Arogon si Cristo sa Saindong Ministeryo
1 Nagtao si Jesus nin halimbawa na aarogon niato sa satong ministeryo. An saiyang hararom na pagkamoot sa Dios asin sa mga tawo ipinaheling sa dakol na okasyon asin sa dakol na paagi. Tinokdoan nia kan katotoohan an mga mahoyo asin naggibo sia nin mga akto nin mamomoton na kabootan para sa mga nagsasakit nin makuri asin inaapi.—Mat. 9:35.
2 Halimbawa Asin mga Katokdoan ni Jesus: Si Jesus dai nalingling paagi sa pakikilabot sa mga gibo-gibo sa politika o humanitaryo sanang mga paghihingoa tanganing pakinabangon an komunidad. Ni tinogotan man nia na madisturbo sia o matahoban an saiyang pangenot na gibohon nin ano man na iba pang marahay an intension na mga okupasyon. (Luc. 8:1) Nagkonsentrar sia sa paghuhulit kan maogmang bareta kan Kahadean nin Dios bilang an solamente asin permanenteng solusyon sa mga problema nin katawohan. May mahalagang gibohon si Jesus asin limitado sana an panahon nia tangani na magibo iyan. Kan gusto kan mga tawo sa Capernaum na magdanay si Jesus duman, sinabi nia sa saiyang mga disipulo: “Magduman pa kita sa ibang lugar . . . tanganing makapaghulit man ako duman, huli ta sa katuyohan na ini na ako napadigdi.”—Mar. 1:38.
3 Pakatapos na sanayon an saiyang mga disipulo, isinugo sinda ni Jesus na itinatao an espesipikong mga instruksion na ini: “Maghulit kamo, na nagsasabi, ‘An kahadean kan kalangitan harani na.’” (Mat. 10:7) Tinokdoan nia an saiyang mga parasunod na maninigong magin pangenot sa saindang buhay an intereses kan Kahadean. (Mat. 6:33) An huring mga tataramon ni Jesus sa saiyang mga disipulo bago sia nagsakat sa langit malinaw na nagpaparisa kun ano an dapat nindang gibohon. Sia nagsabi: “Kun siring, paduman kamo asin gumibo kamo nin mga disipulo sa mga tawo kan gabos na nasyon.”—Mat. 28:19.
4 Importansia kan Kahadean: An prinsipal na topiko na ipinapakipag-olay ni Jesus iyo an Kahadean nin Dios, asin sinadol nia an saiyang mga disipulo na arogon an saiyang halimbawa. Dai magigin mapanggana an mga paghihingoa nin tawo na resolberan an mga problema nin katawohan. (Jer. 10:23) Solamente an Kahadean nin Dios an masantipikar sa ngaran nin Dios asin matao nin permanenteng kaginhawahan para sa katawohan. (Mat. 6:9, 10) An pagtotokdo kan mga katotoohan manongod sa Kahadean sa mga tawo na “nag-aaragagha asin nag-aaragrangay huli sa gabos na makauuyam nin makuring bagay na ginigibo” nakakatabang sa sainda na mamuhay ngonyan nin maogma asin mapanggana patin makapangapot nin higot sa masasarigan na paglaom para sa ngapit.—Ezeq. 9:4.
5 Si Jesus padagos na nakikilabot sa paghuhulit kan maogmang bareta kan Kahadean nin Dios, asin inaasegurar nia kita kan saiyang suporta. (Mat. 28:20) Sagkod saen niato naaarog sa satong ministeryo an modelo na itinao ni Jesus para sa sato? (1 Ped. 2:21) Sa importante asin huring mga aldaw na ini, logod na gibohon niato an gabos na makakaya niato na susugon nin maingat an halimbawa na itinao ni Jesus sa ministeryo!