Hapot
◼ Maninigo daw na ireport sa kongregasyon an pampamilyang pag-adal sa Biblia?
Kun an sarong Kristianong magurang namamayo nin pampamilyang pag-adal sa Biblia asin may kaibang dai pa bautisadong mga aki, puedeng ireport kan magurang an pinakahalangkaw na sarong oras kada semana, sarong pagdalaw liwat kada semana, asin sarong pag-adal sa Biblia kada bulan. Totoo man ini dawa kun an pag-adal minalawig nin labi sa sarong oras, pinamamayohan nin labi sa sarong beses kada semana, o pinamamayohan na suway an kada saro sa mga aki.—Helingon an librong Our Ministry, p. 104.
Kun gabos sa pamilya bautisado nang mga Saksi, kun siring dai irereport an oras ni an pag-adal bilang paglilingkod sa langtad (apuera sana kun an sarong aki nag-aadal pa sa ikaduwang libro pakabautismo). Ini huli ta sa pangenot an ihinahayag kan report nin paglilingkod sa langtad kan kongregasyon iyo an nahahaman sa paghuhulit kan maogmang bareta asin pagtotokdo kan katotoohan sa Biblia sa mga bakong dusay asin dai pa bautisadong mga lingkod ni Jehova. (Mat. 24:14; 28:19, 20) Minsan siring, dai nanggad kaini naiinaan an importansia kan regular na pamamayo sa siring na pag-adal.
Paninimbagan nin Kristianong mga magurang na adalan an saindang mga aki. An mga nangangaipo nin tabang sa pag-establisar o pagpaoswag kan saindang pampamilyang pag-adal puedeng humagad nin tabang sa kamagurangan. Kun huli sa mga kamugtakan mas marahay na ibang parahayag an mamayo nin pag-adal sa Biblia sa sarong dai pa bautisadong aking lalaki o babae nin sarong Kristianong pamilya na asosyado sa kongregasyon, maninigong konsultahon an nangengenot na paraataman o paraataman sa paglilingkod. Kun aprobaran an siring na pag-adal, an saro na namamayo kaiyan puedeng ireport iyan nin siring man sana sa pagreport nia kan iba pang pag-adal sa Biblia.
Kalabot sa pagsasanay sa mga aki sa mga dalan ni Jehova bako sana nanggad an panahon asin paghihingoa na maheheling sa report nin paglilingkod sa langtad. (Deut. 6:6-9; Tal. 22:6) Maninigo na tawan nin komendasyon an Kristianong mga magurang sa pagsaabaga kan saindang magabat na paninimbagan na padakulaon an saindang mga aki “sa disiplina asin pagtatanos nin isip ni Jehova.”—Efe. 6:4.