Makanuod sa Eksperyensiyadong mga Parahayag

Talagang pinapahalagahan ta an eksperyensiyadong mga parahayag sa kongregasyon. An nagkapira dakul na taon nang maimbod na naglilingkod ki Jehova. An iba tibaad dai pa sana nahahaloy na nagin mahusay sa ministeryo. Nahiling kan mga parahayag na ini kun paano ginigiyahan ni Jesus an Kristiyanong kongregasyon sa huring mga aldaw na ini paagi sa pagpapahiwas kan paghuhulit asin paggibo nin disipulo. (Mat. 28:19, 20) Huli sa pakikikabtang sa ministeryo, nag-aako sinda nin “puwersa na labi sa ordinaryo” pag napapaatubang sa mga personal na problema asin kasakitan. (2 Cor. 4:7, NW) Dakul an manunudan sa eksperyensiyadong mga parahayag na ini. Kun may oportunidad, nauugma sindang itukdo sa iba an mga nanudan ninda. (Sal. 71:18) Kaya, kaipuhan tang gumibo nin oportunidad na makanuod sa sainda. Paano ini magigibo?

Sa Ministeryo: Tanganing magin epektibo sa ministeryo, nangangaipo nin pagsasanay an mga parahayag na baguhan o mayo pang gayong eksperyensiya. Dakul an manunudan sa pag obserbar sa maygurang na mga parahayag kun paano ninda ginigibo an saindang ministeryo. (Hilingon sa An Torrengbantayan na Pebrero 15, 2015 an artikulong “Papagdanayon an Saimong Kaigutan sa Ministeryo,” sa ikatulong parapo sa irarom kan subtemang “Tabangan an Bagong mga Parahayag.”) Paano ka nakinabang sa pakikiiba sa sainda sa ministeryo?

Puwede mo daw agdahon an sarong mahusay na parahayag tanganing makapartner mo sa ministeryo? Kun an parahayag maluya an hawak, tibaad sa pana-panahon puwedeng sa harong ninda kamo mag-adal kan tinutukduan mo sa Bibliya. Pagkatapos kan pag-adal, haputon an parahayag sa naobserbaran niya asin maghagad nin suhestiyon.

Magtao nin Panahon na Makaibanan Sinda: Magtao nin panahon na makaibanan an eksperyensiyadong mga parahayag tanganing mamidbid sinda. Imbitaran an saro sa sainda sa pampamilyang pagsamba nindo asin interbiyuhon siya. Kun an parahayag maluya an hawak, puwede daw na sa harong ninda gibuhon an saindong pampamilyang pagsamba? Haputon siya kun paano niya naaraman an katotoohan. Anong mga bendisyon an nakamtan niya? Anong pag-uswag an nahiling niya sa saindong kongregasyon? Anong kagaya-gayahan an namatian niya sa paglilingkod ki Jehova?

Magin mapagsabot asin magin realistiko sa mga inaasahan mo. Arog niyato gabos, an haloy nang mga parahayag may iba-ibang balaog sa ministeryo. (Roma 12:6-8) An iba maedad na, kaya puwedeng limitado na an panahon ninda na makaibanan kita. Pero, dakul an manunudan ta sa sainda huli sa saindang eksperyensiya asin maimbod na paglilingkod ki Jehova.