Magin Bilog na Kalag sa Ministeryo sa Langtad
Kabtang 3: Tumabang sa Pag-oswag nin Iba
1 An relasyon kan mas may edad na tugang na si Pablo asin kan debotadong hoben na si Timoteo parateng sinisitar bilang marahay na halimbawa sa pagtotokdo sa ministeryo. (1 Cor. 4:17) Si Timoteo tinokdoan ni Pablo na ihiras sa iba an kaaraman asin pagtotokdo na inako nia. (2 Tim. 2:1, 2) Marahay na arogon man niato iyan sa kongregasyon ngonyan.
2 Tokdoan an Iba: An pangangaipo nin pagtotokdo nagigin risa kun gigirumdomon niato na digdi sa Pilipinas mga 13,000 an kalabihan kan mga parahayag ngonyan kisa kaidtong tolong taon na an nakaagi. Posibleng gayo na an kadaklan sa saindo makikinabang sa pagtotokdo na ikatatao nin eksperyensiadong mga parahayag. An sarong tugang na babae na dati mga saro o duwang oras sana an ginagamit kada bulan sa paglilingkod sa langtad nakanood na makataram nin epektibo sa mga harong kan tabangan nin sarong eksperyensiadong parahayag. Nawara an dati niang pag-alangan na makikabtang sa ministeryo, asin sia nagin mahigos na parahayag kan maogmang bareta. Ngonyan bilang toodan na payunir, sia minasalingoy asin sinasabi: “An kaipuhan ko sana kaidto tokdoan kun ano an sakong sasabihon, dangan naogma na ako sa ministeryo.”
3 Kun kamo magurang sa kongregasyon, ministeryal na lingkod, payunir, o eksperyensiadong parahayag, paano daw kamo makatatabang sa pag-oswag nin iba? An enot na tangga isabi sa nangengenot sa saindong Pag-adal sa Libro kan Kongregasyon na boot nindong tumabang sa ibang parahayag.
4 Magin Organisado Asin Andam: Nakatatabang na magkaigwa nin depinidong tagbuan na mag-iibahan. An kaiba nindo tibaad nininerbiyos o nag-aalangan sa primero, pero pasasalamatan nia na may kaiba siang matabang kun kaipuhan. (Ecl. 4:9) Kun puwede, pumili nin teritoryo na mas posible kamong makanompong nin mga tawo na gustong makipag-olay sa Biblia. Ini makatatabang sa bagohan na makapakipag-olay asin kun siring magkaigwa nin kompiansa.
5 Sa pagpapadagos kan progresibong pagtotokdo, kapakipakinabang na pag-olayan kun paano dadalawon liwat an nanompongan na interesado. Kaiba dian an pagbugtak kan pundasyon sa enot na pagsongko paagi sa pagwalat nin hapot sa kagharong na sisimbagon pagbuwelta nindo. Seguradohon na tabangan na mag-andam an dai pang gayo nin eksperyensiang parahayag, dangan ibanan sia sa pagdalaw. Kun maponan an pag-adal asin an bagong parahayag nag-aalangan pa man giraray sa saiyang abilidad, tibaad booton kan mas eksperyensiadong parahayag na pangenotan an pag-adal nin pirang beses sagkod na an bagohan kuwalipikado nang sumalida.
6 Huli sa marikas na paglaog nin mga bagohan sa organisasyon, an kadonongan nin pagtao nin maigot na pagtotokdo sa ministeryo sa langtad nahahayag. Kaipuhan an tabang kan mga nakultibar na an saindang abilidad sa paghuhulit. Kun may matatabangan kamo, pag-abot nin panahon sia man magigin “kuwalipikado na magtokdo sa iba.”—2 Tim. 2:2.