay an boot na Dios. (Col. 4:6) Kalabot digdi bako sanang an pagigin marahay an ugale asin magalang sa satong pagtaram.
2 Sa Harong-Harong: Paano kun an pagdalaw niato bakong kombenyente para sa kagharong o kun sia sibot-sibot tangani na makipag-olay sa sato? Marahay na rekonoseron niato an siring na mga kamugtakan paagi sa pagpapadanay kan satong pag-atubang na halipot na marhay o paagi sa pagsabi na mabalik na sana kita sa ibang panahon. May kabootan na dai kita nag-iinsistir na akoon kan mga tawo an babasahon kun habo ninda kaiyan. An konsiderasyon sa iba mapahiro man sa sato na magpaheling nin paggalang sa saindang rogaring, arog kan pagsera kan mga trangka asin pinto patin paagi sa pagsasanay sa satong mga aki na gibohon man iyan. Maninigo niatong seguradohon na dai naheheling kan mga nag-aagi an ano man na babasahon na iwinalat niato sa mga harong na mayong tawo. Tunay nanggad, an karahayan nin boot mapahiro sa sato na trataron an iba nin siring sa gusto niatong pagtratar ninda sa sato.—Luc. 6:31.
3 Sa Paghuhulit sa Tinampo: Mantang naghuhulit sa tinampo, makakapaheling kita nin paggalang paagi sa dai pag-olang sa agihan kan mga naglalakaw asin paagi sa dai pagtiripontipon sa atubangan nin mga tindahan. Kita magigin mapagrisa sa mga kamugtakan nin iba, na an hinihingoa sana niatong kaolayon iyo an mga puedeng makipag-olay nin pirang minuto imbes na an mga risang-risa na naghihidali. Kun beses, huli sa ribok sa tinampo, tibaad kaipuhan niatong magtaram nin mas makosog tangani na madangog. Pero, maninigo niatong gibohon iyan na may dignidad, na dai nag-aapod nin atension sa satong sadiri.—Mat. 12:19.
4 Kun Nagpapatotoo Paagi sa Telepono: An konsiderasyon sa iba mapahiro sa sato na magpatotoo paagi sa telepono sa sarong lugar na toninong. Nagpapaheling kita nin marahay na ugale kun kita tolos na nagpapabisto asin nagpapaliwanag kan dahelan kan satong pag-apod. An malinaw na pagtaram sa telepono asin pagpapadanay nin kawiliwiling tono nin boses makakatabang na maenganyar an iba sa nakakaparigon na pag-oolay sa Kasuratan. (1 Cor. 14:8, 9) Paagi sa pagigin maboot, makonsiderasyon, asin magalang sa manlaenlaen na paaging ini, inaarog niato an satong marahay an boot na Dios, si Jehova.