Puede Kamong Magin Paratokdo!
1. Igwa nin anong pambihirang oportunidad an lambang parahayag kan Kahadean?
1 An saro sa pinakanakakakontentong aspekto kan ministeryo iyo an pagtotokdo sa sarong tawo kan katotoohan. An maheling sia na naghihimate sa mensahe kan Kahadean asin an matabangan sia na rumani sa Soberano kan uniberso sarong eksperyensia na dapat pahalagahan. (Sant. 4:8) Maninigong magin pasohan nin lambang parahayag kan Kahadean na tokdoan an sarong tawo na nagugutom sa katotoohan asin maheling ini na nagpopoon nang gumibo nin dakulang mga pagbabago sa personalidad, punto de vista, asin paggawe kaini.—Mat. 28:19, 20.
2. Taano ta tibaad nag-aalangan an nagkapira na magkondukta nin pag-adal sa Biblia, asin ano an makakatabang sa sainda na mapangganahan an problemang ini?
2 Magsarig ki Jehova: Sa nakaaging mga panahon, an maimbod na mga lingkod nagduda sa kakayahan ninda na maotob an sugo sa sainda. An pagsarig ki Jehova Dios an nakatabang ki Moises, Jeremias, Amos, asin sa iba pang ordinaryong tawo na mapangganahan an sainda mismong mga pagduda o takot asin na magibo an mahalagang gibohon ninda. (Ex. 4:10-12; Jer. 1:6, 7; Amos 7:14, 15) Si apostol Pablo man “nagpakapusoan,” o sa literal, “pinagin daing pag-alangan na magtaram.” Paano? Ihinayag nia na iyan “paagi sa satong Dios.” (1 Tes. 2:2, nota sa ibaba) Iyo, kita gabos makakapagtiwala ki Jehova na matao sia nin tabang, kadonongan, asin kosog na kaipuhan niato tanganing makapagkondukta nin mabungang mga pag-adal sa Biblia.—Isa. 41:10; 1 Cor. 1:26, 27; 1 Ped. 4:11.
3, 4. Anong pagsasanay an makukua tanganing makatabang sa sato sa pagtokdo kan Tataramon nin Dios?
3 Mag-ako nin Pagsasanay: An satong Kaharohalangkaweng Paratokdo, si Jehova Dios, nagtatao nin pagsasanay paagi sa regular na programa nin espirituwal na edukasyon tanganing kita magin lubos na may kakayahan bilang mga paratokdo. (Isa. 54:13; 2 Tim. 3:16, 17) Akoon an pagsasanay na ini paagi sa lubos na pag-aprobetsar sa mga oportunidad na madugangan an saindong pakasabot sa Kasuratan asin mapaoswag an saindong kakayahan na magtokdo kan mga katotoohan sa Biblia. Minsan ngani sa pangenot ini an katuyohan kan Teokratikong Paadalan sa Pagmiministro asin Pagtiripon sa Paglilingkod, an gabos na pagtiripon kan kongregasyon nagsasanay sa sato na magtokdo basado sa Tataramon nin Dios.
4 Magmaigot na makanood nin simpleng mga paagi na ikatokdo dawa an hararom na espirituwal na mga katotoohan. An librong Paadalan sa Pagmiministro, pahina 227, nagpaliwanag: “Dapat na nasasabotan mismo nindo nin malinaw an saindong tema tangani na ikapasabot nindo iyan sa iba.” An pagkomento sa mga pagtiripon nakakatabang sa sato na ikalaog sa satong isip an prinsipal na mga punto tanganing magamit iyan sa ngapit. Kaya, mag-andam na marhay, asin mag-ooswag an saindong kompiansa sa kakayahan nindo na magtokdo.
5. Ano pang pagsasanay an makukua niato sa laog kan kongregasyon na matabang sa sato na mag-oswag bilang mga paratokdo?
5 Sa kapinonan pa sana, an Kristianong mga ministro daing duda na nakakanood sa lambang saro mantang nakikikabtang sa paggibo nin mga disipulo. (Luc. 10:1) Kun posible, umiba sa eksperyensiadong mga parahayag, kabilang na an mga payunir, kamagurangan, asin nagbibiaheng mga paraataman, sa pagkondukta nin pag-adal sa Biblia. Mangnohon kun paano ninda ginagamit an simpleng mga ilustrasyon asin an iba pang pantabang sa pagtotokdo na yaon sa satong mga publikasyon na ginagamit sa pakikipag-adal sa Biblia tanganing ipaliwanag an sono sa Kasuratan na mga katotoohan. Maghagad sa sainda nin mga suhestion kun paano kamo magigin mas marahay na paratokdo. (Tal. 1:5; 27:17) Pahalagahan an gabos na siring na pagsasanay, huli ta sa katunayan, hale iyan sa Dios.—2 Cor. 3:5.
6. Sa pundamental, ano an kaipuhan tanganing magin paratokdo kan Tataramon nin Dios?
6 Magsarig ki Jehova, asin makinabang sa pagsasanay na itinatao nia. Ipamibi an manongod sa saindong pag-oswag. (Sal. 25:4, 5) Puede man nindong maeksperyensiahan an kagayagayahan sa pagtabang sa sarong tawo na magin, arog nindo, sarong paratokdo kan Tataramon nin Dios!