Hapot

◼ Puede daw na an duwang magurang pareho magreport kan oras na ginamit para sa regular na pampamilyang pag-adal?

Minsan ngani an mga ama an may pangenot na paninimbagan sa pagpadakula sa saindang mga aki oyon “sa disiplina asin pagtatanos nin isip gikan ki Jehova,” an ama asin ina parehong may kabtang sa pagsasanay sa saindang mga aki. (Efe. 6:4) Dinadagka kan Biblia an mga aki: “Maghinanyog ka, aki ko, sa disiplina kan saimong ama, asin dai mo pagpabayaan an ley kan saimong ina.” (Tal. 1:8) An sarong mahalagang aspekto kan pagsasanay nin mga magurang iyo an pampamilyang pag-adal sa Biblia.

Kan nakaagi, an magurang sana na nagkokondukta nin pampamilyang pag-adal na may kaibang dai pa bautisadong mga aki an puedeng magreport nin oras, dawa kun kalabot sa pag-orolay an duwang magurang. Minsan siring, may pagbabago manongod digdi. Kun sa panahon nin pampamilyang pag-adal parehong nakikikabtang an mga magurang sa pagtotokdo sa saindang mga aki, kun siring puede sindang magreport nin dai malabi sa tigsarong oras kada semana bilang paglilingkod sa langtad. Siempre, sa pangkagabsan labi nanggad sa sarong oras kada semana an ginagamit nin mga magurang sa pagtotokdo sa saindang mga aki. Kalabot sa pagsasanay sa mga aki an dayaday na paghihingoa kan duwang magurang. (Deut. 6:6-9) Minsan siring, an pangenot na maninigong maheling sa bulanan na report nin paglilingkod sa langtad iyo an nagigibo sa langtad. Kun siring, dai dapat lumabi sa sarong oras kada semana an irereport, dawa kun an pag-adal sobra sa sarong oras, labi sa sarong beses kada semana, o suruway-suway an pagkondukta nin pag-adal sa mga aki. Saro sanang magurang an mareport nin pampamilyang pag-adal sa Biblia asin saro sanang pagdalaw liwat kada semana an irereport.