Hapot
◼ Taano ta maninigo tang ireport tolos-tolos an satong paglilingkod sa langtad kada bulan?
Kita gabos nakamamate nin kagayagayahan kun nakadadangog kita manongod sa mararahay na bagay na nagigibo sa paghuhulit kan mensahe nin Kahadean. (Helingon an Talinhaga 25:25.) An Gibo 2:41 nagrereport na pakatapos kan pahayag ni Pedro kan aldaw nin Pentecostes, “mga tolong ribong kalag an nakadugang.” Sa dai nahaloy na panahon, an bilang na iyan luminangkaw sagkod sa “mga limang ribo.” (Gibo 4:4) Sierto nanggad na nakarerepresko an mga report na idto para sa mga Kristiano kan enot na siglo! Ngonyan kita man naoogmang marhay na makadangog nin mga report dapit sa kapangganahan na nakakamtan kan satong mga tugang sa paghuhulit kan maogmang bareta sa bilog na kinaban.
Huling dakol na oras asin paghihingoa an kalabot sa pagtipon nin siring na mga report, mahalagang marhay an pakikikooperar kan gabos na parahayag nin Kahadean. Maatom daw kamo manongod sa pagtao tolos-tolos kan saindong report kada bulan?
An mga report manongod sa mga aumento nagtatao sa sato nin dakulang kagayagayahan. Dagdag pa, an mga report nakatatabang sa Sosyedad na masundan an progreso kan gibohon sa bilog na kinaban. Kaipuhan na gumibo nin mga desisyon dapit sa kun saen tibaad nangangaipo nin mas dakol na tabang o sa klase asin kadakolan nin literatura na poprodusiron. Ginagamit kan kamagurangan sa kada kongregasyon an mga report nin paglilingkod sa langtad tangani na determinaran kun saen puedeng gumibo nin pag-oswag. An mararahay na report nakaparirigon, na minomotibar kita gabos na siyasaton an sato mismong ministeryo para sa posibleng mga pag-oswag.
An gabos na parahayag kaipuhan na midbidon an saindang indibiduwal na paninimbagan na itao tolos-tolos an report nin paglilingkod sa langtad kada bulan. An mga konduktor sa Pag-adal sa Libro kan Kongregasyon an angay na magpagirumdom sa mga parahayag kan paninimbagan na ini. Puedeng itao an pagirumdom na ini sa huring pag-adal sa libro kada bulan. Kun mayong oportunidad na itao an mga report nin paglilingkod sa langtad sa Kingdom Hall, puedeng kolektahon iyan kan konduktor sa Pag-adal sa Libro kan Kongregasyon asin siertohon nia na ikatao iyan sa sekretaryo sa tamang panahon tangani na ikaiba sa regular na bulanan na report kan kongregasyon sa Sosyedad.
An satong kahigosan sa fiel na pagreport tolos-tolos kan satong paglilingkod sa langtad mas pinagigian an pasan kan mga may paninimbagan sa satong espirituwal na karahayan.