Ireport nin Tama an Paglilingkod sa Langtad
1 Dai na mahahaloy an bagong Yearbook maluwas na igwa kan pankinaban na report para sa 1988 taon nin paglilingkod. Galaga niatong hinahalat ini tanganing mabasa niato an pag-oswag kan paghuhulit sa bilog na daga. (Isa. 60:22) Mantang an gabos na parahayag nagkokontribuwir sa taonan na report na ini, ano daw an magigibo niato bilang indibiduwal tanganing maseguro na iyan tama?
2 Sa Mateo 24:14 mababasa niato an sugo sato na maghulit sa huring mga aldaw na ini. Ikapaheheling niato an satong paggalang sa organisasyon ni Jehova paagi sa maimbod na pagreport kan satong paglilingkod sa langtad sa katapusan kan kada bulan. Irinireport daw nindo nin regular asin tama an saindong paglilingkod?
KUN ANO AN IREREPORT
3 Mga bilog na oras sana an maninigong ireport sa kongregasyon. An oras na bakong bilog puwedeng iiba kan parahayag sa masunod na bulan. Pinakamarahay na isurat an oras, ikinawaras, asin bilang nin pagdalaw liwat kada lumuwas kita sa paglilingkod sa langtad. Dangan paagi sana sa pagtotal kan mga numerong ini sa katapusan kan bulan, dai niato kakarkulohon kun ano an nagibo niato.
4 Dai paglingawan na maninigong bilangon an pagdalaw liwat kada magkondukta kamo nin pag-adal sa Biblia. Sa katapusan kan bulan, maninigong llenaran an sarong Study Report slip para sa kada inaadalan asin isumitir iyan kaiba kan saindong Field Service Report slip. Pakatapos na mallenaran nin kompleto an kada Study Report slip, an total nin laen-laen na pag-adal sa Biblia na kinondukta sa laog kan bulan maninigong isurat sa tamang kahon sa ibaba sa kamping too kan Field Service Report slip.
5 Garo baga angay na iiba digdi an pagirumdom na an oras nindo sa paglilingkod sa langtad maninigong pumoon pagpoon nindong maghulit asin matapos pagkatapos nindo sa huring harong sa kada panahon nin paghuhulit. Kaya, an oras na ginamit sa pagmirindal o pagkakan sa pagpahingalo sa paglilingkod sa langtad dai ibibilang na paglilingkod sa langtad. An mga nagtao nin pahayag-publiko puwedeng ibilang an oras na ginamit sa pagpahayag. (Helingon an Our Ministry, pahina 104, parapo 1.) Paagi sa pagigin maimbod sa pagrereport, kita gabos makakokontribuwir sa tamang report na ipinupublikar sa Yearbook.
6 Mantang kaipuhan na ipadara kan sekretaryo sa Sosyedad an report kan kongregasyon sa petsa sais kan minasunod na bulan, mahalaga na an kada parahayag listong itao an saiyang report sa paglilingkod sa langtad sa katapusan kan bulan. Huli sa pagkonsiderar sa areglong ini, bobooton kan kada parahayag na maingat na kuyogon an giyang ini. An sekretaryo igwa sana nin anom na aldaw tanganing tiponon an gabos na report, totalon iyan, asin ipadara an report kan kongregasyon tanganing maresibi iyan kan Sosyedad na nasa panahon asin ikaiba iyan sa paglilingkod sa langtad kan labing 2,700 pang kongregasyon sa nasyon na ini.
7 An kada parahayag na boluntad na nakikikooperar sa mga areglong ini kan organisasyon makokontento sa pakaaram na sia nakakontribuwir sa pakagibo nin tamang report kan pankinaban na aktibidad kan mga Saksi ni Jehova. (Ikomparar an Ezequiel 9:11.) Kita logod gabos magtao nin report sa paglilingkod sa langtad na tama asin nasa panahon!