Rangahon an mga Nalugadan an Puso
1 Dai pa kasuarin man nagkaigwa sa kasaysayan nin katawohan nin siring na pangangaipo na magtao nin karangahan. Sa pagsunod sa pangengenot kan satong Hade, si Cristo Jesus, nagmamaigot man kita na garo ‘bendahan an mga nalugadan an puso.’—Isa. 61:1.
2 Pamamaagi: Tanganing maranga an mga tawo, an satong ministeryo maninigo na igwa nin timbang na marhay asin positibong presentasyon. Kun pinapagdadanay niatong pinakakadikit an pag-oolay manongod sa maraot na mga gibo asin falsong mga doktrina kan kinaban, an nagigin pangenot na kabtang kan pag-oolay iyo an sono sa Kasuratan na katotoohan asin an maogmang paglaom dapit sa nakakarangang mga panuga nin Dios. Dai ini nangangahulogan na dai maninigong ipakipag-olay an dapit sa Armagedon. An sugo sa sato iyo na ibalangibog ‘an taon nin marahay na boot ni Jehova asin an aldaw nin pamamalos kan satong Dios,’ saka “patanidan an maraot sa saiyang maraot na dalan.” Minsan siring, an patanid dapit sa Armagedon asin an paglaladawan sa mapanlaglag na mga resulta kaiyan dai dapat na makatahob sa tema kan maogmang bareta kan kahadean nin Dios.—Isa. 61:2; Ezeq. 3:18; Mat. 24:14.
3 Sa Pagharongharong: Bakong bihira na makanompong nin mga tawo na pinanluluyahan nin boot huli sa helang, pagkagadan nin sarong namomotan, mga inhustisya, o mga problema sa pagbuhay. Bilang mga paraarog ki Cristo, kita ‘napapahiro nin pagkaherak’ asin nagpapaheling nin pakikidamay sa mga nanunuparan niato sa ministeryo. (Luc. 7:13; Roma 12:15) Minsan ngani nagbabasa kita nin saro o duwang teksto na konektado sa problema, dapat kitang magin “listo kun dapit sa pagdangog,” sa siring tinatawan nin lugar an tawo na sabihon an nasa boot nia. (Sant. 1:19) Pakatapos na maghinanyog nguna, mas magigin andam kitang magtao nin karangahan.
4 Sa angay na kabtang durante kan pag-oolay, puede niatong sabihon, “Gusto kong sabihon sa saindo an nagkapirang nakakaparigon sa boot na tataramon hale sa Biblia.” Maninigo kitang magpaheling nin marahay na paghusgar tanganing dai kita maghingoang pahimutikan an lambang salang pagmansay na tibaad sabihon kan tawo. Imbes, maninigo kitang magkonsentrar sa pagtao nin pagparigon sa boot asin karangahan paagi sa paggamit kan Kasuratan tanganing parigonon an puso. Mapadapit digdi, puede nindong helingon an Reasoning From the Scriptures, pahina 117-121, sa irarom kan titulong “Encouragement.” O puede nindong tawan an kagharong nin kopya kan pulyetong Ranga Para sa mga May Depresyon asin repasohon an nakakaparigon sa boot na impormasyon dian.
5 Humanap nin mga Oportunidad na Rangahon an Iba: May midbid daw kamong kataed, katrabaho, kaeskuela, o kapamilya na nangangaipo nin karangahan? Taano ta dai maghingoang dalawon sinda sa saindang harong sa katuyohan na sabihon sa sainda an karangahan na hale sa Kasuratan? Huling aram nindo kun taano ta kaipuhan ninda an pagranga, makakapag-andam kamo para sa partikular na situwasyon na iyan. Mapadapit digdi, an nagkapira guminibo nin surat o nag-apod sa telepono. An tunay na pagkamoot sa kapwa an mapahiro sa sato na magpaheling nin pakikipagkapwa asin na magtao nin kinakaipuhan na karangahan hale sa Kasuratan.—Luc. 10:25-37.
6 Iyo, isinugo kita tangani na rangahon an mga nagtatangis, paogmahon an mga nagmomondo, asin magtadom nin paglaom para sa maogmang ngapit. Ini an karangahan na kaipuhan kan mga tawo sa bilog na kinaban. An magayagayang pagsabi sa mga sadiosan an puso kan manongod sa dakol na marahay na bagay na ipinanuga nin Dios an magtatao nin karangahan asin paglaom sa sainda. Pirme logod niatong girumdomon an pangangaipo na garo bendahan an mga nalugadan an puso.