Makikabtang sa Gibohon na Dai Na Noarin Man Ootrohon
1 Sa manlaenlaen na panahon sa bilog na kasaysayan nin katawohan, kinaipuhan ni Jehova na gumibo nin paghokom sa saiyang mga kaiwal. Minsan siring, huli sa saiyang pagkaherak, tinawan nia nin oportunidad para sa kaligtasan an mga matanos an puso. (Sal. 103:13) An saindang paghimate nagdeterminar kan saindang kaaabtan.
2 Halimbawa, bago kan Baha, kan 2370 B.C.E., si Noe “sarong parahulit nin katanosan.” An mga nagkaparara iyo idtong mga nag-ignoro kan patanid nin Dios. (2 Ped. 2:5; Heb. 11:7) Bago laglagon an Jerusalem kan 70 C.E., malinaw na sinumaryo ni Jesus an paghiro na kaipuhan tangani na an siisay man makadulag sa kalaglagan na mangyayari sa siudad. An gabos na nagsikwal kan saiyang mensahe nin patanid nag-agi nin makatatakot na mga resulta.—Luc. 21:20-24.
3 Sarong Gibohon na Pagpatanid sa Modernong Aldaw: Haloy nang ipinahayag ni Jehova na bigla na sanang iluluwas an saiyang kaanggotan tumang sa maraot na palakaw ngonyan asin na an mga mahoyo sana an makaliligtas. (Sof. 2:2, 3; 3:8) An panahon para sa paghuhulit kaining mensahe nin patanid nauubos na! Harani na an “dakulang kahorasaan,” asin tinitipon na ngonyan an mga mahoyo. Tunay nanggad, an “kaomahan” “maputi na para sa pag-ani.” Huli kaini, mayo nang ibang gibohon na ikakokomparar digdi kun manongod sa importansia asin pagkaapurado.—Mat. 24:14, 21, 22; Juan 4:35.
4 Dapat kitang makikabtang sa pagpahayag sa iba kan modernong aldaw na patanid, “baga man sinda magdangog o dai.” Ini sarong asignasyon na tao nin Dios na dai niato dapat na ignorohon. (Ezeq. 2:4, 5; 3:17, 18) An satong pakikikabtang nin lubos sa gibohon na ini nagpapaheling kan satong hararom na pagkamoot sa Dios, kan satong tunay na pagmakolog sa satong mga kataed, asin kan satong dai natatanyog na pagtubod sa satong Paraligtas, si Jesu-Cristo.
5 Ngonyan Na an Panahon na Humiro: Pakalihis nin nakaaging mga paghokom ni Jehova, perming minalataw tolos an panibagong karatan huli ta aktibo pa si Satanas asin an saiyang mga demonyo. Minsan siring, magigin laen ngonyan. Hahaleon na an Satanikong impluwensia. Dai na noarin man kaipuhan giraray an panglobong pagpatanid manongod sa nagdadangadang na “dakulang kahorasaan.” (Kap. 7:14; Roma 16:20) May espesyal kitang pribilehio na magin kabtang nin sarong gibohon na dai na noarin man ootrohon. Ngonyan na an panahon na aprobetsaran niato an oportunidad na ini.
6 Manongod sa saiyang aktibidad na paghuhulit, nagsabi si apostol Pablo: “Malinig ako sa dugo kan gabos na tawo.” (Gibo 20:26) Dai sia nakamateng may sala sa dugo paagi sa dai pagpahayag kan patanid. Taano ta dai? Huli ta makasasabi sia manongod sa saiyang ministeryo: “Sa katuyohan na ini ako tunay na nagpapagal, na naghihingoa.” (Col. 1:29) Magkamit logod kita nin kaparehong satispaksion sa lubos na pakikikabtang sa gibohon na dai na noarin man ootrohon!—2 Tim. 2:15.