“Pasana Nindo an Sakong Sakal”
1 Sa sarong kinaban na pano nin mga panggigipit asin kahaditan, nakaeksperyensia kita nin tunay na pakaginhawa paagi sa paghimate sa mamomoton na imbitasyon ni Jesus na makakua nin kaginhawahan sa pagpasan kan saiyang sakal. (Mat. 11:29, 30) Kaiba sa pag-ako kan sakal nin pagkadisipulo an pakikikabtang sa gibohon na bako sanang nangangaipo nin dakulang paghihingoa kundi nakakaginhawa man. Kalabot dian an paghuhulit kan maogmang bareta kan Kahadean asin pagtabang sa iba na makakua nin kaginhawahan kaiba niato sa maboot na sakal ni Jesus.—Mat. 24:14; 28:19, 20.
2 Kaginhawahan na Gikan sa Ministeryo: Dai hinagad ni Jesus sa saiyang mga parasunod na idagdag an saiyang pasan sa dinadara na ninda. Inimbitaran nia sinda na iribay an saindang magabat na pasan sa saiyang magian na pasan. Dai na kita nagagabatan huli sa mga kahaditan asin kadaihan nin paglaom kan sistemang ini nin mga bagay; ni nagpapagal pa man kita para sa kayamanan na bakong segurado. (Luc. 21:34; 1 Tim. 6:17) Dawa ngani kita sibot asin kaipuhan niatong magtrabaho tanganing magkaigwa kan pangaroaldaw na mga pangangaipo, isinesentro niato an satong buhay sa pagsamba sa Dios. (Mat. 6:33) Pirme niatong maeeksperyensiahan na nakakaginhawa, bakong nakakapagabat an ministeryo, kun pinapagdadanay niato an tamang pagmansay sa kun ano an pinakamahalaga.—Fil. 1:10.
3 Natural sana na ikinakaogma niato na sabihon sa iba an ano man na harani sa satong puso. (Luc. 6:45) An gabos na Kristiano lubos na namomoot ki Jehova asin interesadong marhay sa ipinanuga niang mga bendisyon kan Kahadean. Huli kaini, nakakaginhawa nanggad na sabihon sa iba an manongod sa “maogmang bareta dapit sa marahay na mga bagay” asin lingawan an satong pangaroaldaw na kahaditan mantang nakikikabtang sa ministeryo! (Roma 10:15) Siempre, mantang orog niatong ginigibo an sarong bagay, orog man kitang nagigin eksperto asin orog man kitang nagigin magayagaya. Kun siring, an pagdusay nin mas dakol na panahon sa ministeryo, kun kaya niato, matao nin dugang pang kaginhawahan. Asin nakakapakosog nanggad kun naghihimate sa satong paghuhulit an mga indibiduwal! (Gibo 15:3) Dawa kun napapaatubang kita sa pagkaindiperente o pagtumang, magtatao an ministeryo nin espirituwal na kaginhawahan kun pinapagdadanay niato sa isip na an satong mga paghihingoa nagpapaogma ki Jehova asin na an ano man na positibong mga resulta huli sa saiyang mga bendisyon.—Gibo 5:41; 1 Cor. 3:9.
4 Paagi sa pag-ako sa imbitasyon ni Jesus, nagkakaigwa kita kan pribilehio na maglingkod kaiba nia bilang mga Saksi ni Jehova. (Isa. 43:10; Kap. 1:5) Mayo na nin mas makakaginhawa pa kisa dian!