Si Jehova Namamahala na May Pakikidamay
SA BILOG na kasaysayan dakol na tawong namamahala an nagkapot nin kapangyarihan na dai man lamang nagpaheling nin simpatiya sa pagdusa kan saindang mga nasasakopan. Minsan siring, itinao ni Jehova an pagkakalaen paagi sa pagpili nin sarong nasyon—an Israel—asin pamamahala dian sa madinamayon na paagi.
Kan an mga Israelita oripon pa sa suanoy na Egipto, dinangog ni Jehova an saindang mga agrangay para sa tabang. “Sa bilog na panahon kan saindang kasakitan sia nasakitan man. . . . Sa saiyang pagkamoot asin pakikidamay tinubos nia sinda.” (Isaias 63:9) Ilinigtas ni Jehova an Israel, tinawan sinda nin milagrosong kakanon, asin dinara sinda pasiring sa sarong daga na sadiri ninda.
An kualidad ni Jehova na pakikidamay orog pang naheling sa mga ley na itinao nia sa nasyon na ini. Pinagbotan nia an mga Israelita na madinamayon na trataron an mga ilo, balo, asin nakikihimanwa. Dai ninda dapat aprobetsaran an mga biadi.
Kahagadan kan Ley na magpaheling nin pakikidamay sa mga nangangaipo. An mga dukha puedeng maggutol pakaani. Kinakanselar an mga utang sa (ikapitong) taon nin Sabbath. An gabos na minanang lote na ipinabakal kinakaipuhan na ibalik sa (ika-50) taon nin Jubileo. An Ancient Israel—Its Life and Institutions nagbareta: “Sa Israel, talagang dai noarin man nagkaigwa nin mga grupo sosyal sa modernong sentido.” “Kan enot na mga aldaw kan sadit na baryo, an gabos na Israelita haros parareho an kamugtakan sa buhay.—Levitico 25:10; Deuteronomio 15:12-14; 24:17-22; 27:18.
Pag-arog sa Pakikidamay ni Jehova
An mga lingkod nin Dios naiinspirar kan saiyang pakikidamay. Halimbawa, sa bilog na kasaysayan, ginagadan nin nagkapirang bago pa sanang magin hade an natatadang buhay na mga miembro kan nakaaging dinastiya nin hade. Alagad dai ini ginibo kan lingkod ni Jehova na si David. Pagkagadan ni Hadeng Saul, prinotehiran ni David si Mefiboset, an natatadang buhay na makoapo asin paramana ni Saul. “An hade nakamate nin pakikidamay ki Mefiboset na aki ni Jonatan na aki ni Saul.”—2 Samuel 21:7.
Mayo nang ibang tawo na nakaarog sa pakikidamay ni Jehova siring kan ginibo ni Jesus. An dakol sa saiyang mga milagro minotibar nin diosnon na pakikidamay. Sa sarong okasyon sarong leproso an nakimaherak sa saiya: “Kun boot mo sana, mapalilinig mo ako.” Si Jesus napahiro nin pagkaherak asin dinootan sia, na nagsasabi: “Boot ko. Luminig ka.” (Marcos 1:40-42) Sa saro pang panahon nagsurunod ki Jesus an dakulang mga kadaklan. Sa tahaw nin pagkariribok, tinawan ni Jesus nin atension an duwang butang lalaki na nagkagsing: “‘Kagurangnan, kaherake kami, Aki ni David!’ . . . Napahiro nin pagkaherak, dinootan ni Jesus an saindang mga mata, asin tolos-tolos nag-ako sinda nin pakaheling.”—Mateo 20:29-34.
An dakulang mga kadaklan dai nakapabagol sa pagmate ni Jesus para sa iba. Huli ta nagkapirang aldaw na sindang dai nagkakakan, an sabi nia sarong beses: “Naheherak ako sa kadaklan.” Kaya pinakakan nia sinda sa milagrosong paagi. (Marcos 8:1-8) Kan maglibot si Jesus, bako sanang tinokdoan nia an kaburonyogan kundi nagin man siang mapagmasid sa saindang mga pangangaipo. (Mateo 9:35, 36) Pakatapos kan paglibot na iyan, si Jesus asin an saiyang mga disipulo dai na ngani nin panahon na kumakan. An pagkasaysay sa Biblia nagsasabi sa sato: “Kaya naghale sinda sakay sa baroto pasiring sa sarong lugar na harayo sa mga tawo na masosolo ninda. Alagad naheling nin mga tawo an paghale ninda asin dakol an nakaaram kaiyan, asin hale sa gabos na siudad sinda iribang nagdaralagan duman patin naenot sa sainda. Bueno, sa paglugsad, naheling nia an sarong dakulang kadaklan, alagad ta sia napahiro nin pagkaherak sa sainda, ta garo sinda mga karnero na mayo nin pastor. Asin sia nagpoon na magtokdo sa sainda nin balakid na mga bagay.”—Marcos 6:31-34.
