An Kristianong Ministeryo—An Satong Pangenot na Gibohon
1 Kita gabos igwa nin manlaenlaen na klase nin trabaho na dapat niatong gibohon. An pagsustento nin saro sa kasararo sa harong sarong kahagadan nin Dios. (1 Tim. 5:8) Minsan siring, an trabaho na kalabot sa kahagadan na iyan nin Dios dai maninigong matahoban an gibohon na paghuhulit kan Kahadean asin paggibo nin disipulo.—Mat. 24:14; 28:19, 20.
2 Nagtao si Jesus nin arogan tanganing arogon niato sa ‘paghanap nguna kan kahadean.’ (Mat. 6:33; 1 Ped. 2:21) Minsan ngani kakadikit an materyal na rogaring, tinawan nia nin lubos na atension an paggibo kan kabotan kan saiyang Ama. (Luc. 4:43; 9:58; Juan 4:34) Nagmaigot sia sa pagpapatotoo sa gabos na oportunidad. (Luc. 23:43; 1 Tim. 6:13) Sinadol nia an saiyang mga disipulo na magkaigwa kan kaparehong makosog na interes sa gibohon na pag-ani.—Mat. 9:37, 38.
3 Pag-arog ki Jesus Ngonyan: Maaarog niato an halimbawa ni Jesus paagi sa pagmamaigot na mamuhay nin simple na nakakonsentrar sa Kristianong ministeryo. Kun igwa kita kan mga kinakaipuhan sa buhay, himateon niato an hatol sa Biblia na dai na magparakua nin dakol pang mga rogaring kan kinaban na ini. (Mat. 6:19, 20; 1 Tim. 6:8) Mas marahay nanggad na maghingoang pahiwason an satong pakikikabtang sa paghuhulit! Kun napapaatubang kita sa masakit na mga kamugtakan, maghingoa logod kita nin maigot siring kan ginibo ni Jesus, na dai tinotogotan an mga kahaditan sa buhay na tahoban an pangenot na gibohon niato na pagpahayag kan maogmang bareta kan Kahadean.—Luc. 8:14; 9:59-62.
4 Dawa an mga igwa nin dakol na paninimbagan ginigibong prioridad an paghuhulit. An sarong tugang na lalaki na dakula an pamilya, igwa nin responsableng trabaho, asin naglilingkod bilang sarong magurang sa Kristianong kongregasyon nagsasabi: “Minamansay ko an ministeryo bilang sakong karera.” An sarong tugang na babaeng payunir nagsasabi: “An pagpapayunir nakalalabing marhay an halaga kisa sarong asensadong sekular na karera.”
5 Ano man an satong mga kamugtakan, arogon logod niato an halimbawa ni Jesus. Paano? Paagi sa paggibong pangenot na gibohon niato an satong Kristianong ministeryo.