Hapot

◼ Angay daw na mag-upak an mga nagdadangog pakatapos nin kada kabtang sa Teokratikong Paadalan sa Pagmiministro asin Pagtiripon sa Paglilingkod?

Kan gibohon kan Kaglalang na si Jehova an daga, “an mga bitoon nin kaagahan iribang nagkururahaw na may kagayagayahan, asin an gabos na aki nin Dios nagkururahaw sa pag-omaw.” (Job 38:7) Minawot kan mga anghel na aking ini nin Dios na omawon si Jehova huli sa saiyang pambihirang gibo nin paglalang, na sarong bagong paagi na ipinaheling nia an saiyang kadonongan, karahayan, asin kapangyarihan.

Marahayon na ipahayag niato an odok sa pusong pag-apresyar sa mga paghihingoa kan satong mga tugang asin sa impormasyon na ipinepresentar ninda. Halimbawa, sa parate nag-uupak kita sa mga pahayag asin presentasyon sa espesyal na mga pagtiripon, arog baga nin mga asamblea asin kombension. Kinaipuhan nin dugang pang panahon asin paghihingoa tanganing andamon an mga kabtang na iprinesentar dian. An satong pag-upak nagpapaheling nin pag-apresyar bako sanang sa pagmamaigot kan ispiker kundi patin sa pagtotokdo na itinatao ni Jehova paagi sa saiyang Tataramon asin organisasyon.—Isa. 48:17; Mat. 24:45-47.

Paano man an pag-upak sa mga kabtang na iprinesentar sa Teokratikong Paadalan sa Pagmiministro asin Pagtiripon sa Paglilingkod? Mayo nin mga susundon na nagbabawal sa pag-upak kun iyan natural na pagpaheling nin pag-apresyar, arog baga kan pagkatapos nin sarong estudyante sa saiyang enot na asignasyon sa paadalan. Minsan siring, an pag-upak tibaad madali sanang magin mekanikal asin mawaran kan kahulogan kaiyan. Kun siring, sa parate dai kita nag-uupak sa kada presentasyon.

Minsan ngani tibaad dai kita nag-uupak sa kadaklan na kabtang sa Teokratikong Paadalan sa Pagmiministro asin Pagtiripon sa Paglilingkod, may iba pang mga paagi na ikakapahayag niato gabos an satong pag-apresyar sa instruksion asin sa mga paghihingoa kan mga nagpepresentar nin mga kabtang. Magigibo niato ini paagi sa danay na pagigin listo asin pagtao nin maingat na atension sa mga ispiker. Asin pakatapos kan pagtiripon, sa parate posible na personal na ipahayag an satong pag-apresyar sa saindang mga paghihingoa.—Efe. 1:15, 16.