Nakakokontribwir daw Kamo sa Tamang Report?
1 An dakol na pagkasaysay sa Biblia may kaibang espesipikong kabilangan, na nakakatabang na ikatao an malinaw na ideya kun ano an nangyari. Halimbawa, nadaog ni Gedeon an kampo kan Midian paagi sana sa 300 na lalaki. (Hok. 7:7) Ginadan kan anghel ni Jehova an 185,000 na soldados kan Asiria. (2 Ha. 19:35) Kan Pentecostes 33 C.E., mga 3,000 an nabautismohan, asin dai nahaloy pagkatapos kaiyan an kabilangan kan mga nagtutubod nagin mga 5,000. (Gibo 2:41; 4:4) Risang-risa sa mga pagkasaysay na ini na an suanoy na mga lingkod nin Dios naggigibo nin dakulang paghihingoa sa pagtipon nin kompleto asin tamang rekord.
2 Iniinstruksionan kita kan organisasyon ni Jehova ngonyan na ireport an satong paglilingkod sa langtad kada bulan. An satong fiel na pakikikooperar sa areglong ini nakakokontribwir sa epektibong pangangataman sa paghuhulit. Puedeng ihayag nin mga report na an sarong aspekto kan ministeryo nagkakaipo nin atension o na nangangaipo nin dugang pang mga parahulit sa sarong kabtang kan langtad. Sa kongregasyon, an mga report nin paglilingkod sa langtad nakakatabang sa kamagurangan na maaraman kun siisay an mga may potensial na mapahiwas an saindang ministeryo saka an mga tibaad nagkakaipo nin tabang. Asin an mga report manongod sa pag-oswag kan paghuhulit kan Kahadean nakaparirigon sa boot kan bilog na Kristianong kasararoan nin magturugang. Ginigibo daw nindo an kabtang nindo na makakontribwir sa tamang report?
3 An Personal na Paninimbagan Nindo: Sa katapusan kan bulan, nadedepisilan daw kamong magirumdoman an nagibo nindo sa ministeryo? Kun iyo, taano ta dai isurat an saindong aktibidad kada makikabtang kamo sa paglilingkod sa langtad? An nagkapira naggagamit nin kalendaryo o dayari. An iba nagdadara nin blangkong field service report slip. Sa katapusan kan bulan, isumitir tolos-tolos an report nindo sa saindong paraataman sa pag-adal sa libro. O, kun gusto nindo, puede nindong ibugtak an report nindo sa kahon para sa report na nasa Kingdom Hall. Kun malingawan nindong itao an report nindo, kontakon tolos-tolos an saindong paraataman sa pag-adal sa libro imbes na halaton siang dumolok sa saindo. An maatom na pagreport kan aktibidad nindo nagpapaheling nin paggalang sa areglo ni Jehova asin mamomoton na konsiderasyon para sa mga tugang na naasignaran na magkolekta asin magrekord kan mga report.—Luc. 16:10.
4 An Kabtang kan Paraataman sa Pag-adal sa Libro: Bilang listo asin mapagmangnong pastor, an paraataman sa pag-adal sa libro interesado sa aktibidad kan grupo sa bilog na bulan. (Tal. 27:23) Aram nia kun baga an lambang parahayag igwa nin regular, makahulogan, asin magayagayang pakikikabtang saka tolos na nagtatao nin tabang kun an siisay man dai pa nakapakikikabtang sa bilog na bulan. Sarong tataramon na nakaparirigon sa boot, praktikal na suhestion, o pag-agda na ibanan sia sa paglilingkod sa langtad an sa parate iyo sana an kaipuhan.
5 Sa katapusan kan bulan, sinesegurado kan paraataman sa pag-adal sa libro na ginibo na kan gabos na nasa grupo an saindang paninimbagan na ireport an aktibidad ninda tangani na ikasumitir kan sekretaryo sa sangang opisina an tamang report kan kongregasyon pag-abot kan ikaanom na aldaw kan masunod na bulan. Kun madali nang matapos an bulan, tibaad makakatabang na pagirumdomon nia an grupo asin magkaigwa nin mga report slip sa lugar kan pag-adal sa libro. Kun may siisay man na malilingawon sa pagreport kan aktibidad nia, an paraataman puedeng magtao nin angay na mga pagirumdom asin pagparigon sa boot.
6 An pagsumitir tolos-tolos kan satong mga report nin paglilingkod sa langtad nakakokontribwir sa report na nagpapaheling nin tama kan nahaman sa langtad. Gigibohon daw nindo an saindong kabtang paagi sa pagreport tolos-tolos kan aktibidad nindo kada bulan?