An Espiritu nin Pagboboluntaryo Nagbubunga nin mga Bendisyon
1. Paano ipinaheling ni David asin Nehemias an espiritu nin pagboboluntaryo?
1 Kan duhagion ni Goliat an hukbo kan Israel, puede kutana siang labanan dawa kan siisay man sa mga soldados. Alagad an nagboluntaryo sarong solteritong pastor, na dai natokdoan sa pakikilaban. (1 Sam. 17:32) Kan magbalik sa Jerusalem an desterradong mga Judio alagad dai ninda ikinatogdok liwat an mga lanob, sarong kopero kan Hade nin Persia an nagboluntaryong bayaan an saiyang pribilehiadong katongdan sa palasyo asin magbaklay pa-Jerusalem tanganing organisaron an gibohon na iyan. (Neh. 2:5) Binendisyonan ni Jehova an duwang lalaking ini, si David asin Nehemias, huli sa espiritung ipinaheling ninda.—1 Sam. 17:45, 50; Neh. 6:15, 16.
2. Taano ta maninigong magpaheling nin espiritu nin pagboboluntaryo an mga Kristiano?
2 Ngonyan, an espiritu nin pagboboluntaryo mayo sa kinaban. Sa “huring mga aldaw” na ini, sibot-sibot sa buhay an mga tawo, asin dakol an “mamomoton sa sainda man sana.” (2 Tim. 3:1, 2) Pasil sana para sa saro na mabangkag na marhay sa personal na mga pinagkakainteresan kaya nalalaktawan na nia an mga oportunidad na boluntad na maglingkod kun igwa nin pangangaipo na tabangan an iba. Minsan siring, bilang mga Kristiano, mawot niatong arogon si Jesus, na nagpaheling nin inisyatiba sa pagtabang sa iba. (Juan 5:5-9; 13:12-15; 1 Ped. 2:21) Paano niato ikakapaheling an espiritu nin pagboboluntaryo, asin anong mga bendisyon an aakoon niato?
3. Paano an espiritu nin pagboboluntaryo nakakakontribwir sa mga pagtiripon kan kongregasyon?
3 Para sa Satong mga Tugang: Puede kitang makatao sa iba nin “espirituwal na balaog” paagi sa boluntad na pagkomento kun an mga kabtang sa pagtiripon naghahagad nin partisipasyon kan mga nagdadangog. (Roma 1:11) An pagkomento nagtataong onra ki Jehova, itinatadom nin mas marigon sa satong isip asin puso an katotoohan, asin nakakadagdag sa kaogmahan niato sa mga pagtiripon. (Sal. 26:12) Puede man kitang boluntaryong magpahayag sa Teokratikong Paadalan sa Pagmiministro kun kaipuhan nin sarong kasalida. Tatabangan kita kaini na paoswagon an satong abilidad sa pagtotokdo.
4. Ano an nagkapira pang paagi na ikakapaheling niato an espiritu nin pagboboluntaryo?
4 Ikakapaheling nin mga tugang na lalaki an espiritu nin pagboboluntaryo paagi sa paghihingoang asikasohon an mga paninimbagan sa kongregasyon. (Isa. 32:2; 1 Tim. 3:1) An gabos makakatabang na papagdanayon na areglado an mga asamblea asin kombension paagi sa pagboluntaryo sa manlaenlaen na departamento. Kun kita nagboboluntaryo na makaibanan sa ministeryo an nagbibiaheng paraataman o magpakakan sa saiya, ini nagbubunga nin “pagparinigonan nin boot.” (Roma 1:12) Kun kita nagtatao nin praktikal na tabang sa mga ilo sa ama, balo, may helang asin maluya an hawak, mga ina na may saradang na aki, asin sa iba pa sa kongregasyon, naeeksperyensiahan niato an kagayagayahan asin nakakamtan niato an pag-oyon ni Jehova.—Tal. 19:17; Gibo 20:35.
5. Anong mga bagay may koneksion sa Kingdom Hall an nagkakaipo nin gikan sa boot na mga boluntaryo?
5 An saro pang paagi na kita boluntad na makakapagtao kan satong panahon asin paghihingoa iyo an pagtabang sa paglinig asin pagmantener kan Kingdom Hall. Dugang pa, huling dakol an naglalaog sa katotoohan, nagdadakol man an pangangaipo para sa bagong mga Kingdom Hall asin boluntaryo na matogdok kaiyan. An sarong mag-agom nagpresentar na tumabang sa lokal na Rehional na Komite sa Pagtogdok dawa ngani an mag-agom na iyan mayo nin espesyal na inadalan sa pagtogdok. Pag-abot nin panahon, tinawan nin pagsasanay an mag-agom asin ngonyan sinda nagtatabang na sa paglaag nin mga ladrilyo. An agom na babae nagsabi: “An pagtrabaho nin iriba nagbunga nin dayupot na marhay na pagigin magkakatood. Sa katapusan kan aldaw, kami pagal sa pisikal alagad narepreskohan sa espirituwal.”
6. Taano an ministeryo ta iyo an pinakamahalagang pagboluntaryo na magigibo niato?
6 Paagi sa Paghuhulit: An pinakamahalagang pagboluntaryo na magigibo niato ngonyan iyo an paghuhulit kan Kahadean. Mantang tinatabangan an mga tawo na masabotan asin iaplikar an hatol kan Biblia, nagkakaigwa sinda nin katuyohan sa buhay asin kan kosog na mapaglabanan an nakakadanyar na mga ugale. Nanonodan ninda an nakakaparigon sa boot na paglaom sa Biblia para sa ngapit. Paagi sa pagtao nin pagtotokdo sa Biblia, kita magayagayang naggigibo nin boluntad na paglilingkod na may naghahaloy na mga pakinabang. (Juan 17:3; 1 Tim. 4:16) Tibaad togotan kita kan satong mga kamugtakan na magkaigwa nin mas dakulang kabtang sa gibohon na ini paagi sa pag-auxiliary o pagregular payunir, paagi sa pagbalyo kun saen mas dakula an pangangaipo, o paagi sa pag-adal nin ibang lenguahe.
7. Taano an pagboluntaryo ta nangorognang importante ngonyan?
7 Nagpropesiya si Hadeng David na sa panahon na poponan kan Mesiyas an saiyang pamamahala, an banwaan nin Dios “gikan sa boot na magpepresentar kan saindang sadiri.” (Sal. 110:3, nota sa ibaba) Huling pinaparikas ni Jehova an pangultimong espirituwal na pag-ani, dakol an gibohon na dian puedeng magboluntaryo. (Isa. 60:22) Nagsabi na daw kamo nin: “Uya ako! Sugoa ako”? (Isa. 6:8) Totoo nanggad na paagi sa satong pagpaheling kan espiritu nin pagboboluntaryo, napapaogma niato si Jehova asin mag-aani kita nin nagsosopay na mga balos.