An nagpahiro ki Jesus bako sanang an helang asin kadukhaan kan mga tawo kundi an saindang espirituwal na kamugtakan. An mga namomoon sa sainda haloy nang inaaprobetsaran sinda, kaya si Jesus “napahiro nin pagkaherak sa sainda.” An termino sa Griego para sa “napahiro nin pagkaherak” nangangahulogan “pakamate nin paghimuyawot kan bituka.” Si Jesus tunay na madinamayon na tawo!
Pakikidamay sa Sarong Maringis na Kinaban
Si Jesu-Cristo Hade na ngonyan kan langitnon na Kahadean ni Jehova. Siring kan ginibo nia sa suanoy na Israel, ngonyan an Dios namamahala sa saiyang banwaan na may pakikidamay. “‘Sinda magigin nanggad sadiri ko,’ sabi ni Jehova nin mga hukbo, ‘sa aldaw na ako naggigibo nin espesyal na rogaring. Asin ako mapaheling nin pakikidamay sa sainda.’”—Malaquias 3:17.
An mga boot na mag-ako nin pakikidamay ni Jehova dapat na arogon an saiyang mga dalan. Totoo, nabubuhay kita sa sarong kinaban na dian an mga tawo mas interesado sa pagmantenir kan saindang estilo nin pamumuhay kisa sa pagtabang sa mga nangangaipo. An mga tawong may kapangyarihan parateng naghihingoang makaganansia na isinasakripisyo an kaligtasan nin mga trabahador asin konsumidor. Sa 2 Timoteo 3:1-4, tama an pagkaladawan kan Biblia sa kamugtakan sa moral kan satong panahon na nakaraot sa pakikidamay na nasa puso nin dakol.
Sa ibong kaiyan, posible kitang makanompong nin mga oportunidad na ipaheling an pakikidamay. Puede daw kitang tumao nin kinakaipuhan na tabang sa satong mga kataed? Igwa daw nin saro na naghehelang na puede niatong dalawon? Puede daw niatong rangahon an mga nagmomondo nin makuri, kaoyon kan sadol na: “Magtaram na may pagranga sa mga kalag na nagmomondo nin makuri, suportaran an maluya”?—1 Tesalonica 5:14.
An pakikidamay makatatabang man sa sato na likayan an pagigin maisog kun nasasala an iba. Kita sinasabihan: “Magkaharale na sa saindo an gabos na maraot an kamawotan na kapaitan asin kaanggotan asin kabangisan asin sirilyakan patin pagraway kaibahan an gabos na karatan. Kundi magin maboot sa lambang saro, madinamayon sa mamomoton na paagi, na sueltong nagpapatarawadtawadan siring na an Dios man sueltong nagpatawad sa saindo paagi ki Cristo.”—Efeso 4:31, 32.
An pakikidamay tatabangan kita na likayan an tendensia na abusohon an kapangyarihan. Nagsasabi an Biblia: “Isolog nindo an mamomoton na mga pagmate nin pagdamay, kabootan, kababaan nin isip, kahoyoan, asin pakatios.” (Colosas 3:12) An kababaan nin boot nagpapangyari sa sato na ibugtak an satong sadiri sa kamugtakan kan satong mga dinidirehiran. Kalabot sa pagigin madinamayon an pagigin mapakumbaba asin rasonable imbes na masakit panigoan. An pagigin may kakayahan dai maninigong magin sarahotan sa pagtratar sa mga tawo na garo sana mga piesa nin makina. Siring man, sa pamilya ginigirumdom kan madinamayon na mga agom na lalaki na an saindang agom lalagan na mapapasaon. (1 Pedro 3:7) An paghorophorop sa halimbawa nin pagigin madinamayon ni Jesus makatatabang sa sato sa gabos na ini.
Mantang may pagmakolog na marhay si Jesus sa mga tawo durante kan saiyang ministeryo digdi sa daga, makasisierto kita na sia sarong madinamayon na Namamahala ngonyan, asin padagos na magigin siring kaiyan. An Salmo 72 makahulang nagsasabi manongod sa saiya: “Hokoman logod nia an mga nagmomondo sa banwaan, iligtas logod nia an mga aki kan dukha, asin ronoton logod nia an mapaglupig. Asin magkakaigwa sia nin mga sakop paghale sa dagat sagkod sa dagat asin paghale sa Salog sagkod sa kaporoporohi kan daga. Maheherak sia sa hababa asin sa dukha, asin an kalag kan mga dukha saiyang ililigtas.”—Salmo 72:4, 8, 13.
Ihinuhula kan Tataramon nin Dios: “Sa katanosan maninigo niang hokoman an mga dukha, asin sa karahayan maninigo siang magsagwe para sa mga mahoyo kan daga. . . . Gagadanon nia an maraot.” Pakaladawan kun paanong liliwaton dawa kan maringis, garo hayop na mga tawo an saindang pamumuhay, nagpapadagos an hula: “Dai sinda magibo nin maraot o manraraot sa bilog na sakuyang banal na bukid; huli ta an daga mapapano nanggad kan kaaraman dapit ki Jehova kun paanong an tubig nakatatahob sa mismong kadagatan.” (Isaias 11:4-9) Totoong nanunuga an hulang ini nin sarong sosyedad nin mga tawo sa bilog na daga na nakamimidbid ki Jehova asin inaarog an saiyang madinamayon na mga dalan!