Igwa Kita nin Mahalagang Marhay na mga Kayamanan na Dapat Ihiras
1 An Tataramon nin Dios pano nin espirituwal na mga kayamanan na pinapahalagahan niato. (Sal. 12:6; 119:11, 14) Sa sarong partikular na pangyayari, naggamit si Jesus nin mga ilustrasyon na naglaladawan sa manlaenlaen na aspekto kan Kahadean, dangan hinapot nia an saiyang mga disipulo: “Nasabotan daw nindo an gabos na bagay na ini?” Kan sinda magsimbag nin iyo, sinabi nia sa sainda: “Mantang siring an kamugtakan, an lambang paratokdo sa publiko, kun natokdoan manongod sa kahadean kan kalangitan, nakakaagid sa sarong tawo, sarong kagharong, na ilinuluwas hale sa saiyang sarayan nin kayamanan an mga bagay na bago asin daan.”—Mat. 13:1-52.
2 An mga katotoohan sa Biblia na satong nanodan kan enot kitang magpoon na mag-adal puedeng mansayon na daan na mga kayamanan. Paagi sa progresibo niatong personal na pag-adal sa mas harararom na bagay kan Tataramon nin Dios, nanodan niato an iba pang mga katotoohan sa Biblia, na para sa sato bago pa sanang manompongan na mga kayamanan. (1 Cor. 2:7) Siring man, paagi sa “maimbod asin mapagmansay na oripon,” nasasabotan niato an bagong mga kayamanan.—Mat. 24:45.
3 Pinapahalagahan niatong marhay an espirituwal na mga kayamanan na ini, an daan asin an bago. Pinapahiro kita kaini na hingoahon na mag-ako nin pagsasanay asin magkamit nin kabatidan bilang mga paratokdo kan Tataramon nin Dios, na buka an palad na sinasabi sa iba an mahalagang marhay na mga katotoohan na nanodan niato.
4 Makanood sa Halimbawa ni Jesus: Sa pagpaheling kan namatean nia manongod sa mga kayamanan na ini, si Jesus naghingoang marhay na sabihon an mga ini sa iba. Dawa kan sia pagal na, dai sia nagpondo sa pagpaluwas nin kayamanan hale sa saiyang “tambobong.”—Juan 4:6-14.
5 An pagkamoot ni Jesus para sa mga dukha sa espirituwal nagpahiro sa saiya na sabihon sa iba an nagtataong-buhay na mga kayamanan kan mga katotoohan nin Dios. (Sal. 72:13) Naherak sia sa mga gutom sa espirituwal asin napahiro sia na “magtokdo sa sainda nin dakol na bagay.”—Mar. 6:34.
6 Arogon si Jesus: Kun pinapahalagahan niatong marhay an mga kayamanan na yaon sa sato, arog ni Jesus, magigin entusiastiko kita na ipaheling sa mga tawo an espirituwal na mga mutya hale mismo sa Biblia. (Tal. 2:1-5) Minsan ngani kun beses tibaad pagal na kita, magtataram kita na may odok sa pusong entusiasmo manongod sa mga katotoohan na sono sa Kasuratan. (Mar. 12:34) An hararom na pagpapahalaga niato sa mga kayamanan na yaon sa sato mapahiro sa sato na gibohon an satong pinakamakakaya sa ministeryo, na pirmeng naghihingoa na makikabtang nin mas lubos.