Gibohon Nindong Karera an Bilog na Panahon na Paglilingkod
1 Kan imbitaran ni Jesus an iba na magin mga parasunod nia, liniwanag nia na kairiba kaini an pagpahayag kan Kahadean nin Dios. (Luc. 9:57-62) Minsan siring na an satong paghimate sa imbitasyon na ini dai nangangaipo nin pagbabago nin empleo, siertong kalabot digdi an pagbabago nin pinaoorog na mga bagay. Kaipuhan niatong “ipahayag an mga kamurawayan” ni Jehova, kairiba an paggibo nin mga disipulo. (1 Ped. 2:9; Mat. 28:19, 20) Kun siring, an gabos na nagdusay ki Jehova, kaipuhan na isentro an saindang buhay sa ministeryo. Kadakol an naggibo na karera ninda an bilog na panahon na paglilingkod.—2 Cor. 4:1, 7.
SARONG KAPAKIPAKINABANG NA PAAGI NIN BUHAY
2 Sa paghorophorop sa 54 taon sa panbilog na panahon na paglilingkod, sarong payunir an napahirong magsurat: “An kagayagayahan na itinao ni Jehova nakaoorog na gayo kisa sa mga kasakitan. Kun tatawan ako nin oportunidad na gamiton liwat an sakong buhay, andam na gayo an boot ko na gamiton an gabos kong panahon sa pag-omaw sa mamuraway na Dios, si Jehova.” Mayo nin kinabanon na karera an makakatao nin hararom na panlaog na satispaksion asin kagayagayahan na minaresulta sa siring na gibohon. An pagpapadagos na paggamit kan buhay sa bilog na panahon na paglilingkod sarong kapahayagan nin diosnon na debosyon na nagtatao nin mga pakinabang ngonyan asin sa ngapit.—1 Tim. 4:8.
3 An karera sa panbilog na panahon na ministeryo nagtatao nin kaogmahan huli ta kalabot digdi an kadakol na gayong pagtatao. (Gibo 20:35) Nakukultibar asin napakokosog an pakikatood ki Jehova asin sa saiyang Aki paagi sa pagigin orog na gayong kalabot sa mga interes kan Kahadean. (Luc. 16:9; 1 Cor. 15:58) Naeeksperyensiahan an pagkakontento asin malinig na konsensia huli ta naglilingkod kamo nin bilog na kalag sono sa saindong mga kamugtakan. An saindong orog na disiplinadong paagi nin buhay nagpapagin posible saindo na gumibo nin orog bilang pagkuyog sa pagboot ni Cristo na ‘hanapon nguna an Kahadean.’—Mat. 6:33.
MAGIN PROGRESIBO SA SAINDONG MINISTERYO
4 Napapalabot sa karera an pagkakaigwa nin progresibong nahaman sa ano man na langtad o gibohon. An progresibong nahaman mahalaga sa pakatagal asin pagpapadanay nin kagayagayahan asin kaigotan bilang sarong payunir. Nagtatao si Jehova nin espirituwal na edukasyon sa mga pagtiripon asin asamblea. Dugang pa digdi an mga pagtiripon kairiba an kamagurangan kun Enero asin kairiba an paraataman sa sirkito sa saiyang mga pagsongko. Durante kan semana nin pansirkitong asamblea, sarong espesyal na sesyon an inaareglo para sa mga payunir. Nagkukua daw kamo nin mga nota asin maingat na gayong inaaplikar an mga suhestion na itinatao sa siring na mga pagtiripon?
5 Kun dai kamo nagkokondukta nin progresibong pag-adal sa Biblia, pasohan daw nindo ini? Puwede daw nindong paoswagon an saindong mga introduksion sa mga puwertahan o an paagi nindo sa pakikiatubang sa mga pagtumang? Kinonsiderar na daw nindo na magbalyo tanganing makatabang sa sarong kongregasyon na nangangaipo nin tabang? Paagi sa pagkonsiderar kan mga bagay na ini puwede kamong mag-oswag sa saindong karera.
6 Kun seryoso nindong kinokonsiderar an paglaog sa gibohon na pagpayunir, padagos na mamibi ki Jehova manongod sa bagay na ini. (Mat. 7:7, 8) Kadakol an nagpatalubo kan pagsarig ki Jehova paagi sa pagigin auxiliary payunir nguna.
7 Bakong huli sa pambihirang abilidad kaya nagigin posible sa sarong tawo na magpayunir. An tunay na pagkamoot sa Dios asin sa mga tawo, kairiba an pagigin andam an boot sa paggibo nin personal na mga sakripisyo, an kaipuhan. (Mat. 22:37-39; Fil. 4:13) Kaya magmaigot asin magdanay sa ministeryo nin pagpayunir bilang saindong karera!