Kualipikado Asin Andam na Tokdoan an Iba
1 Kan nombrahan si Moises bilang representante ni Jehova, dai nia namatean na kualipikado siang ipahayag ki Faraon an tataramon nin Dios. (Ex. 4:10; 6:12) Ipinahayag ni Jeremias an saiyang kadaihan nin kompiansa sa paglilingkod bilang propeta ni Jehova, na sinasabi sa Dios na dai sia tataong magtaram. (Jer. 1:6) Sa ibong kan saindang kadaihan nin kompiansa sa primero, an mga propetang idto kapwa napatunayan na mayong takot na mga saksi para ki Jehova. Sinda ginibo nin Dios na biyong kualipikado.
2 Ngonyan, sa tabang ni Jehova, igwa kita kan kaipuhan niato tangani na magibo an satong ministeryo na may kompiansa. (2 Cor. 3:4, 5; 2 Tim. 3:17) Siring sa sarong kualipikadong mekaniko na igwa nin kompletong mga kasangkapan, kita andam nanggad na ekspertong gibohon an ministeryo na iinasignar sa sato. Ngonyan na Enero iaalok niato an sadit na edisyon kan librong Mabuhay Sagkod Lamang. Dawa ngani bakong bago an librong ini, iyan marahay na pantabang sa pagtotokdo na makatatabang sa mga tawo na manodan an katotoohan. Puedeng gamiton an minasunod na isinusuherir na mga pag-atubang.
3 Puedeng gamiton an tema dapit sa edukasyon tangani na mapukaw an interes sa Tataramon nin Dios. Puede nindong ponan an pakipag-olay paagi sa pagsabi:
◼ “May pagdodoon na marhay ngonyan manongod sa pangangaipo sa de kalidad na edukasyon. Sa opinyon nindo, anong klaseng edukasyon an maninigong hingoahon nin saro tangani na masierto an pinakadakulang kaogmahan asin kapangganahan sa buhay? [Pasimbagon.] Puedeng magkamit nin daing sagkod na mga pakinabang an mga nagkukua nin kaaraman manongod sa Dios. [Basahon an Talinhaga 9:10, 11.] An sadit na librong ini basado sa Biblia. Iyan nagtotokdo sa solamenteng gikanan nin kaaraman na magiya pasiring sa buhay na daing katapusan.” Basahon an enot na mga tataramon sa parapo 19 na nasa pahina 15 kan librong Mabuhay Sagkod Lamang. Ialok an libro asin iareglo an pagdalaw liwat.
4 Kun minadalaw liwat sa sarong kagharong na ipinakipag-olay nindo an importansia nin edukasyon sa Biblia, puede nindong sabihon:
◼ “Kan nakaagi kong pagsongko, pinag-olayan niato an Biblia bilang an gikanan nin edukasyon na makagagarantiya kan satong daing sagkod na ngapit. Siempre, nangangaipo nin paghihingoa na manodan an dapat niatong maaraman hale sa Kasuratan. [Basahon an Talinhaga 2:1-5.] Dakol na tawo an nasasakitan na saboton an nagkapirang kabtang kan Biblia. Boot kong idemonstrar sa halipot an sarong paagi na ginagamit niamo tangani na tabangan an mga tawo na dakol pang manodan dapit sa pundamental na mga katokdoan sa Biblia.” Idemonstrar sa halipot an pag-adal sa Biblia, na ginagamit an enot na mga parapo kan libro. Kun gusto kan kagharong na magkaigwa nin regular na pag-adal, ipaliwanag na madalaw liwat kamo sa masunod na semana tangani na ipadagos iyan. Dai mahaloy sa angay na panahon, puede na nindong ibalyo an pag-adal sa librong Kaaraman na Minagiya Pasiring sa Buhay na Daing Katapusan.
