An Satong Ministeryo—Sarong Gibohon na Nagpapaheling nin Pagmalasakit
1 Napagmasdan ni Jesus na an mga kaburunyogan na naghinanyog sa saiyang mensahe “naanitan asin nagkaralagalag siring sa mga karnero na mayong pastor.” (Mat. 9:36) May kapadangatan asin pagkamoot na tinokdoan nia sinda kan mga pamantayan ni Jehova, nagtao sia nin karangahan, asin mapagmalasakit siang naglingkod sa espirituwal na mga pangangaipo ninda. Mantang hinohorophorop niato an saiyang mga dalan, nakakanood kitang mag-isip asin makamate nin siring ki Jesus, asin an kualidad na ini nin pagmalasakit nagigin risang-risa sa satong ministeryo.
2 Isip-isipa nguna kun paano si Jesus naghiro kan dumolok sa saiya an mga tawo na desesperado para sa tabang. (Luc. 5:12, 13; 8:43-48) Makonsiderasyon sia sa mga may espesyal na mga pangangaipo. (Mar. 7:31-35) Aram nia an mga pagmate nin iba asin nagpaheling sia nin pagmakolog. Bako sanang an panluwas na itsura an hineling nia. (Luc. 7:36-40) Sa katunayan, ipinabanaag ni Jesus sa sangkap na paagi an mamomoton na pagmalasakit kan satong Dios.
3 “Napahiro nin Pagkaherak”: Dai ni Jesus ginibo an saiyang ministeryo huli sana sa pakamate nin obligasyon. Sia “napahiro nin pagkaherak” sa mga tawo. (Mar. 6:34) Siring man ngonyan, kita dai sana nagdadara nin mensahe kundi nagmamaigot man kitang iligtas an mahalagang marhay na mga buhay. Hingoahon na masabotan an dahelan kan reaksion nin mga tawo. Taano ta nahahadit o sibot sinda? Sinda daw pinabayaan na asin nabuta nin falsong mga pastor nin relihion? An tunay na interes niato sa iba puedeng magpahiro sa sainda na maghinanyog sa maogmang bareta.—2 Cor. 6:4, 6.
4 An pagmalasakit nakakapahiro sa puso. Sa pag-ilustrar: An sarong babae nag-agi nin makamomondong pagkagadan kan saiyang tolong bulan na aking babae. Kan magdalaw an duwang Saksi sa saiyang harong, pinadagos nia sinda na may intension na pahimutikan an mga argumento ninda manongod sa kun taano ta tinotogotan nin Dios an pagsakit. Minsan siring, kan huri nagsabi an babae: “Naghinanyog sinda sa sako na may dakulang pagmalasakit, asin kan sinda pahale na, nagrahay na gayo an sakong pagmate kaya nag-oyon ako sa saro pang pagdalaw.” Pinagmamaigotan daw nindong magpaheling nin pagmalasakit sa gabos na nakakaolay nindo sa ministeryo?
5 An pagkultibar nin pagmalasakit matabang sa sato na magtao nin tunay na karangahan sa iba. Sa paggibo kaiyan, napapamuraway niato “an Ama nin maboot na mga pagkaherak,” si Jehova.—2 Cor. 1:3.