5 Dakol na tawo an napupurisaw sa pagsakit nin minilyon na aki sa kinaban. Tibaad puede nindong tabangan an kagharong na masabotan kun paano minamansay nin Dios an mamondong kamugtakan na ini, paagi sa pagsabi:
◼ “Daing duwa-duwa na may mga nababaretaan kamo dapit sa mga aki sa bilog na globo na nagugutom, naghehelang, asin pinabayaan. Taano ta dai naparahay kan nagmamalasakit na mga organisasyon an situwasyon na iyan? [Pasimbagon.] Mangnoha an ipinanunuga nin Dios kapwa para sa mga aki asin adulto, siring kan nakarekord sa Biblia. [Basahon an Kapahayagan 21:4.] An librong ini nagtatao nin dakol na detalye manongod sa sarong kinaban na pangyayarihon nin Dios na dian mawawara na an kasakitan.” Buksan an ilustrasyon na nagpapaheling kan Paraiso, puedeng an nasa pahina 12 asin 13 o 156-7, asin pag-olayan iyan. Ialok an libro, asin iareglo an saro pang pagdalaw liwat.
6 Kun ipinakipag-olay nindo kan enot an dapit sa pagsakit nin mga aki, sa masunod na pagdalaw liwat puede nindong ipadagos an pag-orolay paagi sa pagsabi:
◼ “Kan nagdigdi ako dai pa sana nahahaloy, nagpahayag kamo nin paghadit manongod sa mamondong kamugtakan nin mga aki na nasasakitan huli sa laglag na mga pamilya, gutom, helang, asin kadahasan. Nakararangang basahon sa Biblia an manongod sa sarong kinaban na dian mayo nang mga aki ni adulto na maghehelang, makokologan, o magagadan. An sarong hula sa librong Isaias nagsasabi manongod sa sarong mas marahay na buhay na madatong digdi sa daga.” Basahon asin pag-olayan an Isaias 65:20-25. Alokon nin pag-adal sa Biblia.
7 Mantang an kaugalean na mamibi komon sa relihiosong mga tawo, puede nindong ponan an pag-orolay sa topikong ini paagi sa pagsabi:
◼ “An kadaklan sa sato nakaeksperyensia na nin mga problema sa satong buhay na nakapahiro sa sato na mamibi sa Dios para sa tabang. Alagad ta, dakol an nakamamate na dai sinisimbag an saindang mga pamibi. Minalataw pa ngani na dai dinadangog an mga namomoon sa relihion na namimibi para sa katoninongan. Nasasabi niato iyan ta an guerra asin kadahasan padagos na pinasasakitan an katawohan. Talaga daw na dinadangog nin Dios an mga pamibi? Kun dinadangog nia, taano ta kadakoldakol na pamibi an garo baga dai sinisimbag? [Pasimbagon.] An Salmo 145:18 nagpapaliwanag kun ano an hinahagad tangani na dangogon an satong mga pamibi. [Basahon an teksto.] Enot sa gabos, an mga pamibi sa Dios dapat na magin sinsero asin oyon sa katotoohan na makukua sa saiyang Tataramon, an Biblia.” Buksan an librong Mabuhay Sagkod Lamang sa kapitulo 27, asin itokdo kun ano an sinasabi kaiyan dapit sa kahalagahan nin pamibi. Ialok an libro asin iareglo na madalaw liwat tangani na orog pa iyan na pag-olayan.
8 Kun binabalikan an nakaaging pag-orolay manongod sa pamibi, puede nindong probaran an pagdolok na ini:
◼ “Naogma ako sa satong pag-oolay manongod sa pamibi. Daing duwa-duwa na manonompongan nindong nakatatabang na giya an kaisipan ni Jesus manongod sa kun ano an ipamimibi.” Basahon an Mateo 6:9, 10, na itinotokdo an pangenot na mga bagay na itinampok ni Jesus sa saiyang modelong pamibi. Alokon na idemonstrar an pag-adal sa kapitulo 27 kan libro.
9 Kun dapit sa pagtao sa iba nin kaaraman manongod sa Dios, tibaad ihapot niato, “Siisay an biyong kualipikado para sa mga bagay na ini?” Minasimbag an Kasuratan: “Kita.”—2 Cor. 2:16, 17.